Pashtriku.org, 08. 01. 2015 – Ra ky ngërç (vdekje klinike) dhe u pamë: U tha nga ata që vodhën vota, jo në mënyrë industriale por në mënyrë artizanale (vendorët) por edhe nga ata “miqtë“ ndërkombëtarë që mbyllën sytë nga kjo praktikë e kodifikuar te ne u tha se zgjedhjet e 8 qershorit ishin më të mirat në Kosovën e pasluftës. Një konstatim të tillë e tha javën që shkoi edhe zonja e KQZ-së, Valdete Daka. Duket se të gjithë kishin arsye të lavdoheshin. Ata të artizanatit luftonin të mbesin në pushtet apo të vinin në pushtet. Ndërkombëtarët mbyllin sytë gjithmonë kur drejtësinë duhet ta sakrifikojnë për realizimin e projekteve politike e kjo ka ndodhur në 98% të rasteve pas përfundimit të luftës. Ndërkaq, zonja e KQZ-së duhej ta arsyetonte punën e saj dhe të ekipit që e drejton. Lindja kaloi mirë por i porsalinduri u desh të kaloi gjashtë muaj në inkubator shkaku se ishte në gjendje të një vdekjeje klinike (nga të mençurit u quajtë ngërç politik). Nuk thonë kotë se kur ka shumë mami gjatë lindjes i porsalinduri shoqërohet me difekte të shumta! Në një gjendje tensioni të lartë politik i cili me kohë u shndërrua në urrejtje ishte mashtrim të pritej se i porsalinduri do të ketë rritje dhe zhvillim normal. Për këtë arsye e tërë familja (shteti) dhe anëtarët e saj (qytetarët) e pësuan më së shumti ndërkaq që keqbërësit (politikanët) me një terpi dhe grykësi antologjike bënin përpjekej të mbesin në pushtet apo ta marrin pushtetin. Në korrik të vitit 1999, duke parë se shumica ishin interesuar ta merrnin grazhdin që e identifikonin si pushtet, çlirimtarët dhe “paqësorët“, Baca Adem tha se :”do të vijë një kohë dhe nuk do të mbetet kush pa u koritë“. Ngërçi politik apo vdekja klinike e shtetit që ishte vetëm arsyetim e një lufte të paskrupullt për grabitje (të mençurit e quajnë kapje të pushtetit) i hoqi të gjitha maskat madje edhe të atyre që maskimin e kishin shndërruar në artë të mbrojtjes së parimeve. I la cipricullak në aspektin njerëzor, kombëtar dhe moral ata që njerëzoren, kombëtaren dhe moralen e kishin bërë pjesë të kurikulave të të gjitha institucioneve arsimore, nga ai parashkollorë deri te mekanizmi për prodhimin e analfabetëve serialë i quajtur Universiteti “Hasan Prishtina“. U shkelën të gjitha parimet madje edhe ato që ishin deklaruar si të panegociueshme dhe u dhunuan të gjithë skrupujtë moral dhe amoral për vetëm një copë pushtet të cilin në fakt as që mund ta kenë. Sovraniteti i shtetit është i ndarë në sovranitetin absolutë që në Kosovë e kanë vetëm “miqtë“ ndërkombëtarë ndërsa sovranitetin absolusht gjithashtu edhe në vendet ku jeton një serb i vetëm e ka Serbia e përfaqësuar në Kuvendin e Kosovës nga Lista Srbska ndërsa në qeveri janë dy ministra që as gishtin e vogël nuk e kanë lëvizur për Kosovën e lëre më për serbët e vendit. Njëri u konvertua brenda ditës nga posllanik i Skupshtinës së Serbisë në ministër të qeverisë Mustafa 1 dhe Thaçi 3 sikur dikur UNMIK në EULESH (ndërrimi i shenjave identifikuese). Ai është Aleksandar Jabllanoviq i cili gjatë ngërçit politik u bë më i rëndësishëm se Barak Obama duke flirtuar me Thaçin dhe Ramushin. Që të dy kishin rënë në dashuri me Jabllanoviqin dhe e llogaritnin si ditë të humbur nëse brenda ditës apo natës nuk takoheshin me minstrin e konvertuar. Jabllanoviq aktualisht është në vend ku lehtë mund të vihet te euro me shumë zero, pa rrezik të përgjegjësisë edhe disiplinore e lëre më të kundërvajtjes apo penale. Është ministër i Ministrisë për Kthim dhe Komunitete post të cilit i kishte lakmuar edhe drejtori i Cess Manhatan Bank . Ministri tjetër u katapultua nga Republika Srbska në ministër të Pushtetit Lokal thuaja se në Kosovë nuk kishte serbë që do ta meritonin këtë post para tij dhe të cilët vërtetë janë angazhuar në mbrojtje të interesave të qytetarëve serbë të Kosovës duke u integruar në institucionet e Kosovës. Mirëpo këta, përkatësisht Sllobodan Petroviq dhe Nenad Rashiq u eliminuan nga Vulini dhe Daçiqi të ndihmuar edhe nga Mustafa dhe Thaçi në rastin konkret.
Loja e treshes 2015 (!!!) e dizajnuar nga “miqtë” e Kosovës!
PDK e fitoi luftën (zgjedhjet) por e humbi paqen (mundësinë për qeverisje si parti fituese). Ishin së paku një milion arsye pse ndodhi kështu Prandaj luftoi për mbijetesë dhe mbijetoi duke bërë koalicion me LDK-në. Thaçi e luajti rolin e De Golit. I përqau kundërshtarët dhe mbeti në pushtet . Postin e kryeministrit e ndau në dyshe duke u bërë Behgjet Pacoll (zëvendëskryeministër i parë ) dhe ministër për Punë të Jashtme (Lobim). Shqiptarët domosdoshmërisht duhet ta theksojnë i parë sepse i dyti llogaritet pozitë degraduese. Tash është në pritje që pas një viti të bëhet Atifete Jahjagë! E shohim! Do të jetë mision i…pamundur , duket ! PDK nuk u reformua ndonëse kjo është e vetmja mundësi faktorizimi në të ardhmën. PDK përbëhet nga ish krahu i luftës që llogaritet si pjesa më e fortë e saj ( na ishte dikur ) dhe pjesa tjetër që unë e quaj “barku i butë “ apo pjesa intelektuale e PDK e cila, varësisht nga situata do të zbutet edhe më shumë në të ardhmën deri të lirohet nga këto tri shkronja të partisë që nuk e kanë edhe aq shumë për zemër!
LDK humbi si subjekt politikë por fitoi Çeta e Elefantëve e cila përkohësisht, (vetëm përkohësisht) e devijojë rrugën për te Varrezat e Elefantëve. Elefantët janë gjitarë shumë inteligjent dhe të mençur e që fundamentalisht i dallon nga politikanët kosovarë! Elfantët, kur e vlerësojnë se janë bërë të padobishëm për komunitetin, bëhen varge vijë dhe shkojnë pas liderit të tyre drejt një vendi që më vonë shndërrohet në Varrezë të Elefantëve. Ata shtrihen aty dhe refuzojnë ushqimin hde ujin, deri në vdekje! Ndërsa, politiaknët kosovarë kur bëhen shumë të dëmshëm shpëtimin e tyre e kërkojnë dhe e gjejnë në poste politike që u siguron imunitet! Isa Mustafa nuk e pati konkurent të fortë Ramushin për postin e kryeministrit por ambasadorin Ian Cliff. Isaja e shpëtoi lëkurën por i dëmtoi kockat-skeletin (partinë). Isa Mustafa nuk e tradhëtoi askend sepse ai i përgjigjet vetëm elektoratit të LDK-së. Para këtij elektorati premtoi se do të bëhet kryeministër dhe u bë . Llogari e pastër kjo në politikë! LDK si parti vuan nga “sëmundja e pleqërisë“, me të gjitha simptomet dhe pasojat që e përcjellin. Nuk lejon hapësirë të mjaftueshme për gjeneratën e re sidomos në vendimmarrje prandaj edhe ka filluar plasaritje brenda kësaj partie me gjasë që të ndodhë një çarje e madhe. Mirëpo , edhe politikanët e rinj të LDK-së nuk po tregojnë vullnet dhe vendosmëri për tua marrë hapësirën për veprim dhe vendimmarrje Çetës së Elefantëve të parahistorisë politike!
Lëvizja Vetëvendosje e përsëritë legjendën për Kështjellën e Rozafasë në Shkodër. Çka ka ka ndërtuar për vite të tëra (parimet ) i rrënoi brenda një nate apo më mirë ta them një ndeje në mbrëmje me V-LAN-in duke shkelur mbi të gjitha parimet. Tash, përsëri u është kthyer parimeve pasi mbeti pa pushtet dhe për momentin po e bënë punën e Sizifit apo të Don Kishotit. Po mundohet ta rrokullisë gurin (proceset) drejt majave të bjeshkës (puna e Sizifit) e që nënkupton se po e bënë luftën kundër Mullinjve të Erës (si Don Kishoti). Do ta kenë shumë vështirë sikur që edhe Thaçi të bëhet president!
AAK është dhe mbeti parti që u ndërtua dhe mbahet vetëm në një shtyllë, në karizmën e liderit Ramush Haradinaj. Kohëve të fundit në AAK u fut si pykë edhe Blerim Shala e që Ramushi donte ta bënte shtyllën më të fortë të AAK-së. Realisht dhe historikisht, pyka kurrë nuk e luan rolin stabilizues por vetëm përdoret për (për) çarje! Sikur edhe Blerimi! Ramushi bëri shumë gabime në politikë dhe thuaja të gjithë e mashtruan. Si ato parti që e kishin për detyrë ta mashtrojnë ashtu edhe ato me të cilat donin ta ndërtonin një “qeveri të shpresës“. E mashtruan edhe brenda partisë duke u llaskucavë para tij (për interese krejt personale të mbijetesës dhe azilimit politik brenda AAK-së ) dhe duke u thirrur vazhdimisht në 100 e Ramushit. Disa prej nesh që e flisnim të vërtetën erdhëm në situatë që, ose të kërkonim azil në një shtet tjetër, ose të mbylleshim në shtëpitë tona pa vrarë askend. Nuk dinim kujt t’i drejtoheshim për të kërkuar besë. Tash, post mortem politikisht, Ramushi po e pranon se ka bërë gabime dhe se mendon ta reformojë partinë! Kjo i ngjanë sikur një tregimi kur një familje shumë e varfër dhe me shumë fëmijë vendosë tua ndërrojë brekët fëmijëve të tyre. Kështu, Xhumshiti me Xhevrijen urdhërojnë fëmijët e tyre që ditën e shtunë në ora 10 të gjithë fëmijët duhet të qëndrojnë në shtëpi sepse do t’i ndërrojnë brekët! Fëmijët e gëzuar, ditën e shtunë, në ora 10 ishin mbledhur në shtëpi dhe prisnin ndërrimin e brekëve. Atëherë, Xhumshiti urdhëron fëmijë t’i deshin brekët e pastaj…! Pastaj u thotë; Xhaviti le t’i veshë brekët e Xhevxhetit, Xhevxheti brekët e Ragipit, Ragipi brekët e Sandokanit dhe Sandokani brekët e…fëmiut të radhës! A po e bënë pikërisht Ramushi të njëjtën punë sikur Xhumshiti duke urdhëruar që Burimi t’i veshë brekët e Avnisë, Avnia të Besnikut, Besniku të Ahmetit, Ahmeti të Nitit dhe Niti të Brahimit e kështu me radhë ?! A mund të bëhen reforma me ndërrimin e brekëve të palara?! E pamundur për momentin. AAK po i paguan faturat e së kaluarës kur mungonte zoti i shtëpisë ndrsa minjtë hidhnin valle!
Nisma për Kosovën duket se mbërriti në fund ende pa u nisur mirë!
E ashtuquajtura shoqëri civile u koritë duke kontribuar shumë në ngërçin politik. Me dy fytyra dhe shumë fytyra tash po radhitet me fitimtarët duke i këshilluar se si të veprojnë në të ardhmën! Sikur që e kishin këshilluar koalicionin VLAN.
Ngjarjet që e shënuan vitin
Nuk jam i sigurt se korrupcioni që shpërtheu në EULESH mund të llogaritet si ngtjarje pasi që mosluftimi i korrupcionit ishte në mandatin e këtij misioni! Dhe, nuk do të ketë gjë prej kësaj pune. Lufta kundër ISIS-it në planin global ishte njëra nga ngtjarjet e vitit ku Kosova dha kontribut të çmueshëm duke e luftuar me mjete politike dhe policore. Deri sa Obama udhëhiqte operacionet kundër ISIS-it në planin global, në planin kombëtar ky operacion udhëhiqej nga presidentja Jahjaga, dhe kryeministri Thaçi.
Ngjarje e vitit ishte dekonspirimi i AKI-m së për kinse angazhimet në Siri nga ata që duhej ta mbanin gojën mbyllur si dhe përpjekja për pushkatim publik të këtij shërbimi i cili po i bënë hapat e parë drejt një shërbimi profesional dhe të domosdoshëm për sigurinë e vendit prandaj duhet të përkrahet nga të gjithë!
Ngjarje llogariten edhe fyerjet e rënda që i janë bërë Gjykatës Kushtetuese e sidomos kryetarit Enver Hasani, presidentes së vendit zonjës Jahjaga dhe kryesueses së Kuvendit në kohën e ngërçit politik zonjës Flora Brovina . Dikush edhe mund t’i mos quaj ngjarje sepse i konsideron si mënyrë normale e edukatës dhe komunikimit tonë politikë dhe intelektual. Ngjarje tjetër është edhe formimi i një institucioni të arsimit të lartë publik ku studentët nuk i nënshtrohen konkursit dhe provimit pranues por regjistrohen në bazë të listave që përpilohen në “rektoratin e “ e OVL-së së UÇK-së. Ishte lajmë jashtëzakonisht tronditës edhe largimi i Beratit, Shuaipit dhe Margarita quatro staggione nga radhët e PDK-së. Dhe, këtu përfundojnë ngjarjet për vitin 2014!
Parashikimet për vitin 2015
Kryeministrit Isa Mustafa i ka mbetur bomba e kurdisur në duar ndërsa siguresa është në duar të zëvendëskryeministrit të PARË dhe ministrit për punë të jashtme, z. Hashim Thaçi dhe nga ai do të varet nëse do të shpërthejë kjo bombë. Bomëa tjetër mund dhe sigurisht do të jetë edhe Gjykata Speciale që po formohet për dënimin e shqiptarëve (Gjykatë ku të dënuarit do të dënohen në baza etnike) për krimet e supozuara të UÇK-së (nuk më kujtohet se në UÇK ka pasur kinezë !!) dhe se bomba sociale është bombë e cila nuk ka sesi mos të shpërthejë! A do të jetë në gjendje që këtë situatë ta menaxhojë eksperti për mikrofinanaca dhe teknokrati i dëshmuar, kryeministri Isa Mustafa dhe sa kohë do të jetë kryeministër, mbetet të shihet! Mirëpo, është pak e besueshme që me mikro lëvizje, të shpresojmë se do të bëhen makro ndryshime. Megjithatë, shpresa është e përjetshme dhe e pavdekshme ndonëse thuhet se ajo megjithatë vdes e fundit ! Të shpresojmë se në vitin 2015 do të bëhet më mirë sepse siç pati thënë Azem Bejta në një rast, më m.. nuk bëhet! Urime, shëndet, paqe, lumturi dhe të gjitha të mirat në vitin 2015 për të gjithë ata që më duan, më duan më pak sepse nuk e besoj se ka të tillë që nuk më duan!
Behxhet Sh. SHALA – BAJGORA Prishtinë, 29 dhjetor 2014
***
SERBËT E VULINIT DHE KOSOVARËT E NASTRADINIT!
Lista e Serbisë dhe autonomia e Kosova dhe Metohisë: Kosova është një vend jashtëzakonisht interesant dhe i veçantë. Shqiptarët e quajnë Dardani , serbët e Vulinit por edhe disa të Thaçit e quajnë Kosova dhe Metohi, miqtë dhe ata miq në thonjëza e quajnë Kosovo ndërsa kosovarët me prejardhje shqiptare si dhe politikanët e konvertuar në kriminelë humanitarë dhe kriminelët të veshur me fuqi politike e quajnë Kosovë. Ndërkombëtarët, që na i njohin edhe zorrët në barkë (nuk duhet ndonjë inteligjencë e veçantë të na njohin), duke ditur se vuajmë nga kompleksi i të qenit intelektualë në përputhje me standardet ndërkombëtare, e kanë lancuar një shprehje mashtruese e ajo është se Kosova është rast sui generis. Këtë e kemi pranuar si vlerë pa e ditur fare kuptimin e kësaj shprehje e cila prodhon pasoja të dëmshme afatgjate sikur që kemi pranuar faktin se më tepër se 500 vjet dëgjojmë predikime fetare dhe i lutemi Zotit në një gjuhë që fare nuk e kuptojmë! Pra, Kosova është vend jashtë standardeve normale të përcaktuara për vendet normale ku zbatohen standarde të dyfishta, të trefishta dhe të shumëfishta! Në këtë kontekst , para zgjedhjeve të fundit në Kosovë u themelua një subjekt politik i quajtur Lista Srbska e cila fitoi 90 % të votave të serbëve të Kosovës, të serbëve të Serbisë që votuan në Kosovë , të serbëve të Libofshës së Shqipërisë , të atyre të Ukrainës, Bellorusisë, Libisë, Sirisë dhe Rusisë! Pa pasur nevojë fare për fushatë ata dominuan mbi serbët përkatësisht liderët e serbëve të Kosovës të cilët, që nga fillimi u angazhuan për Kosovën duke njohur dhe duke kontribuar për autoritetet dhe institucionet e saj. Si më të spikatur ishin Sllobodan Petroviqi dhe Nenad Rashiq të cilët u damkosën nga ekstremistët e Beogradit dhe të Mitrovicës. Në kohë të vështira morën përgjegjësi duke u përballur me rreziqe. Këta ishin kundër barrikadave fizike që në fakt për qëllim kishin betonimin e barrikadave etnike dhe politike sipas projektuesve ekstremistë. Lista Srbska ishte projekt politik dhe strategjik i Beogradit dhe Brukselit i cili i është imponuar Prishtinës pa të drejtë ndërhyrjeje edhe në planin teknik e lëre më përmbajtësor! Ata që e kundërshtuan këtë projekt ç’integrues u margjinalizuan politikisht dhe u demonizuan mediatikisht! U shpallën armiq të “miqve” që nënkupton diferencimin e lehtë sikur në kohën e kriminelit Josip Broz Titos dhe apostujve të tjerë të krimit jugosllavë dhe serbë që filluan me Rankoviqin, vazhduan me Sllobodan Millosheviqin dhe duket se nuk do të përfundojnë me Tomisllav Nikoliqin! Këtyre apostujve të krimit u ndihmuan edhe baballarët dhe majkat e atyre që sot janë sistemuar në të gjitha nivelet institucionale në Kosovë, mediave elktronike dhe të shkruara, shoqërisë civile dhe shërbimeve jashtëzakonisht të ndjeshme për sigurinë e qytatrëve të Kosovës. Këta sot llogariten si patriotë dhe ndërtues të paqes përkundër “kriminelëve“, katundarëve të UÇK-së, gjeneralëve të pashkolluar të luftës së fundit, ish të burgosurve politikë shqiptarë që nga viti 1945 e deri më sot, dhunuesve që e prishën miqësinë e përjetshme, komoditetin kumbarinë me Jugosllavinë dhe Serbinë etj., Nuk ka vend në botë ku janë sulmuar dhe sulmohen aq shumë ata që sakrifikuan ate që patën mundësi për lirinë e Kosovës. Fajin për këtë e kanë gjithssesi edhe një pjesë e kriminalizuar e çlirimtarëve pa kontributin e të cilëve nuk do të kishte sulme frontale dhe të paskrupullta. Në këto kushte nuk ka qenë vështirë të formohet dhe të fitojë hapësirë veprimi formacioni parapolitik dhe paramilitar i Vulinit në Kosovë me emërtimin Lista Srbska. Kjo listë nuk është aspak e interesuar të angazhohet për përmirësimin e kushteve ekonomike, sociale, kulturore dhe të tjera për qytetarët serbë të Kosovës por për zbatimin e agjendave ekskluzivisht politike të Beogradit duke mirëmbajtur gjendjen e tensionuar dhe duke ofruar radikalizmin përjashtues në vend të integrimit të serbëve që është edhe kusht i domosdoshëm për mbijetesën e tyre. Kështu siç janë duke vepruar po dëmtojnë strategjikisht intereset e serbëve dhe po nxisin një refuzim të shumicës absolute në Kosovë pa përkrahjen e të cilëve nuk mund të ketë integrim të serbëve, të shumicës shqiptare. Agresiviteti që në raste të caktuara mund të konsiderohet si arrogancë dhe shantazhim i kësaj liste shihet në kërkesat e parashtruara si kusht për t’u bërë pjesë e kabinetit qeveritar. Pastaj, Lista Srbska me liderin e saj i cili asgjë deri sot nuk ka bërë për qytetarët serbë të Kosovës, ka përjashtuar nga të gjitha postet pikërisht ata serbë që kanë pasur qasje integruese dhe kanë qenë konstruktiv siç janë Sllobodan Petroviq dhe Nenad Rashiq. Kjo tregon qartë se çfarë qëllime ka kjo listë.
Lista Srbska ka kërkuar dy ministry, ate për kthim dhe komunitete si ate të pushtetit lokal. Ministria për Komunitete dhe Kthim ka qenë eldorado për të gjithë ministrant sepse kanë pasur mundësi të shpërdorojnë mjete të shumta të ndara për kthimin e personave të zhvendosur (në radhë të parë të atyre serbë ) dhe të kenë imunitet të plotë nga përgjegjësia penale. Në një mënyrë janë trajtuar si staf ndërkombëtar shkaku se kanë qenë të paisur me imunitet . A do të përsëritet kjo dukuri edhe nën “ ministrin “ Jabllanoviq , mbetet të shihet. Do të dëshiroja të gaboj në vlerësimin tim.
Kushtëzimi në vend të bashkëpunimit: Ka qenë krejtësisht jonormale të pranohen kushtëzimet që i janë bërë Kosovës dhe që po i bëhen edhe sot , dje nga strukturat paralele ndërsa sot nga Lista Srbska për proceset e shtetndërtimit dhe fuqizimit të shtetit i cili ende është duke shkuar zhagas. Kushtëzimi për FAK-un, procesin e privatizimit, Republika Srbska në Kosovë është i papranueshëm për një vend normal. Qëllimi i këtij kushtëzimi është që të fuqizohet entiteti politik dhe etnik serb në Kosovë para arritjes së një marrëveshjeje përfundimtare për paqe midis Kosovës dhe Serbisë dhe ta fitojë një legjitimitet ndërkombëtar pas së cilave do të krijohej një situatë e përafërt me ate në Federatën Boshnjake! Duket se të gjitha rrugët po çojnç drejt , jo Romës por këtij entiteti politik dhe etnik . Këtu pastaj përfundon misioni i “ministrit“ Jabllanoviq dhe shigjetarëve të tij. Po, të presim edhe pak se proceset do të zhvillohen shpejt. Koalicioni aktual qeverisës ka për të kryer detyra , jo për shtëpinë por për komshinë!
Marrja në thua … e presidentes: Presidentja e Republikës së Kosovës znj. Atifete Jahjaga e mbajti fjalimin vjetor drejtuar qytetarëve të Kosovës para përfaqësuesve të tyre e ata ishin deputet e Kuvendit të Kosovës. Fjalimi ishte shumë objektiv dhe i strukturuar mirë! Nuk e kam të qartë pse opozita e lëshoi sallën e Kuvendit të Kosovës dhe deshi të arrinte me këtë largim në stilin e Sali Berishës ?! Po të ishin këta në pushtet sigurisht se nuk do ta lëshonin sallën e Kuvendit dhe krejt fjalë të tjera do të flisnin për presidenten . të kundërta me këto që i folën tani që nënkupton se opozita është hatruar shumë pse nuk u bë positë! Përkthyer në gjuhën shqipe kjo do të thotë se synimi i opozitës por edhe i pozitës nuk ishte shteti por pushteti!
Para se ta mbante fjalimin presidentja Jahjaga vetëm sa nuk u rrëzua. Jo nga Hashim Thaçi që pretendon ta zë karrikën e saj por mori në thua kur u përshëndet me ministrin Lutfi Zharku. Vetëm nuk e kam të qartë se a është kjo vërejtje për presidenten Jahjaga apo për ministrin Zharku?!
E pati PDK : Për shkak të dallimeve konceptuale, programore dhe zhvillimore PDK-në më parë e lëshuan Gëzim Kelmendi dhe Margarita Kadriu. Arsyetimi i tyre ishte se janë shkelur parimet dhe këta deputetë që njihen për integritet të lartë moral nuk kanë pasur mundësit jetër veç largimit. Këtyre deputetëve nuk u bëjnë fare përshtypje as postet ministrore apo poste të tjera se parimet i kanë të palëkundura. me 100 mijë vështirësi PDK e përballoi këtë tragjedi politike dhe vetëm sa nisi ta marrë veten u përballë me një situatë të ngjashme por duket të papërballueshme. Për shkaqe të njëjta me të parët, në mbrojtje të parimeve pra, dorëheqje të parevokushme nga të gjitha pozitat në PDK (ka pasur pozita të larta !!!) dhe nga grupi parlamentar u largua Shaip Muja, ariu i moçëm i PDK-së duke e sjellë këtë parti në situatë jashtëzakonisht të rëndë. Komenti im është; Zoti i ndihmoftë PDK-së e më shumë Shaip Mujës!
Behxhet Sh. SHALA – BAJGORA Prishtinë, 19 dhjetor 2014
………………………………………………………..
(Ilustrimin e përzgjodhi editori i pashtriku.org, sh.b)
