Tetovë, 22. 02. 2017: Të nderuar, me rastin e 139-vjetorit të Lidhjes së Prizrenit, Shoqata për kulturë “Tradita”, me seli në Tetovë, ka nderin t’Ju ftojë të merrni pjesë në Konferencën shkencore, me temë:
“TË PERSEKUTUARIT DHE TË BURGOSURIT POLITIKË SHQIPTARË NË REPUBLIKËN E MAQEDONISË”
Konferenca shkencore do t’i përfshijë, përkatësisht do t’i trajtojë këto ngjarje:
Proceset e montuara politike ndaj atdhetarëve shqiptarë në Maqedoni në periudhën e pas Luftës së Dytë Botërore deri në ditët tona;
Ngritja e Flamurit kombëtar në Tetovë, në vitin 1968;
Demonstratat në Kosovë në vitin 1981 dhe reflektimi i tyre në trojet shqiptare në Maqedoni;
Dhuna e pushtetit ndaj shqiptarëve në Maqedoni gjatë periudhës së pluralizmit;
Represioni i pushtetit me rastin e themelimit të Universitetit të Tetovës, në vitin 1994;
Qëndrimi i shtetit shqiptar lidhur me politikën represive të pushtetit ndaj shqiptarëve në Maqedoni;
Qëndrimi i faktorit ndërkombëtar ndaj dhunës së ushtruar ndaj shqiptarëve në Maqedoni;
Reagimi i shtypit shqiptar dhe i shtypit të huaj lidhur me politikën represive të pushtetit ndaj shqiptarëve në Maqedoni gjatë periudhës së pas Luftës së Dytë Botërore e këndej.
Konferenca shkencore do të mbahet në Tetovë, më 11 qershor 2017.
Ju lutemi që abstraktet e punimeve shkencore t’i dërgoni deri më 20 maj 2017, në adresën elektronike: [email protected] . Ju njoftojmë njëherazi se punimet shkencore që do të prezantohen gjatë konferencës, do të botohen si përmbledhje e veçantë nga Shoqata për kulturë “Tradita”.
Tetovë, më 20 shkurt 2017
Me respekt,
Selam Sulejmani – Kryetar i Shoqatës për kulturë “Tradita” – Tetovë.
