Pashtriku.org, 01. 04. 2016: Lëvizja VETËVENDOSJE! mbajti konferencë për media për ta komentuar vendimin e komisionit ad hoc për demarkacionin me Malin e Zi. Deputeti Glauk Konjufca përmendi disa pika se pse rezultatet e këtij komisioni janë të pasakta.
“Më 15 mars kemi thënë që ky komision ad hoc i krijuar nga presidentja nuk do të sjellë rezultate të ndryshme nga Komisioni paraprak i drejtuar nga Murat Meha. Ne patëm thënë, me të drejtë, që ‘Çdo komision vlerësimi që fillon punën sipas materialeve e metodës së njëjtë, pra përcaktimin e vijës kufitare sipas kadastrit, do të vijë në përfundim të ngjashëm me atë të komisionit qeveritar’ ”, tha Konjufca.
Ky komision i krijuar nga presidentja Jahjaga, është cilësuar si komision ekspertësh kompetentë për fushën, por në fakt nga 3 personat që e kanë përbërë atë, vetëm 1 është ekspert i fushës. Dy të tjerët janë njëri diplomat ish zyrtarë i ICO dhe Zyrës amerikane dhe tjetri Expert i sigurisë dhe IBM.
Ky komision nuk ka pasur asnjë studiues e profesionistë shqiptarë, ani pse më mirë se sa shqiptarët askush nuk mund ta dijë çështjen e kufirit të vendit tonë.
Presidentja dhe ky komision nuk kanë marrë parasysh vullnetin e 205 mijë qytetarëve, që e kanë kundërshtuar rezultatin e komisionit qeveritar për demarkacion dhe nuk e kanë mbrojtur interesin e Republikës së Kosovës, në këtë rast.
Ekipi i ndërkombëtarëve i ftuar nga presidentja në raportin e tij ka thënë edhe skandale të tjera. P.sh. ky ekip e ka përshëndetur demarkimin e kufirit të Kosovës me Maqedoninë (i cili ka qenë skandaloz dhe në dëm të Kosovës) si dhe e ka përshëndetur demarkimin e kufirit të Kosovës me Shqipërinë (i cili nuk ka ndodhur kurrë!). Pra këtu kemi të bëjmë me joseriozitet të lartë të këtij grupi të ftuar nga presidentja.
Pjesa kryesore e raportit flet per përputhjen ligjore të dokumenteve të Komisionit shtetëror. Kjo është po ashtu vërtetë e pashembullt se si tre persona që asnjëri nuk e njeh me detaje e imtësi legjislacionin e komplikuar sa i takon kësaj çështje për vetëm 15 ditë jep konkluzione.
Ndërsa sa i takon pjesës substanciale, pra asaj ku flitet për territorin, duket qartë se me gjithë respektin për këdo që vjen në Kosovë i ftuar nga institucionet tona nuk mund të pretendojë që me 15 ditë të hulumtojë, studiojë dhe nxjerrë konkluzion për qindra faqe studimesh gjeodezike dhe po ashtu dhjetëra harta e mijëra faqe arkiva historike.
Ky komision ka marrë për bazë punën e komisionit të kaluar të drejtuar nga Murat Meha. Mirëpo ne kemi shpalosur para jush një hartë të vitit 1998 me autor Murat Mehën, në të cilën kufiri është në rregull, pra në shpërputhje me vendimet e komisionit që e kishte drejtuar. Ky është një skandal dhe flet për padrejtësinë që po i bëhet Kosovës në rastin me demarkacionin.
Pra, ateherë kur Murat Meha ishte studiues, i bënte hartat objektive dhe kufijtë e saktë, kurse tash që është shërbëtor i kompromiseve të pushtetit, shkel mbi vetë punën e tij shkencore, vetëm e vetëm që t’i justifikojë hektarët që Hashim Thaçi ia fali Malit të Zi.
Pra, kjo përveçse shkelje e interesit shtetëror, është edhe përdhosje e punës shkencore e profesionale, duke qenë që kjo hartë u botua nga Enti Shkollor i Kosovës dhe se breza të tërë nxënësish kanë mësuar dhe janë përgatitur profesionalisht me këto harta, të cilat tash Murat Meha po i shkel për hir të pushtetit.
