Berlin, 6 shkurt 2019:
1.
Atllantizmi i ri ka tëholluar kësomotshëm ndjeshmërinë, gati doktrinare, për spastrimet etnike.
Franca e Egal-Libertesë nismëtoi cilësimin “gjenocid” për shfrenimin popullshojtës të ushtrive turke kundër armenëve qysh në fillimshekullin e ikur.
Sepse, krimi, sipas shkencëtarëve të së drejtës, nuk i nënshtrohet preskripcionit. Nuk vjetrohet kurrë.
Mirëpo, për ballkanës tani, e poashtu, retroaktivisht dikur, do të ketë prorë një sens e masë tjetër. Është një skajim i braktisur fisesh, do thonë teoricienë të varieteteve racore, i padenjë për qytetni e vetëjetesë. Por, sërish, dhe midis tyre gjeopolitika hartonte tabelën e ftohtë selektive…
2.
Shqipëria e vjetër që vente deri te Vërzja e Nishi (si e quante Konica) do të dëbohej biblisht nga kostumprerësit e zinj të Kongresit të Berlinit (qershor 1878). E pas do linte tokën e saj të shkrumuar dhe emrat, dëshmitë, varret, kujtesën e barit dhe shiut…
Në hullinë e po kësaj doktrine,
rreth 60 vjet më vonë, çamët do vriteshin e priteshin nën akuzën e kolaborimit fashist, duke i dorëzuar, tashmë thikës greke, hapsirën e tyre jetike.
Ndërkaq, në nisje të mijëvjetit të ri, shohin një shfaqje tjetër. Një miklim krimi e dredhkë interesi rrëzojnë atë idenë e ndjesisë me të cilën do niste ky shkrim.
Serbët e veriut të Kosovës, edhepse kolaboratorë të zjarrtë, madje të rreshtuar si falangë e regjimit fashist të Sllobodanit (pushtime, kampe përqëndrimi, varre masivë, dyndje përdhunore, therje fëmijësh, zbrazje vendjete) pretendojnë shpërnguljen bashkë me territorin e huaj.
Një paralele mes dy rasteve, ndaj, jep pozicione morale e historike krejtësisht të kundërta.
Në të dy kohët, së pari, do të kishte një Führer: i madh në Berlin dhe i vogël në Belgrad.
Pastaj, së dyti, ndërsa akuza e bashkëpunimit çam ishte e shpifur – bashkëpunimi i serbëve lokalë me programin e vozhdit të tyre ishte real.
Dhe, tutje, çamët do të banonin kryehershëm dhéun e vet atnor, kurse serbët s’janë veçse mbeturina rojash koloniale të regjimeve serbe n’për kohë ndryshme.
Së fundmi, kosovarë e çamë do të zhbëheshin forcërisht nga votër e lashtë, ndërkohë që serbët bëjnë shantazhin e ulët: ose mbeten si element denigrues ose ikin, por vullnetarisht, si pjesë e ideologjisë së “Anschluss”-it ariozofik me shtetin e Serbisë!
3.
E, pra (veç episodit austrohungarez), a nuk identifikohen shqiptarët me Europën vetëm përmes humbjes?
Këtë vrajë do t’a dëshmonin kanceleri e interesa heterogjenë të saj edhe së voni: gjatë luftës, kur do t’a sabotonin lirinë dhe gjatë paqes, kur sabotojnë pavarësinë.
Por ishte një urdhër i epërm në Zyrën ovale që copëtoi e i rimori Serbisë atë truall arbnor që i kishin dhënë si pajë Serbisë. Është, poaq sot, vullneti i saj madhnor që ruan kufijtë dhe asiston edukimin e vështirë politik e shtetëror të Kosovës!
Postime të Lidhura
RAGIP SHALA: RICIKLIMI I LUFTËS SPECIALE TË UDB’së – NË KOSOVË!
Zvicër, 26. 04. 2014 -Gjeneralët serbë që nga shek.19 kanë terrorizuar shqiptarët me luftëra konvencionale dhe jokenvencionale. Masakrat…
NË SUEDI FESTOHET 110 VJETORI I SHPALLJES SË PAVARËSISË SË SHQIPËRISË
NË MUNKA LJUNGBY – ENGELHOLM TË SUEDISË SHKSH ”NËNA TEREZË” FESTOJ 110 VJETORIN E SHPALLJES SË PAVARËSISË SË…
PSE PUSHTETI ËSHTË NË SHËRBIM TË BANKËS?!
PSE PUSHTETI ËSHTË NË SHËRBIM TË BANKËS?! Politika në thelb është një teatër! Pse? Sepse politikanët janë ‘aktorë’,…
SHERADIN BERISHA: SHITJA E BANKËS ‘DARDANIA’ NË TIRANË, LIDHJET E BUJAR BUKOSHIT ME SALI BERISHËN DHE SHIK-un E GAZIDEDES (DËSHMI ARKIVORE)
Pashtriku, 26. 02. 2020: Zbardhen për herë të parë dokumentet e shitjes së Bankës Dardania në Tiranë dhe…