Tiranë, 16. 12. 2015: E lexova me vëmendje shkrimin e z.Anton Marku: “Mbrojtësit e republikës”, të datës 14.12.2015, te portali “Pashtiku.org”, i cili e nis këtë shkrim me fjalët: “Mund të mos pajtohemi..”, gjë që do të thotë se ai pranon debatin. Unë jam një prej atyre që nuk pajtohem në disa prej çështjeve që z. Anton trajton në këtë shkrim, ndaj dhe do të debatoj për disa çështje që ai trajton në të.
Së pari, nuk pajtohem me përkufizimin e tij për Vetëvendosjen: “Vetvendosje (VV) do duhej të ndjehet e lirë të përdorë por jo dhe të keqpërdorë demokracinë si mburojë për dhunë apo arsyetim për veprimet jopaqësore me qëllim të realizimit të synimeve politike. Më shumë se sa parti demokratike VV është duke u profilizuar në një grupim demo-kritik, i cili më komod ndjehet në rrugë se sa brenda institucioneve”.
Pse nuk pajtohem?
Sepse qëllimet politike të VV në këtë luftë politike që po bëhet në Parlament, lidhur me anullimin e dy marrëveshjeve antikombëtare të nënshkruara nga Isa Mustafa e Hashim Thaçi me Serbinë dhe Malin e Zi, nuk është luftë për interes partiak të VV, por është luftë në interes të Kosovës; është luftë jo vetëm në interes të banorëve të sotëm të Kosovës, por në interes të brezave të popullit të Kosovës që nuk kanë lindur akoma. Pra, lufta që po bën VV, edhe me gaz lotsjellës (që nuk është gaz helmues), është luftë për interesa kombëtare dhe jo partiake. Mund të themi me bindje të plotë, se është rasti i parë në historinë e pluralizmit politik shqiptar që forcat politike (VV, AAK, NISMA) vënë në plan të parë interesat kombëtare dhe jo interesat partiake, sikundër kanë bërë dhe po bëjnë të gjitha partitë e tjera plitike të të gjitha trojeve shqiptare.
====================================================
ANTON MARKU: MBROJTËSIT E REPUBLIKËS!
https://pashtriku.org/index.php?kat=43&shkrimi=4782
===============================================
Së dyti, VV nuk “po e keqpërdor demokracinë”, sikundër ju shpreheni, por po e përdor ashtu sikundër e pranojnë regullat demokratike, pasi gazi lotsjellës është një lloj pengese për të mos kaluar Rubikonin, dhe jo armë që vret. Nëse VV nuk do të kish penguar zhvillimin e seancave parlamentare për miratimin e dy marrëveshjeve të Qeverisë, (ajo e Zajednicës dhe ajo e Demarkacionit me Malin e Zi), ato marrëveshje do të ishin miratuar dhe nuk ka zot që nesër të anullohen, njësoj si dy marrëveshjet e Ahmet Zogut me qeverinë e Serbisë për Shën Naumin dhe disa fshatra të Vermoshit. Dhunë, nuk është gazi lotsjellës, i dashur Anton, por dhunë është nënshkrimi i atyre marrëveshjeve pa e ditur dhe pa e pyetur as parlamentin dhe as popullin. Kësaj i thonë: “Vet Ali, e vet Kadi”, që do të thotë, qeveria është edhe popull edhe parlament; ajo vetë vendos, e vetë vulos.
– A ia keni bërë pyetje vetes, zoti Anton, se pse i janë mbajtur fshehur parlamentit përmbajtjet e dy marrëveshjeve deri në momentin e nënshkrimit të tyre?
Besoj se edhe ju e dini që fshehtas bëhen vetëm vjedhjet, krimet dhe tradhëtitë, ndërsa politika e hapur, transparente, të nxjerr gjithmonë në dritë.
– A jeni në dijeni, z. Anton, që edhe për një pëllëmbë zhvendosje të gardhit në tokën midis dy vëllezërve janë vrarë e po vriten vëllai me vëllanë?
Vëllezërit vriten për një pëllëmbë tokë, e jo më shtetet për mijëra hektarë tokë.
– A e di ti, se luftrat midis shteteve bëhen për territore dhe vetëm për territore?
Nëse nuk e di, mësoje!
Si është e mundur që t’i hiqen Kosovës mijëra hektarë tokë dhe VV, dhe gjithë opozita, sipas teje, të mjaftohet boll me kritikën ndaj Qeverisë Thaçi-Mustafa dhe të na rrojë demokracia pluraliste!
Jo more!
Kësaj i thonë që të lejojnë qeverinë të bëjë si të dojë me territorin e Republikës së Kosovës.
Kjo quhet demokraci?!
Madje, nuk di nëse i ke ndjekur zhvillimet politike me fqinjët, meqenëse e trajton në shkrim, edhe vetë kryeministri i Malit të Zi, i shtetit të cilit i është falur ky territor i Kosovë, del në mbështetje të kërkesës së opozitës e thotë: “Prisni, bre burra, se jena kojshi! Ejani ta shohim se ndoshta është bërë gabim”. Dhe qeveritarët e Kosovës nuk duan që ta rishikojnë!
– A të bën ndopak përshtypje ky refuzim i qeverisë së Kosovës edhe ndaj kësaj thirrjeje të Malit të Zi?
Ky refuzim i qeveritarëve të Kosovës dhe i Kryetarit e dy Nënkryetarëve të Parlamentit të Kosovës, Haliti dhe Hamiti, edhe pas kësaj kërkese nga Kryeministri i Malit të Zi, të cilit i është dhënë dhurata, a të bën të të shkoi mendja se gjetkë duhet të flerë lepuri?
– A të bën të mendosh se mos vallë kanë bërë ndonjë proçkë tjetër dhe kanë frikë se mos u zbulohet?
– Kemi të drejtë të hamendësojmë, sepse na befason ky qëndrim i tyre alogjik, apo jo?
Këta ia dhurojnë territorin e Kosovës dhe ai u thotë: “Prisni, bre burra, se mos jeni ngutur dhe e keni gabim!”. Dhe këta i thonë: “Merre, se e dimë ne atë, e mos dëgjo opozitën dhe 200 mijë shqiptarët që u shkojnë pas.”
Nëse edhe ju, z.Anton, jeni edhe në këtë rast në mbështetje të qeverisë dhe kryeparlamentarëve, atëhere u kërkoj ndjesë.
Me një fjalë, për mua e keni gabim kur VV e cilësoni parti jodemokratike, por “grupim demo-kritik”.
– Mos vallë do të quajmë demonë edhe 200 mijë nënshkrimet popullore të marra prej tyre për referendum?
– Mos vallë duhet t’i quajmë demonë të së keqes edhe 20 mijë ish-luftëtarët e lirisë që janë me VV në këto dy çëshje?, përjashtuar disa drejtuesve të shoqatave të dala nga ajo luftë ngaqë po lëpijnë kockat e hedhura prej Hashimit dhe Kadriut. Unë flas për 20 mijët që luftuan me armë në dorë dhe jo për 60 mijët e vëna në lista si luftëtarë nga Hashimi me shokët e tij, për interesa partiake. Besoj se e kuptoni që edhe në këtë pikë kemi prej tyre vendosjen e interesit partiak mbi interesin kombëtar.
Së trei, ju shkruani se “Vendi ideal për këtë do të ishte Parlamenti.”
– Po mirë, a e dini ju se ata të opozitës, përfshi edhe z. Jakup Krasniqi kur ishte Kryetar i Parlamentit, kanë kërkuar disa herë që Qeveria të sqaronte Parlamentin për çka bisedonte në Vjenë me Serbinë, dhe Qeveria as që e ka vënë ujët në zjarr?
– A e dini ju që në të gjitha tekstet psikologjike e pedagogjike të të gjithë vendeve thuhet se kur metoda e bindjes nuk ia arrin qëllimit, atëherë hyjnë në fuqi metodat e detyrimit?
Dhe VV zgjodhi edhe detyrimin me gaz lotsjellës që të mos bëhet fakt i kryer tradhëtia; edhe detyrimin e daljes në rrugë, që juve nuk u pëlqejnë. As më thua, se cila rrugë i kish mbetur opozitës për ta bindur Qeverinë?
Së katërti, ju shpreheni: “Por definitivisht ai nuk është populli në emër tësë cilit po thirren secila prej tyre”.
– Po 200 mijë nënshkrime qytetarësh, a janë popull?
– Po 30-40 mijë kryeqytetas të grumbulluar dhe që duartrokitën opozitën në 28 Nëntor, a janë popull?
– A e dini ju se ditët e festave kombëtare qeveritë dhe Presidentët shpallin amnisti dhe jo urdhëra për arrestime?, dhe cilin arrestuan? Kryetarin e opozitës!
– Tashti, më thuaj, kush është dhe kush sillet si “demo-kritik”, qeveria apo VV?
– Cilën quani ju dhunë, daljen e popullit në rrugë në formën më të qetë, sikundër e pamë në 28 nëntor, apo arrestimin e kryetarit të opozitës dhe sjelljen e policisë ndaj manifestuesve më keq se policia e dikurshme e Millosheviçit?
Nëse jini edhe ju dakort me këto veprime të qeverisë së Kosovës, u kërkoj përsëri ndjesë.
– Po mijëra qytetarë të Gjakovës, Gjilanit dhe të Pejës që i janë përgjigjur deri tash thirrjes së opozitës duke “dalë në rrugë” (e kuptoj që kjo juve nuk u pëlqen), a janë popull?
– Po kuvendet komunale të disa komunave të Kosovës që me unanimitet kanë deklaruar se janë kundër këtyre marrëveshjeve të qeverisë, a përfaqësojnë gjithë popullin e atyre komunave, apo edhe popullsia e atyre komunave nuk quhet popull?
– Sipas botkuptimit tuaj, të shprehur në këtë shkrim, popull qenkanë vetëm deputetët marioneta të kryetarëve të partive, Thaçi e Mustafa!
Së pesti, ju sugjeroni që: “Në këto momente serioze, skenës politike kosovare, më shumë se asnjëherë më parë, po i nevoijtet një parti më pak serioze…”, që do të thotë se, këtë qeveri dhe këtë mazhorancë parlamentare marionetash, që miratojnë gjyqe ndërkombëtare për luftërat e lirisë, si dhe krijimin e një mini-shteti serb brenda në Kosovë e që i falin një pjesë të territorit të Kosovës shtetit fqinj, vetëm një opozitë dele, vetëm ajo mund t’i detyroi këta kalanderë të anullojnë këto vendime antikombëtare! Mos vallë nuk e keni rilexuar atë çfarë keni shkruar?!
Së gjashti, ju keni hedhur një tezë disi të çuditshme kur shpreheni: “Kosova është e vendosur në një territor, i cili pothuajse gjithmonë ka prodhur më shumë konflikte se sa periudha mirëbesimi mes banorëve të tij”. Sipas kësaj teze fajin na e paska territori, fushat, kodrat, gurët, drurët dhe pyjet e Kosovës dhe jo politikanët dhe qeveritarët e popullit shqiptar që ka jetuar e jeton në Kosovë (!!!). Mos vallë edhe qeveria aktuale, edhe ajo e Rugovës në vitet 1990, si dhe edhe Çubrilloviçi për faj të këtyre gurëve, drurëve dhe dhéut të Kosovës e shpikën dhe e nxitën shpopullimin e Kosovës nga shqiptarët përmes shpërnguljes me dhunë dhe emigracionit ekonomik masiv! Lutem, më ndihmo ta kuptoj.
Së shtati, nuk jam dakort edhe me shprehjen tuaj: “shqiptarët e Kosovës (dhe ‘‘kosovarët’’ tjerë, Sic!) nuk e parapëlqejnë ‘‘hapur’’ përdorimin e flamurit shtetëror nëpër gazmende familjare nuk do të duhej të nënkuptojë automatikisht se ata e urrejnë atë. Për më shumë, janë po ata të cilët me krenari përcollën valvitjen e tij në ndeshjet e reprezentacionit të Kosovës në futboll dhe ngritjen e tij në sukseset e karatisteve si Majlinda Kelmendi dhe Nora Gjakova, në pjesëmarrjen në Lojërat Olimpike të Evropës, në spotet muzikore të Rita Orës dhe të ngjajshme”. Gjë e mirë që e keni vënë re se shumica e shqiptarëve në Kosovë nuk e pëlqejnë zëvendësimin e flamurit kombëtar me një copë beze të propozuar nga të huajt. Kjo tregon se nuk i ka pyetur kush, ngaqë nuk e kemi referendumin në Kushtetutë, do të thonë Hashimi e Mustafa, apo jo? Gjithashtu kjo tregon se qeverisë së PDK-së, e cila sot është bashkëqeverisëse e Kosovës, nuk i ka ardhur e nuk i vjen për hosh që të pyesë popullin. PDK nuk e pyeti popullin as atëherë kur miratoi kushtetutën, as kur propozoi dhe miratoi këtë flamur e këtë himn, prandaj nuk e quan kërkesë të popullit 200 mijë nënshkrimet për referendum popullor si dhe tubimet e gjithë qyteteve të Kosovës. Dhe, ajo që është edhe më çudi se gjithë çuditë e këtyre dy partive, (PDK, LDK), është kur tellallët e tyre thonë se: “Nuk mund të organizohet referendum, sepse nuk e kemi në kushtetutë”. Edhe ju jeni dakort? Shumë bukur.
– Pse nuk e shtojnë në kushtetutë edhe nenin për referendum, kush i pengon, apo që do të votohet 100%?
Kur ky paralament kish të drejtë dhe kompetencë të hartonte dhe miratonte kushtetutën, miratoi edhe zëvendësimin e flamurit e të himnit kombëtar, pa e pyetur popullin, si ta merr mendja ty, ky parlament nuk ka kompetencë që t’i shtoi kësaj kushtetute edhe një nen për referendum?
Si ta pret mendja?
Nuk duan, jo. Se e dinë që marrëveshjet tradhëtare populli nuk ua miraton, sepse ka derdhur gjak duke luftuar në shekuj me atë flamur e me atë himn kombëtar. Apo këtyre dy partive dhe qeverisë së tyre, si dhe juve, u duken popull dhjetë apo njëzetë tifozë si dhe këto tre zonjat e nderuara, që ngrenë flamurin blu të Kosovës, kurse 200 mijë nënshkrimet për referendum nuk janë popull?
Dhe, së fundi, dua t’iu them edhe dy fjalë rreth asaj që ju shkruani: “Ndërkombëtarët ka kohë që na flasin në gjuhë të huaj. Por ata nuk e bëjnë këtë në gjuhën e të huajve, por të miqëve… Është fakt i pamohueshëm se nganjëherë ata kanë ditur që edhe të jenë të padrejtë me neve. E kjo nganjëherë nuk është tash”. Edhe për këtë kam mendim ndryshe nga ju. Edhe në këto tre rastet e përmendura antikombëtare, duhet ta dish që ndërkombëtarët nuk na flasin me gjuhën e mikut. Atyre nuk u bëhet gajle nëse sakrifikohet Kosova po qe se Serbia largohet jet e mot nga Rusia. Nëse nuk e ke kuptuar këtë gjë, pyet Hashimin dhe Isa Mustafën dhe ta shpjegojnë ata, pasi janë lojtarë të kësaj strategjie. Madje, ngaqë edhe Hashimi me Mustafën kanë këtë bindje, si dhe ju, prandaj duan të na mashtrojnë duke na thënë: “Këto janë marrëveshje ndërkombëtare dhe si të tilla nuk mund të anullohen nga ana e jonë”. Mirëpo këtë ose e thonë nga injoranca e tyre dhe e këshilltarëve të tyre, ose ua thonë “miqtë” ndërkombëtarë. Mësoje mirë ju dhe Hashimi me Mustafën, se marrëveshjet dy palëshe, (që në diplomaci thuhet marrëveshjet bilaterale), nuk janë dhe nuk quhen marrëveshje ndërkombëtare. Marrëveshje ndërkombëtare quhen kur marrin pjesë jo më pak se tre shtete të ndryshëm. Madje, edhe në konventat ndërkombëtare ku ke nënshkruar si shtet, ke të drejtë të dalësh prej tyre. Prandaj, të thashë që është mirë të pyesësh Hashimin dhe Isën se ata e dinë më mirë atë punën e “miqve” të huaj.
Dilaver Goxhaj – Tiranë, 16. 12. 2015
