LIRIA ME GABIME DREJTSHKRIMORE
Nga Prof. Enver N. Rexhaj, Prizren, më 25 tetor 2026
Një ditë, në një shesh,
një njeri po kërkonte të vërtetën.
E pyetën:
— Çfarë ngjyre ka?
Ai tregoi qiellin.
— Gabim, — i thanë. — Qielli është i yni.
Tregoi detin.
— Edhe deti gënjen, — thanë. — Ne kemi dokumente.
Pastaj nxori zemrën nga gjoksi
dhe ua vendosi mbi tavolinë.
Ata e shqyrtuan gjatë,
i matën rrahjet,
i numëruan plagët,
i kontrolluan vulat.
— Nuk është në formatin e duhur, — thanë më në fund.
Dhe e dëbuan nga sheshi.
Turma duartrokiti.
Disa nga bindja,
disa nga frika,
të tjerët sepse të gjithë duartrokitnin.
Një fëmijë e pyeti të atin:
— Po nëse ai kishte të drejtë?
I ati ia mbuloi gojën me pëllëmbë.
— Mos bëj pyetje që mund të të lënë pa miq.
Vitet kaluan.
Sheshi u mbush me statuja,
rrugët morën emrat e heronjve,
dhe e vërteta u shpall festë zyrtare.
Atë ditë, të gjithë dolën për ta kremtuar.
Edhe unë dola.
Mbaja një pankartë ku shkruhej:
LIRI!
Por, kur policia më pyeti se çfarë kuptoja me atë fjalë,
e palosa pankartën me kujdes
dhe u thashë:
— Më falni. E kam shkruar gabim.
Doja të thosha:
QETËSI.
___________________
KOSOVA QË BEHAJDIN ALLAQI E MENDONTE PARA SE TË VINTE
Nga Prof. Enver N. Rexhaj, Prizren, më 15 tetor 2026
