POEZI PËR NOLIN DHE NËNË TEREZËN

POEZI PËR NOLIN DHE NËNË TEREZËN

Nga Albert Habazaj, Vlorë 27 gusht 2021

I KËRKOJ TË FALUR NOLIT

Nga Albert Habazaj

– Ti ke bërë vargje, – më tha një shok –

Për të shquar e të marrë, me zë e pa zë,

Për të dashurit e zemrës e miq plot

Po Nolit, …Nolit liberator asnjë.

I them: – Padyshim ta ndeshësh, miku im

Vjershave të mia s’e ke aq vështirë

Tek përsëris fjalët: det, dallgë, dritë

Këtë gabim patjetër e bëj me dëshirë.

Aty gjej sinonimin për Viganin,

Kohërash të murme që po presin rreze;

Me kukudhët e shoh si ndeshet Fani

Tek Atdheun përdorin brutalisht si meze…

Në Forest Hill të Bostonit*, ku prehet

Shkova me kalë të muzës për ta parë.

Kur u ndamë, i tronditur më tha: – Bir,

Hidhi një cigar Flamurit Kombëtar!

* Në moshën 83-vjeçare, u preh në varrezat e Forest Hillit të Bostonit, më 13.03.1965 Fan S. Noli ynë i madh

Nderim 111 vjetorit të lindjes së Shenjtores shqiptare

ULLIRI I MIRËSISË

Nga Albert Habazaj

Një lule me vargje për Shenjtërimin e Nënë Terezës (26 gusht 1910-5 shtator 1997)

Sot, kur nga veset po kërcënohet Planeti,

Egoistët behin si shumëkëmbësh të xhelozisë,

Sot, kur jetim e i braktisur ndihet Deti,

Ngrihet me përkushtim Nëna e Dashurisë.

Pikërisht kur bota e skamur, e mjeruar

Mbeti pastrehë, e sëmurë, sakate,

Ngrihet simboli human i vetëmohuar

Me frymën e shenjtë për miliarda fate.

Bota e mirë është e varfër, rënkon,

Vuan për dinjitet, dhe për koren e bukës,

Edhe pas njëqind vjetësh nuk prehet, s’duron,

Ngrihet në amshim Nënë Tereza e Kalkutës:

“Këtu është një jetë” – flet e ngroh ëmbël

Me butësinë e vërtetë qiellore,

Anjeza jonë, Gonxhe Bojaxhiu zemrën

Edhe shpirtin e mbush me lule pranverore…

Dhe Shkupi, dhe Shkodra, dhe Vlora, Shqipëria

Ndihen mirë për rrënjën e tyre që çeli,

Përderisa me të krenohet dhe India,

Baca Kolë e ti, Drane FALEMINDERIT!

Si ajo shqiponja që fluturon mbi mjegull

Nënë Tereza drejton shikimin drejt diellit,

Si engjëll e qenie e lartë hyjnore

Vjen si burim drite i mendimit të Qiellit.

Se dhe dielli ka varr vetëm dritën e tij,

Ai mund të vetëasgjësohet, nuk vdes;

Nëpër shekuj Nënë Tereza thur fisnikëri,

Përmbi shekuj Ulli Mirësie me shpresë!

Total
0
Shares
Lini një Përgjigje

Adresa juaj email s’do të bëhet publike.

Postime të Lidhura