Prishinë, 12. 09. 2013 – Shtetet që marrin vendime në nivel global deklarojnë se për integrimin e Serbisë në BE nuk është kusht njohja e pavarësisë së Kosovës… Pranimi i të drejtës së serbëve që ata të mbajnë qëndrim neutral ndaj pavarësisë së Kosvës është dekurajues sepse ata i largon nga Kosova. Ma gjeni një shtet normal që do ta pranonte këtë cilësim idiotesk siç është ai i neutralitetit ndaj statusit të një shteti! Ma gjeni një shtet në Evropë, Azi, Amerikë apo Afrikë që organizon zgjedhje si këto lokale të 3 nëntorit 2013 ku nuk ka as logo, e as ndonjë shenjë shtetërore në fletëvotime!… Me neutralitet nuk krijohen kushte për integrim por për dezintegrim!… Gjarpinjt e Gjakut janë shndërruar në Ushujza të Gjakut!…E pata pranuar me mirkuptim dhe si diçka të drejtë dhe shumë pozitive cilësimin e kryeministrit Thaçi se ne që po deklarojmë se veriu i Kosovës do të ketë autonomi, status special, Republika Srbska apo se do të ndodhë ndarja e brendshme jemi të painformuar, injorantë dhe kundërshtarë të integrimit të Kosovës në BE, NATO dhe OKB!
Midis shtetit dhe joshtetit
Shtetet e BE-së kanë një qëndrim neutral ndaj statusit të Kosovës; as nuk e njohin pavarësinë e saj e as nuk thonë se Kosova nuk është e pavarur! Është gjetur një përkufizim i pranueshëm për ato pesë shtete anëtare të BE-së që nuk e kanë njohurë pavarësinë dhe të cilat as që mendojnë ta njohin këtë pavarësi! Fillimisht thuhej se dialogu përkatësisht mungesa e dialogut midis Prishtinës dhe Beogradit është pengesë për njohje të pavarësisë në ndërkohë që edhe me fillimin dhe përparimin e dialogut midis Beogradit dhe Brukselit nuk ka shenja që këto shtete do ta ndryshojnë qëndrimin rreth Kosovës! Për më keq neutralitetin ndaj statusit politik të Kosovës BE e ka metastazuar edhe në organizmat tjerë që operojnë në Kosovë siç janë: OSBE, EULESH, KFOR, UNMIK, UNHCR, UNICEF dhe organizatat tjera humanitare apo kriminale. Qeveritare apo joqeveritare. Të mbitokës apo nëntokës!
E pata pranuar me mirkuptim dhe si diçka të drejtë dhe shumë pozitive cilësimin e kryeministrit Thaçi se ne që po deklarojmë se veriu i Kosovës do të ketë autonomi, status special, Republika Srbska apo se do të ndodhë ndarja e brendshme jemi të painformuar, injorantë dhe kundërshtarë të integrimit të Kosovës në BE, NATO dhe OKB!
————————————-
Të trimëruar nga ky prapakthim i ndërkombëtarëve apo biseksualitet politik të tyre edhe Serbia i është kapur kësaj valleje madje në rolin udhëheqës duke këmbëngulur që në të gjitha bisedat rreth Kosovës, neutraliteti ndaj statusit të saj të jetë përcaktues dhe kusht kryesor për bisedime eventuale! Serbia nuk e paragjykon statusin e Kosovës sepse nuk e njeh ate përkundër deklarimeve të shotëgalices negociatore të Kosovës znj. Zezdita Tahiri e cila pas çdo marrëveshje të nënshkruar e cila e ngulë Kosovën thellë e më thellë drejt fundit të pusit deklaron se Serbia e ka njohur de facto pavarësinë e Kosovës dhe vetëm duhet pritur ndonjë shekull që kjo të bëhet edhe realitet! Në të njëjtën kohë shtetet që marrin vendime në nivel global deklarojnë se për integrimin e Serbisë në BE nuk është kusht njohja e pavarësisë së Kosovës. Unë më shumë i besoj Zezditës sepse ajo flet nga lartësitë hyjnore për faktin se shumë rrallë vjen në kontakt me tokën duke qenë kryesisht në aeroplan! Ajo është modeste prandaj udhëton vetëm me klasë biznesi pasi që edhe politikën e ka bërë biznes shumë përfitues! Fiton shumë lekë pa investuar asgjë përveç dëgjueshmërisë apo fleksibilitetit! Të gjitha lëshimet që po i bëjmë Serbisë bëhen për integrimin e serbëve të rebeluar anekënd Kosovës së pavarur dhe sovrane. Sidomos të atyre në veri! Jam deklarauar më parë se jam i painformuar dhe injorant legjendar prandaj nuk mbaj përgjegjësi për huqjet e shumta në parashikimin e gjërave si dhe moskuptimin e proceseve politike. Për këtë arsye e pata pranuar me mirkuptim dhe si diçka të drejtë dhe shumë pozitive cilësimin e kryeministrit Thaçi se ne që po deklarojmë se veriu i Kosovës do të ketë autonomi, status special, Republika Srbska apo se do të ndodhë ndarja e brendshme jemi të painformuar, injorantë dhe kundërshtarë të integrimit të Kosovës në BE, NATO dhe OKB. Unë kam shkruar shumë se Kosova po federalizohet territorialisht dhe politikisht prandaj edhe e meritoj titullin e injorantit legjendar. Ka të tillë që janë lakuar duke iu bindur fakteve dhe zhvillimeve politike. Unë edhe më tutje e them se integrimi i serbëve nuk bëhet duke iu bërë lëshime që i gërryejnë themelet e shtetit të Kosovës por duke u krijuar kushte dhe mundësi që ata të bëhen qytetarë të barabartë të Republikës së Kosovës me të gjitha të drejtat dhe obligimet! As diskriminim negativ e as diskriminim pozitiv! Por vetëm të drejta sipas Kushtetutës së Kosovës! Pranimi i të drejtës së serbëve që ata të mbajnë qëndrim neutral ndaj pavarësisë së Kosvës është dekurajues sepse ata i largon nga Kosova. Ma gjeni një shtet normal që do ta pranonte këtë cilësim idiotesk siç është ai i neutralitetit ndaj statusit të një shteti! Ma gjeni një shtet në Evropë, Azi, Amerikë apo Afrikë që organizon zgjedhje si këto lokale të 3 nëntorit 2013 ku nuk ka as logo, e as ndonjë shenjë shtetërore në fletëvotime! Ma gjeni një shtet në botë ku pozita dhe opozita, analistët dhe ekspertët për zgjedhje tregohen aq të pasinqertë dhe pranojnë kushte që strategjikisht e dëmtojnë mbijetesën e shtetit të Kosovës në fazën e brishtësisë së saj funksionale! Nuk e besoj se ka të tillë apo unë nuk kam lexuar se ka! Me neutralitet nuk krijohen kushte për integrim por për dezintegrim! Se, deri ku ka shkuar guximi i mohimit të realitetit politik dhe pavarësisë së Kosovës tregon edhe një intervistë e kryeredaktorit të RTK-së, programit në gjuhën serbe, të shkarkuar nga posti i cili në një intervistë dhënë Kohës Ditore ka deklaruar se ka pasur ide të mira që ky kanal të profesionalizohet. Si argument kryesor ka theksuar se ai ka qenë për ate që ky program i RTK-së (transmetues publik që financohet nga Buxheti i Kosovës dhe i cili i përgjigjet Kuvendit të Kosovës themelues i së cilës edhe është) do të duhej të mbajë qëndrim neutral ndaj statusit të Kosovës përkatësisht se qëllimi i kryeredaktorit të kanalit të RTK-së për gjuhën serbe i ardhur nga Novi Sadi ka qenë që për Kosovën të thuhet se as nuk është e pavarur e as nuk është pjesë e Serbisë! Idiotizëm dhe arrogancë e llojit të vet! Neutraliteti ndaj statusit të Kosovës do të bëhet kancer për Kosovën sidomos pas zgjedhjeve të 3 nëntorit 2013, prandaj e them se ndarja e brendshme e Kosovës nuk ka brirë! E pranoj botërisht se unë nuk jam i mençur as 10 % sa është kryeministri Thaçi, Blerim Shala, Behgjet Pacolli dhe eruditët e tjerë politik prandaj nuk do të hidhërohem për asgjë që ata do ta thonë në adresë të injorancës sime legjendare! Madje, ndjehem shumë i hendikepuar e pse jo edhe i turpëruar që nuk e kam thuaja asnjë cilësi të tyre siç janë: mençuria, sinqeriteti, pozitiviteti, ndershmëria, bukuria, dashuria ndaj atdheut, ndjenja të sakrifikohem për të vërtetën, ligjin dhe shtetin, shkathtësitë diplomatike, retorikën politike dhe modestinë! Për mua duket se vetëm do të mbetet ëndërr të fotografohem me të magjishmën baroneshën Ashton, me sulltan Nazarbajev, humanistin Robert Mugabe, me krerët e BE , diplomatët e pensionuar të shteteve të ndryshme, me tajkunët e Rusisë dhe Serbisë dhe krerët e tjerë të botës. Në fakt, para disa ditësh në shtëpi e gjeta një foto të përbashkët me Bacën Adem siç e quajnë idealistët apo budallenjtë apo Adem Demaçin siç e quajnë pushtetarët dhe atdhetarët. Me një shpejtësi të madhe dhe në kushte të ilegalitetit e dërgova në bodrum duke e mbuluar me shumë gjëra. Së paku të mos më llogaritet si rrethanë rënduese gjatë ndonjë bastisjeje eventuale! Sepse Gjarpinjt e Gjakut janë shndërruar në Ushujza të Gjakut!
Otac Sava dhe nipçe Iliri
Populli shqiptar ka qenë disa herë para shfarosjes. Sipas insajderit Ilir Deda në emisionin Rubikon u bënë sebep Otac Sava, kryeparkiarku Teodosije dhe Ilir Deda që shqiptarët por edhe serbët shpëtuan pas tensionimit të situates në Veri dhe armatosje së serbëve. U ndihmoi edhe Daut Haradinaj. Duket se kanë vepruar sipas Kanunit të Lekës dhe Kanonikut të Car Dushanit në kohën kur Hashim Thaçi paska dashur ta ndajë Kosovën. Mirëpo duket se Ali Ahmeti e paska penguar këtë ndarje bashkë me Angela Merkelin! Ilir dhe të gjithë që na keni shpëtuar faleminderit shumë. Veliko Hvale. Tankeshe! Tash kam filluar të tmerrohem nga frika! Për aq sa kam lexuar fjala insajder kryesisht nënkupton që dikush futet brenda për qëllime të caktuara. Me një fjalë është informator i dikujt. Mos po gaboj!
