UKSHIN HOTI NUK I PËRKET HARRESËS!

Java e Ukshin Hotit, 11 – 16 Maj 2024🤝

UKSHIN HOTI NUK I PËRKET HARRESËS!

Nga Sheradin Berisha

Më 16 maj bëhen 25 vjet nga zhdukja pa gjurmë e intelektualit, politikanit dhe filozofit tonë të shquar, Ukshin Hoti. Lidershipi politikë e institucional i Kosovës, gjatë këtyre viteve kryesisht rrallë herë ka folur për Ukshin Hotin! Edhe kur kanë folur, zëri i tyre nuk është dëgjuar përtej katër mureve të sallës! Rrjedhimisht ky “zë” ka heshtur, dhe ashtu në heshtje e ka heshtur fatin e këtij personaliteti emblematik për Kombin Shqiptar!

Duke pasur parasysh këtë indiferencë të pashembullt nga shteti e shoqëria jonë, portali pashtriku.org, (tashmë 13 vjet rresht) nga 11 – 16 maj 2024 prezanton ‘JAVËN E UKSHIN HOTIT’ me moton ‘UKSHIN HOTI – NUK I PËRKET HARRESËS!’

Me këtë rast ua bëjmë me dije institucioneve shtetërore, akademike, mediale dhe gjithë shoqërisë shqiptare, se: UKSHIN HOTI NUK I PËRKET HARRESËS! Ai e ka sfiduar VDEKJEN, dhe si i tillë do të mbetet përjetësisht i GJALLË…

Më 16 maj 1999, Ukshin Hoti, derisa po vuante dënimin në Burgun e Dubravës, befasisht pranon vendimin nr.24/2241/05 të nënshkruar nga drejtori i burgut, Aleksandër Rakoçeviq, për “lirim me kusht” nga burgu (!!!). Ai ishte dënuar me pesë vite burgim, në shtator të vitit 1994 nga gjykata serbe në Prizren!

Pas përfundimit të luftës, shokët e burgut të cilët u ndanë për herë të fundit me te, kanë deklaruar se ishte ditë e diele (një ditë e pazakontë për lirim nga burgu) kur baca Ukë (kështu e thërrisnin të gjithë) rreth orës 10 – 11 të paradites, i shoqëruar nga tre punëtorë të sigurimit serb, është nxjerrë nga ambientet e brendshme të burgut të Dubravës. Dhe, nga ky moment, (sot e atë ditë), nuk dihet asgjë për fatin e tij.

Në fakt në gusht të vitit 2020, ekipi i emisionit “Udhëve” në RTK ka zbardhur disa dokumente të ushtrisë dhe policisë serbe, të cilat flasin se në ditën që ishte nxjerrë Ukshin Hoti nga Burgu i Dubravës, nuk ishte liruar. Fillimisht u rrëmbye dhe më pastaj ishte vrarë e masakruar në mënyrën më makabre nga policia serbe e asistuar nga Ushtria Jugosllave. Më gjerësisht shikoni emisionin: UDHËVE – KRIMET E SERBISË – FATI I UKSHIN HOTIT! 21.08.2020

Edhe pas prezentimit të këtij dokumentari prokuroria e shtetit nuk ka bërë asnjë hetim në këtë drejtim!

KU ËSHTË UKSHIN HOTI?

A ËSHTË GJALLË APO I VDEKUR UKSHIN HOTI?

Këto pyetje tashmë 25 vjet i ripërsërisin shqiptarët! Dhe për çudi, askush deri më sot nuk ka dhënë një përgjigjie të saktë për fatin dhe vendndodhjen tij. Ndërkohë që janë thurur parreshtur spekulime, madje ka pasur edhe prononcime publike se, Ukshin Hoti është gjallë, dhe se po mbahet në burg shtëpiak (diku në Serbi), për ‘kusuritje politike’ etj.

Pas përfundimit të luftës, familja e Ukshin Hotit, veçanërisht motra e tij Myrvetja, ka trokitur në të gjitha dyert e partive politike, të institucioneve të Kosovës dhe të Shqipërisë, dhe ka kërkuar zëshëm ndriçimin e fatit të Ukshin Hotit. Të gjithë ata politikanë, motrës Myrvete, i kanë premtuar se, çështjen e Ukshinit do ta ngrisin në çdo takim zyrtar me faktorët ndërkombëtarë, për ta detyruar Serbinë që ta zbardhë fatin tij. Por, fatkeqësisht, deri më sot asnjë premtim, nuk është mbajtur, çka do të thotë se ata kanë gënjyer, për më tepër kanë luajtur me ndjenjat e familjes së madhe HOTI dhe të të gjithë shqiptarëve!

Pas 16 vitesh, për herë të parë Kuvendi i Republikës së Kosovës, më 8 maj 2015, në kuadër të rekomandimeve për zbardhjen e fatit të personave të pagjetur ka pranuar një peticion me 13 mijë nënshkrime, të mbledhur nga një grup qytetarësh të Rahovecit, për zbardhjen e fatit të Ukshin Hotit! Dhe kjo kërkesë me rekomandime të qarta, nuk është trajtuar seriozisht nga Kryetari i Kuvendit (të atëhershëm), Kadri Veseli, dhe si e tillë ka përfunduar në arkivin e Kuvendit!

Më 27 prill 2018, pas disa orë debatesh, Kuvendi i Kosovës nuk ka arritur të miratoi një rezolutë për zbardhjen e fatit të personave të pagjetur në mesin e të cilëve është edhe Ukshin Hoti! Kjo ndodhi për faktin sepse nuk pati kuorum, dhe rezoluta u deshtë të votohet më 3 maj! Ky veprim tregon se sa të papërgjegjshëm janë të “votuarit e popullit”, deputetët e Kuvendit të Kosovës.

Kjo klasë politike (bashkë pozitë e opozitë), ka treguar dhe po tregon në vazhdimësi një neglizhencë cinike për këtë personalitet gjithëkombëtar, dhe kësisoj shpërfaqin gjithanshëm indiferentizmin histerik të tyre.

Në të vërtetë sa ishte në opozitë Lëvizja Vetëvendosje dhe lideri i saj, Albin Kurti, kanë shprehur interesim për Ukshin Hotin, madje edhe e kanë vizituar familjen dhe “shtëpinë Muze të Ukshin Hotit” në Krushë të Madhe, por duket se nuk kanë bërë veprime konkrete institucionale apo edhe jashtë institucioneve, që ta ngrisin këtë çështje në ato përmasa për zbardhjen e fatit të tij. Edhe tani që janë në pushtet, të paktën deri më sot – nuk kanë bërë diçka më shumë se sa kur ishin në opozitë.

Në këtë kuadër, as Adem Demaçi (tashmë i ndjerë), as Rexhep Qosja apo Ismail Kadare (si personalitete të shquar), gjatë këtyre viteve nuk ishin aq të zëshëm, që të ndikonin tek instancat shtetërore apo dhe të bëjnë trysni tek faktori ndërkombëtarë, për zbardhjen e fatit të Ukshin Hotit!

Fatkeqësisht për zbardhjen e fatit të Ukshin Hotit nuk kanë shprehur interesim, as institucionet akademike, shkencore etj., siç janë:

– Akademia e Shkencave dhe e Arteve të Kosovës dhe ajo e Shqipërisë,

– Instituti Albanologjik,

– Instituti i Historisë,

– Shoqata e të Burgosurve Politikë,

– Shoqata e Veteranëve të Luftës të UҪK-së,

– Këshilli për Mbrojtjen e të Drejtave dhe Lirive të Njeriut,

– Avokati i Popullit, si dhe shumë organizata tjera Jo qeveritare…

– Madje për Ukshin Hotin, ka heshtur pjesa më e madhe e medieve të shkruar dhe elektronike shqiptare, në vend se ta sensibilizojnë për çdo ditë këtë çështje, deri në zbardhjen e fatit të tij!

Në qershor të vitit 1999 intelektuali ynë i shquar Dr.Moikom Zeqo (tashmë i ndjerë), në një APEL drejtuar opinionit publik, jo rastësisht ka theksuar, se: “Indiferenca (për Ukshin Hotin) është kriminale. Indiferenca nuk është gjë tjetër veçse pajtim me torturuesit dhe ndoshta me vrasësit e tij. Ukshin Hoti nuk i përket harresës. Ai është në vetë thelbin e kujtesës së kombit. Ukshin Hoti nuk mund të vdesë dhe në të vërtetë nuk ka për të vdekur kurrë. Qenia e tij intelektuale është e pashlyeshme dhe është prezent kudo. Kosova dhe kombi shqiptar kanë nevojë urgjente për mendimin e Ukshin Hotit. Ukshin Hoti sakrifikoi gjithçka dhe askush nuk ka të drejtë të jetë mosmirënjohës, të mos ketë respekt apo të mos përkulet me nderim përpara figurës së tij. Kjo indiferencë, heshtje apo mosmirënjohje e tyre ndaj Ukshin Hotit, gjithësesi i bën të papërgjegjshëm politiksht”, ka thënë zëshëm Mokomi ynë i madh.

PËRGJEGJËSIA!

Rrjedhimisht përgjegjësia morale, politike, kombëtare e historike, për mos zbardhjen e fatit të Ukshin Hotit, natyrshëm bjerë mbi:

1. Ibrahim Rugovën (tashmë i ndjerë), si Kryetar i LDK’së dhe president i Kosovës;

2. Hashim Thaçin, si shef i Drejtorisë Politike të UҪK’së, shef i Delegacionit të Kosovës në Rambuje, kryetar i PDK’së, si ish Kryeministër dhe president i Kosovës;

3. Isa Mustafën, si kryetar i LDK’së dhe ish’kryeministër i Qeverisë së Kosovës;

4. Kadri Veselin, si shef i Shërbimit Informativ të Kosovës (SHIK), kryetar i PDK’ës dhe ish kryetar i Kuvendit të Kosovës;

5. Fatmir Sejdiun, si ish Kryetar i LDK’së dhe ish president i Kosovës;

6. Atifete Jahjagën, si ish’presidente e Kosovës;

7. Bajram Rexhepin (tashmë i ndjerë), si Kryeministër i parë i pasluftës në Kosovë dhe si Ministër i Brendshëm në qeverinë Thaçi’2;

8. Nexhat Dacin, si ish Kryetar i Kuvendit të Kosovës, kryetar i LDD’së, ish kryetar i Akademisë së Shkencave dhe e Arteve të Kosovës;

9. Jakup Krasniqin, si ish’zëdhënës i UÇK’së, dhe ish’Kryetar i Kuvendit të Kosovës dhe Kryetar i Këshillit Kombëtar të NISMËS Socialdemokrate;

10. Agim Ҫekun, si komandant i TMK’së, një kohë kryeministër dhe ish’ministër i FSK’së;

11. Ramush Haradinajn, si kryetar i AAK’së dhe ish Kryeministër i Qeverisë së Kosovës;

12. Fatmir Limajn, si ministër në qeverinë Thaçi’1 dhe tani kryetar i Nismës Socialdemokrate të Kosovës;

13. Lidershipin politik e institucional aktual të Kosovës, presidenten Vjosa Osmanin, kryeministrin Albin Kurtin, kryeparlamentarin Glauk Konjufcën dhe gjithë deputetët e Kuvendit të Kosovës…

14. Lidershipin institucional në Shqipëri, të shqiptarëve në Maqedoni, Malë të Zi dhe në Kosovën Lindore;

15. Si dhe të gjitha institucionet akademike – shkencore, mediatike dhe organizmat tjerë me ndikim në shoqërinë shqiptare!

Qoftë i përjetshëm kujtimi dhe lavdia për Sokratin e shekullit XX’të, Ukshin Hoti🤝

© Pashtriku.org – 11 maj 2024

Ukshin Hoti – Vigani i Kosovës (Dokumentar Ekskluzivë)