KOSOVË, GËZUAR VITIN E RI 2024 …!

Kosovë, Gëzuar Vitin e Ri 2024…!

Nga Elife Podvorica Jashari

…Ngutu në rendin tjetër-po ma bënte nusja e djalit dje kur dolëm të blinim edhe gjësendet e fundit që e plotësonin menynë tonë që kishim planifikuar për darkën e ndërrimit të motmoteve.

Me karrocën e mbushur dëng, mezi gjetëm arkën që ishte pak më e shlirë se sa të tjerat. Sikur ne të dyjat, kishin dalur edhe shumë familjarë të tjerë që po blinin e përgatiteshin për festën e fundvitit.

Kosova këtyre ditëve është gjallëruar nga ardhja e Mërgatës. Bashkimi familjarë, ia shtonë bukurinë përditshmërisë sonë, e bënë festive e të begatshme çdo gjë. Jo vetëm anën materiale, por sidomos atë emocionale e shpirtërore. Sepse, njerëzit tanë nga Mërgata vijnë për t’u çmallur me vendlindjen dhe familjarët e tyre të dashur. Daljet nëpër restorane dhe llafosja e tyre e këndshme, dyqanet e stërmbushura me ta dhe ndihmesa që u bëjnë familjeve të tyre këtu në Kosovë, na e heq për ca ditë hallin nga përditshmëria jonë rraskapitëse, të cilën e kemi të ngarkuar nga ankesat tona që si heqim prej gojës.  Sikur jemi mësuar që ato ti kemi në maje të gjuhës duke u dhënë gjithëmonë prioritet para gjërave tjera interesante që poashtu i kemi të bollshme.

Të bollshme e të bagatshme i patëm edhe sofrat tona. Për aq sa e di nga vetja dhe gjithë familjarët e miqët që i njoh.

Festuam, vallëzuam e u knaqëm. Pjesë e kësaj patjetër që janë edhe urimet e përzemërta që vijnë nga të gjitha anët e familjes dhe miqëve e kolegëve.

Mbrëmë, ishte edhe një urim i përbashkët i të gjithë shqiptarëve të Kosovës.

-Urime na qoftë liberalizimi i vizave-ishte urimi pothuaj kryesor i festës.

-Urime ju shprehu edhe unë të gjithë atyre të rinjëve që kishin dashur të studionin jashtë vendit,e që nuk kishin mundur për shkak të mos-lëvizjes së lirë.

-Urime gjithë nënave e gjysheve që për vite të tëra s’kishin mundur të ishin pran djemëve e vajzave të tyre, të cilit punonin e studionin jasht vendit, por që duhej të përpëliteshin vet larg dashurisë e kujdesit prindëror.

-Urime gjithë artistëve shqiptar të Kosovës që me peripeti të mëdha arrinin të bënin tek-tuk ndonjë bashkëpunim me artistët tjerë nëpër Europë.

Sot, teksa po ndiqja koncertin e përvjetshëm të Filharmonisë së Vjenës, dhe po knaqesha me virtuozitetin e veprave që ekzekutoheshin me mjeshtri mahnitëse, në një moment mu mbushën sytë me lot. Ishte një moment kur orkestri dhe publiku arrijnë një simbiozë artistike-instrumentistët luajnë veprën, audienca i mbështet me duardrokitje të ritmuar me melodinë e valsit të Strauss-it, ndërsa dirigjenti kthehet jo nga orkestri, por nga publiku që ti dirigjojë në duartrokitjete e tyre frenetike. Kështu arrinë që të krijojë një bashkëpunim dhe pjesmarrje aktive edhe të audiencës, e cila me duartrokitjet e saj ritmike, sikur bëhet pjesë e veprës muzikore. Programi muzikor i koncertit, është i begatuar edhe me pjesë vallëzimi të njohura për tërë botën e civilizuar ku paqja mbretëron mbi luftën dhe të keqen.

Ju mora shumë lakmi atyre që ishin në skenë, por edhe atyre që ishin ulur e me një delikatesë prej aristokratësh po e shijonin koncertin në fjalë.

Gjersa, po e shijoja edhe unë tërë këtë spektakël, bashkëshorti më tregoi që edhe dirigjenti tashmë i njohur Memli Kelmendi, kishte koncert po sot në Vjenë me korin e tij “Siparantum”. Përndryshe në programin e tij muzikor, kishte futur edhe vepën korale “Pakëz në ëndërr, pakës në zhgëndërr”, e cila sipas fjalëve të dirigjentit kishtë pasur sukses dhe pritje të shkqëlqyeshme nga ana e publikut europian kudo që këtë vit e kishte prezantuar nëpër pjesmarrjet e tij të shumta nëpër qytete të ndryshme të Europës. Sipas Memlit vepra e kënduar në shqip kishte zgjuar një interesim të jashtzakonshëm.

-Euu-thashë unë. Koncerti i Vjenës, dhe koncerti i Memlit në Vjenë, po në të njëjtën ditë. Gogja arritje është kjo për të gjithë komunitetin artistik muzikor, që e di çfarë domethënë kjo për promovimin e muzikës shqiptare, por edhe të vet shtetit të Kosovës.

Memli Kelmendi dhe të gjithë anëtarët e korit “Siparantum” edhe kësaj radhe kishin shkuar duke ndenjur para ambasadave në procedurat e tyre kokëdhimbëse dhe nënçmuese. Por, që nga dita e sotme,ata do të shkojnë pa këtë mundim të lodhshëm e përçmues.

Kështu shpresoj që do të shkojnë edhe të rinjët tjerë, të cilët me projektet e tyre, do të avancojnë vendin e tyre Kosovën, të cilën e çliruan dhe dhanë gjakun shumë e shumë të rinjë , që  luftuan e i dolën zot jo që ajo një ditë të boshatisej nga rinia e saj,ashtu siç u flit kohëve të fundit, por të ndodhë e kundërta.

Secili “Memli” i fushës së tij, të arrijë të bëjë bashkëpunime e projekte me vendet tjera, pa e lëshuar vendin e tyre. Sepse , vendin tënd duhet ta ndërtosh vet, e jo të ikësh prej tij. Besoj që mirëqenia e qytetarit të Kosovës do të përmirësohej me këtë mënyrë, e jo me ikjen e tyre në kërkim të një jete më të mirë nëpër vendet e huaja. Sepse, nuk do ta gjejnë.Ose , do ta gjejnë pas disa viteve, por çmimi do të jet shumë i dhimbshëm për të gjithë ata që do ta provojnë.

Andaj, liberalizimin e vizave le ta shohim si një mundësi, por jo si një ikje.

Europa dhe standardi i saj, ka ndryshuar ashtu siç ka ndryshuar shumçka në te. Luftërat e trazirat ndërnjerëzore të njëpasnjëshme të këtyre dekadave të fundit, kanë bërë zhvendosje e parregullësi edhe tek shtetet më të forta ekonomike në Europë. Andaj, at bindjen që jashtë na pret tapeti i kuq, le ta heqim nga mendja.

Ti gëzohemi gjërave dhe mundësive që na i afron vendi ynë dhe lëvizja e lirë, që padrejtësisht e patëm pengesë në zhvillim tonë normal për këto 23 vite.

Të mundohemi që në vendin e tyre, ta kthejmë edhe mërgatën,sepse familja shqiptare për një shekull të tërë nuk ka mundur të funkcionojë normal, pikërisht për shkak të ndarjes së saj në dy pjesë-njëra jashtë e tjetra brenda vendit. Besoj që ata që funkcionuan për tërë këto dekada jasht vendit, e meritojnë që një ditë ti kthehen përgjithëmonë vendlindjes së tyre.Dhe siç është e ditur historikisht “Bashkimi bën fuqinë”, do të bëjë edhe për qytetarët shqiptar, të cilët qenë të dënuar të vuajnë helmin dhe pasojën e ndarjes familjare për dekada të tëra.

Me shpresë që ne tashmë i kemi kuptuar këto gjëra, shfrytëzoj rastin dhe ju Uroj Vitin e Ri 2024, dhe gjithë të mirat e kësaj bote për Kosovën tonë të dashur, për vendlindjen tonë.