Tiranë, 27 shkurt 2018: Jo më kot thonë se historia përsëritet. Ngjarjet e ditëve të fundit në Kosovë për çështjen e kufirit me Malin e Zi nuk janë aspak më shumë se ngjarjet e vitit 1913, kur luftohej për mbrojtjen e kufijve nga Qeveria e Vlorës dhe kur Evropa i fali fqinjëve tanë territoret tona. Dhe në periudhën që luftohej paralel, si për mbrojtjen e Shkodrës edhe të Janinës, rapsodi popullor lab prodhojë këngën, e cila këndohet edhe sot në Labëri, të cilën e kemi marrë të plotë nga libri “Këngë popullore të Labërisë”, Instituti i Folklorit, Tiranë, 1991, vëllimi 8, f.900-901.
TERTIPE PËR SHQIPËRINË
Çikëre1) haberet vijnë,
Prizëren, Shkodër e Janinë:
Tertipe2) për Shqipërinë!
Vlladika me Jorgj lubinë3)
çetnikë e andartë4) i nisnë
të marrën Shkodr’ e Janinë.
dhe, sa të arrijnë Shkumbinë,
Shqipërinë ta përpijnë!
Si dy ujq lopën në brinjë5),
Tok6) ta ndajnë në dy copa,
Siç na dashkërka Evropa!
Thonë “kudo kemi krah
Gjithë kralet e mëdha”.
Thonë “s’ka dreq që na mba
dhe jo një grusht shqipëtarë,
pa topa, pa gjeneralë,
me dyfeqe me strallë,
që s’dihet nga kanë ardhë!…”
O burra, o shqipëtarë,
E di gjithë bota mbarë:
që kur leu diell e hënë,
Ne jemi në vëndin tënë,
Më të vjetrit në Evropë,
Dhe më të besës në botë!
Gjë të huaj s’lakmojmë,
Po dhe tënën7) s’e lëshojmë,
Kë do ndihmë, e ndihmojmë,
vdesim, po pa nder nuk rrojmë.
Miqtë sot na u bënë hasmë.
Mbi ta, burra shqipëtarë,
të ligjve t’u bëjmë varrë!
_______________
1 Çikëre= një nga një
2 Tertipe = marifete
3 Knjazi i Malit të Zi dhe mbreti Jorgo i Greqisë
4 Andartë = “kompanitë e shenjta” me ushtarë grekë
5 Brinjë = faqe e thepisur e një mali
6 Tok = së bashku
7 Tënën = tonën.
