(Prishtinë, 23. 10. 2012) – Ngjarjet e fundit politike në vend, padyshim që kanë nxjerrë në pah edhe një herë tendencën e Qeverisë së Kosovës për të instaluar një shtet policor. Përdorimi i policisë për t’i privuar qytetarët nga liritë fundamentale është element i shtetit policor, i cili gjithnjë e më shumë po bëhet i dukshëm. Qeveria e jonë duke mos pasur legjitimitet dhe përkrahje politike nga qytetarët, po e instrumentalizon policinë për ta realizuar agjendën e saj të mbrapshtë politiko-ekonomike. Dhuna policore ndaj qytetarëve, aktivistëve dhe deputetëve që kundërshtojnë në mënyrë paqësore diskursin politik qeveritar, është dëshmi që policia është në shërbim të pushtetarëve.
Qeveria e Kosovës në javën e kaluar ka nënshkruar shitjen e rrjetit të distribucionit të KEK-ut me përfaqësuesit e konsorciumit turk “Çalik dhe Limak”. Qeveria i shpërfilli kështu tërësisht thirrjet e pandërprera të qytetarëve dhe punëtorëve për të mos e privatiziuar këtë ndërmarrje strategjike shoqërore. Janë bërë dhjetëra protesta dhe një peticion i nënshkruar nga dhjetëra mijëra qytetarë. Të gjitha këto, hasën në veshin e shurdhër të Qeverisë sonë. Për më tepër, Qeveria në ditën kur e shpronësoi shtetin nga ky aset shoqëror, urdhëroi policinë që të ushtroj dhunë policore ndaj secilit që po protestonte paqësisht. Policia rrahu dhe arrestoi deputët e aktivistë të Lëvizjes VETËVENDOSJE!, si dhe përfaqësues të sindikatave.
Dhuna policore ndaj protestuesve paqësorë u urdhërua drejtpërdrejt nga Ministri i Punëve të Brendshme, Bajram Rexhepi. Kjo u vërtetua në kohën kur deputetët e Lëvizjes VETËVENDOSJE! dëshironin që të hynin në objektin e Qeverisë. Ky ministër i dëshmuar për arrogancën e tij unike, është parë duke dhënë urdhër truprojave të kryeministrit Thaçi, për largimin e deputetëve me dhunë nga oborri i Qeverisë. Ministri Rexhepi, shkeli të drejtën e deputetëve që të hyjnë në objektin qeveritar. Përveç kësaj, ministri nuk ka të drejtë që të ndërhyjë në veprimet operacionale të policisë as nëpërmjet truprojave të qeveritarëve dhe as nëpërmjet eperorëve policorë.
………………………………………
Kundër shtetit policor në Kosovë, kundër pazareve me Serbinë – 22.10.2012.
………………………………………..
Deputetëve të Lëvizjes VETËVENDOSJE! nuk iu ndalua hyrja vetëm në objektin e Qeverisë, por edhe në atë të Kuvendit. Porta kryesore e Kuvendit ishte e mbyllur me zinxhirë nga policia pa dijen e zyrtarëve të Kuvendit. Kësisoj deputetët e kishin të pamundur pjesëmarrjen në seancën e Kuvendit, e cila kishte filluar. Vetëm kur deputetët filluan që ta kapërcejnë rrethojën, atëhëre policia e hapi portën. Mbyllja e portës ndaj deputetëve ishte kulmi i dhunimit të Kuvendit në veçanti dhe intitucionëve të tjëra në përgjithësi. Sigurisht që prapa këtij akti antidemokratik dhe antiligjor fshihet ministri Rexhepi. Edhe kjo ishte një shkelje tjetër e rëndë, ngase nuk mund të bëhet asnjë veprim policor në Kuvend pa kërkesën dhe lejen e kryetarit të tij.
Në mbledhjen e radhës së Kuvendit, ku pika kryesore e rëndit të ditës ishte rezuluta për ‘normalizimin’ e marrëdhënieve me Serbinë, policia kishte rrëthuar Kuvendin. Edhe kësaj here, policia nuk kishte marrë kërkesë dhe leje nga Kryetari i Kuvendit për një gjë të tillë. Kryetari i Kuvendit, Jakup Krasniqi, e ndërpreu seancën duke kërkuar që të hiqen të gjitha njësitë policore nga Kuvendi. Krasniqi e akuzoi publikisht Ministrin Rexhepi për praninë e madhe dhe të pa arsyeshme të policisë në Kuvend. Po të ishte kjo rezulutë që u sponzorizua nga PDK-ja dhe AAK-ja për të mirën e Kosovës, Qeveria nuk do të orvatej të jepte mesazhe të dhunës.
Ankesat dhe raportimet e qytetarëve për sjellje joprofesionale të policëve nuk merren seriozisht nga Inspektoriati i Policisë. Nga ky institucion që ka për detyrë monitorimin e sjelljeve të policëve, përkunder fakteve të shumta, deri më tani nuk kemi parë veprime konkrete që do të rezultonin me suspendimin apo largimin e policëve që kanë rënë ndesh me ligjin.
Policia e Kosovës duhet të jetë në funksion të sigurimit të ambientit të qetë dhe të zbatimit të ligjit, ashtu siç kërkohet nga Kushtetuta dhe ligjet në fuqi. Ndërhyrja e policisë për efekte politike, pashmangshëm do ta humb besimin e qytetarëve edhe ashtu të lëkundur në këtë institucion. Vendi i jonë ka nevojë për një polici profesionale, e cila është e aftë të luftoj krimin dhe dukuritë e tjera të jashëtligjshme. Por, kjo nuk bëhet derisa të kemi këtë Qeveri që e cënon dhe e tjetërson misionin e policisë.
