Pashtriku.org, 13 prill 2017: Thonë se një fotografi vlen sa njëmijë fjalë. Është një moment i kapur nga aparati i fotografit boshnjak të agjencisë Reuters, Damir Sagolj, që e ktheu Sherife Lutën nga Kosova në simbolin e refugjatëve kosovarë të Bllacës së Maqedonisë 18 vjet më parë.
Sherife Luta asokohe ishte 22 vjeçe dhe mbante në gji vajzën e saj 6-muajshe, Besën. Ditën e 8 marsit 1999, ajo ishte një grua që doli nga shtëpia me foshnjën dhe babanë e saj për t’i shpëtuar granatimeve të serbëve në fshatin Ivajë në Kaçanik të Kosovës. Bashkëshorti iu bashkua Ushtrisë Çlirimtare, së bashku me burrat e tjerë të rinj e të fuqishëm.
Ndërsa Sherifja, një nënë e re, e paveshur, me pelenën e vajzës në kokë, e pangrënë, në një mot të ftohtë e me dëborë, eci për afro një muaj të tërë në këmbë me mijëra banorë të tjerë që po përpiqeshin t’i shpëtonin luftës. Deri në datën 3 ose 4 prill, kur u shkrep dhe fotografia që hyri në histori.
Duke folur për herë të parë për një televizion shqiptar, protagonistet e fotografisë, Sherife dhe Besa Luta, kanë rrëfyer vështirësitë e atij rrugëtimi dhe habinë kur kanë parë foton.
“Pasi kishim ecur 24 orë pa ndërprerje, vajza ngriu dhe nuk qante më. Kishte ngrirë. Mendova që kishte vdekur. E mori kunata ime dhe e futi në furrë të sobës të një shtëpie në Bllacë. Pas dhjetë minutash nisi të qante dhe refugjatët e tjerë nisën të duartrokisnin. Aty nisa të qaj. Kisha shumë emocione”, thotë e përlotur Sherife Luta.
Ajo ka treguar se si gjatë eksodit shumë njerëz humbnin ndjenjat, rrinin për ditë të tëra pa ngrënë, madje ka pasur dhe gra që kanë lindur maleve. Ato i janë mirënjohëse fotografit boshnjak.
“Do donim ta takonim fotografin dhe ta falënderonim. Habitem si e ka kapur këtë foto që ka tronditur botën”, thotë Besa.
Pjesë e intervistës, më pas, ka qenë edhe kryefamiljari Mirvat Luta. Përveç fotografisë, ato ruajnë edhe sot e kësaj dite batanijen që mbështillte Besën atë ditë. Më pas, pjesë e intervistës është bërë edhe kryefamiljari Mirvat Luta, invalid i luftës së Kosovës.
Ai tha për “Pasdite në Top Channel” se ishte shumë e vështirë të ndahej nga gruaja dhe vajza, por sipas tij, lufta ka kosto dhe sakrifica.
Pasi u ritakuan në qershor, familja Luta ndërtoi një shtëpi te re në Kaçanik të vjetër dhe u shtua me dy djem. Tashmë ato ditë të vështira mbijetese kanë mbetur pas. Vendin e ftohtësisë dhe frikës, e kanë zënë pranvera dhe paqja. (TCH)
Postime të Lidhura
SHERADIN BERISHA: MASAKRA E LIKOSHANIT, ҪIREZIT DHE PREKAZIT TË POSHTËM – KRIME TË PANDËSHKUAR!
(Pashtriku.org, 04. 03. 2013) – Në shkurt 1998 te gjashtë lisat e Likoshanit, forcat serbe pësuan një goditje…
GOLGOTA SHQIPTARE NË KRONIKAT E SHTYPIT TË HUAJ (1912 – 1913)
Në 109 vjetorin e pavarësisë GOLGOTA SHQIPTARE NË KRONIKAT E SHTYPIT TË HUAJ (1912 – 1913) Nga Sheradin…
DR.JAKUP KRASNIQI: MASAKRA E MANASTIRIT (9 GUSHT 1830) DHE PASOJAT E SAJ
Prishtinë, 03. 04. 2015 – Fillimi i shekullit XIX për popujt e Ballkanit (Ilirikut) ishte shekulli i formimeve…
UK LUSHI: MASAKRA E MANASTIRIT – QË KULLON GJAK TASH 184 VJET!
New York, 26. 08. 2014: Pas më shumë se pesëqind viteve, në fillim të shekullit të 19-të, si…