Sheh dritën e botimit libri “Sfidat e ndërtimit të kulturës politike demokratike në Kosovë”, i autores Elife Luzha
Më 8 dhjetor 2023
Shtëpia botuese “Olymp”, Prishtinë, në përvjetorin e 111-të të shtetit shqiptar, njofton për botimin e librit me titull “Sfidat e ndërtimit të kulturës politike demokratike në Kosovë”, të politologes Elife Luzha. Libri ka temë qendrore sfidat e ndërtimit të kulturës politike demokratike në Kosovë, temë e palëvruar mjaftueshëm deri më sot nga autorët shqiptarë.
“Autorja godet mu në zemër të problemit: mangësitë e kulturës së sotme politike, si dhe qartëson se si mund të përçohet kultura politike demokratike në jetën politike të vendit”, thotë recensenti i librit, Mr. sc. Kastriot Myftiu.
Edhe recensenti tjetër i librit, Prof. ass. dr. Petrit Bushi, shkruan se libri “Sfidat e ndërtimit të kulturës politike demokratike në Kosovë” është një studim i rëndësishëm, që jep një kontribut të vlefshëm në literaturën e politikës dhe shoqërisë në Ballkan.
Libri është thirrje për ndryshim evolucionar jo në mënyrë të vetvetishme, por të vetëdijshme, me dije, frymë dhe inteligjencë.
Prandaj është i vlefshëm për studiues, studentë dhe për ata që janë të interesuar për zhvillimin politik dhe të kulturës politike demokratik në Kosovë.
NJË SFIDË E GUXIMSHME E DALË MBANË
“Sfidat e ndërtimit të kulturës politike demokratike në Kosovë” përbën një kontribut tjetër mjaft të rëndësishëm të autores Elife Luzha. Libri përplotëson studimet në një fushë çuditërisht të lënë paksa në harresë, atë të kulturës politike, si në rrafshin individual, ashtu edhe në atë shoqëror. Ai vetëdijeson dhe ndërgjegjëson çdo politikan, pushtetar e lexues, për faktin e pamohueshëm, se kultura politike është forca e padukshme shtytëse prapa politikës së dukshme, duke qenë kështu një armë e fuqishme në politikëbërje. Prandaj ky libër meriton të lexohet gjerësisht dhe të nxitë diskutime për kulturën e duhur politike, që do të na printe në rrugëtimin drejt vendosjes dhe konsolidimit të demokracisë liberale në Kosovë. Autorja godet mu në zemër të problemit: mangësitë e kulturës së sotme politike, të sintetizuara shumë bukur në shprehjen ecje në ngecje, gjenden, mes të tjerash, në paaftësinë e politikanëve për të shfrytëzuar traditën kombëtare dhe botërore, dhe për t’u ngritur mbi mendësitë arkaike.
Ajo e vë theksin edhe në mosdashjen e politikanëve dhe të pushtetarëve për t’i dhënë fund njëherë e mirë pandëshkueshmërisë dhe për të vendosur standardet e llogaridhënies dhe transparencës. Kultura brendapartiake nuk mund të përdoret për të ushqyer kulturën e armiqësisë ndërpartiake. E kundërta nuk luftohet duke u shndërruar në po atë të kundërt. Lidershipi modern nuk ushtrohet përmes bajraktarizmit anakronik, njëmendësisë narcisiste të liderit dhe servilizmit të anëtarësisë.
Autorja hedh dritë guximshëm edhe mbi vizionin e saj se si mund të përçohet kultura politike demokratike në mbarë jetën politike të vendit. Ky vizion shpaloset përmes tematikës së pasur lidhur me kulturën politike në kontekstin e sistemit politik, partive politike, zgjedhjeve parlamentare, gjuhës politike, shoqërizimit politik, familjes, arsimit dhe institucioneve arsimore, medieve, shtetit të së drejtës, rolit të lidershipit e liderëve, duke i sintetizuar të gjitha këto si sfida që duhen kapërcyer drejt demokratizimit të kulturës politike në Kosovë.
Për të qenë sa më bindëse, autorja ka qëmtuar e hulumtuar një literaturë të bollshme të studiuesve perëndimorë, por edhe të rajonit dhe shqiptarë. Gjuha e rrjedhshme, e thukët dhe lakonike e bën këtë vizion të qasshëm, të prekshëm e magjepsës.
Në fund, libri na lë ndjesinë e të qenit më të plotësuar në njohuritë tona rreth kësaj fushe. Ai na bën të kuptojmë se, kur ndërthurim artin e politikëbërjes me kulturën demokratike të politikëbërjes, realizimet shkojnë përtej pritshmërive. Libri është thirrje për ndryshim evolucionar, jo në mënyrë të vetvetishme, por të vetëdijshme, me dije, frymë dhe inteligjencë. Për këto arsye, autorja Elife Luzha ka dhënë një ndihmesë të paçmueshme në lartësimin e vlerave të kulturës politike demokratike dhe demokracisë liberale në Kosovë.
Kastriot Myftiu, përkthyes
© Pashtriku.org
—————
ELIFE LUZHA, INTELEKTUALE E BRUMOSUR ME SHUMË SFIDA NË JETË (VIDEO)
