KUDUSI LAMA: UÇK-ja, RAPORTI I DICK MARTIT DHE GJYKATA SPECIALE (V)

Pashtriku, 12 gusht 2020:
Çfarë kërkon Evropa nëpërmjet zotëri Martyt?
Çfarë kërkon zotëri Marty? Ai ka mundësi të jetë edhe i drejtë, por nuk ka dëshirë të jetë i tillë. Nuk dua të besoj se ai është politikan laboratori, që nuk kupton se si lëviz shoqëria njerëzore jashtë laboratorit të tij. Nuk kanë humbur vetëm serbë, kanë humbur dhjetë mijë herë më shumë shqiptarë. Siç duket, shqiptarët e humbur serbët i kanë marrë për t’ua ngrënë mishin e bluar kockat. E kjo nuk është problem për zotërin Marty, ndërsa shqiptarët i paskan marrë për t’ua grabitur disa organe jetësore. Kjo është shumë problem për zotërinë Marty. Çuditë nuk kanë të sosur. Sa mbaron një çudi, lind një e dytë.
Ka mundësi që nëse do të dalë edhe pas 50 vjetësh se dikush bën një veprimtari të paligjshme, do t’ia lidhin kokën në kohën e luftës. Kështu ndodhi edhe me një të quajtur klinika “Medikus” në Prishtinë, që doli diku nga viti 2008, se ishte krijuar për transplantime dhe kishte brenda punës së vet veprimtari kriminale, ku u aludua se udhëheqësit e Luftës Çlirimtare të Kosovës duhet të ishin njohur “patjetër” me pronarët e kësaj klinike që në kohën e luftës në mënyrë të fshehtë. Këto janë absurditete, që me të drejtë duhet të përbuzen e nuk duhet të merremi me ta. Por, ja që po na bëjnë dëm kombëtarisht e po na krijojnë probleme në arenën ndërkombëtare e kombëtare. Për këtë, duhet të ndalemi e t’i analizojmë këto ndodhi, për ta sqaruar sadopak opinionin për të vërtetën e këtij akti.
Duke shfletuar lajmet e kohës, pas daljes publike të raportit të Dick Martyt, kam lexuar se: “Gjykatësi i Bashkimit Evropian, Victor Paradal, ka kryesuar të enjten seancën dëgjimore për konfirmimin e akuzave të ngritura kundër shtatë kosovarëve, të dyshuar se janë pjesë e një rrjeti ndërkombëtar të përfshirë në trafikimin e organeve njerëzore.
Në seancën që u mbajt në Gjykatën e Qarkut në Prishtinë, prokurori i BE-së, Jonathan Ratel, ka thënë se “njerëz të varfër ishin sjellë në Kosovë nga vendet e jashtme, me premtime të rrejshme për të marrë pagesa për veshkat e tyre, organe këto të cilat pastaj u janë shitur pranuesve për transplantime të paligjshme”.
Ratel ka thënë se mjeku turk Yusuf Sonmez “ka qenë i përfshirë dhe është pjesëmarrësi kyç në operacionet” që janë bërë në një klinikë private në periferi të Prishtinës, e cila mban emrin “Medicus”.
Marrë në internet (http://www.telegrafi.com/?id=2&a=12208)
Është interesant fakti që nëse ka një veprimtari të tillë antiligjore, në Kosovë, siç ka edhe në gjithë vendet e tjera të Evropës e të botës, pse duhet të dilet politikisht në përfundime që nuk dilet juridikisht? A mban përgjegjësi ky njeri për atë që ka thënë? Si mund të vihet në bankën e akuzës ky njeri që mashtron duke hedhur baltë mbi një komb të tërë e gjithë historinë e tij?
Çfarë kërkon zoti Marty? A ka ai ndonjë farë ndjenje për vlerën e shqiptarëve? Çfarë ka studiuar deri tani për shqiptarët dhe historinë e tyre? A ka gjetur ky zotëri në kërkimet e tij që luftëtarët e UÇK-së të kenë vrarë ose zhdukur fëmijë, gra, pleq e plaka, të sëmurë nëpër spitale, qytetarë në rrugë etj? Po, janë vrarë ushtarë, pra janë vrarë burra, lufta zotëri Marty bëhet nga burrat e ata në luftë edhe vriten. Në luftë nuk bëhet dashuri, aty vriten njerëz luftëtarë në të dy anët e frontit.
Unë e di se Serbia është në agresion të pandërprerë kundër Kosovës e gjithë trojeve shqiptare. Por, pse, zotëri Marty të jetë luftëtar i këtij agresioni, këtë unë nuk arrij ta kuptoj.
Thuhet që le të hapet debat për këtë temë, mirë është, sepse do të ndërgjegjësoheshin ata që duan të ndërgjegjësohen se kjo shpifje është e pavërtetë. Ne jemi shqiptarë, edhe atë që na ka vrarë djalin e vetëm kur na ka ardhur në shtëpi e kemi marrë në mbrojtje. Kurrë nuk ka ndodhur ndër shqiptarë me marrë njerëz të gjallë, sado armiq e me i vra tinëzisht në shtëpinë tonë e në tokën tonë. Ky është një akt ligjor-zakonor që prej lashtësisë për shqiptarët. Edhe pa dashje kur ka vrarë një njeri në shtëpi të vet, shqiptari e ka braktisur atë shtëpi se nuk ka jetuar dot bashkë me gjakun e njeriut të derdhur në vatrën e tij. Ndërsa sot jemi nën vlerësimet e zotëri Martyt që po na ngatërron, po na ndynë, po na akuzon, për të përbaltur jo vetëm një fragment historik lavdie kombëtare, por gjithë traditën e këtij kombi.
Kjo çështje dihet që do të hulumtohet dhe do të kërkohet ballafaqimi me argumente për ta vërtetuar akuzën. Dhe shqiptarët institucionalisht janë deklaruar si popull i qytetëruar, se janë të gatshëm t’i nënshtrohen çdo hetimi ndërkombëtar. Për këtë edhe pa hezitim u pranua edhe ajo gjykatë ndërkombëtare që ka për mision ta njollosë UÇK-në. Por, a do të përfillen argumentet? Mbetet të shihet. Megjithatë shqiptarët duhet të kenë bindjen se djemtë e Luftës së Lavdishme Çlirimtare të Kosovës, sado të akuzohen do të dalin të pafajshëm, gjykata dhe të gjithë ata që fshihen pas saj do ta njollosin veten. Askush nuk do të mund të na nëpërkëmbë zakonet tona që na kanë sjellë udhëve të shekujve krenarë.
Megjithëse zakonisht, praktika ka treguar se sado që të ketë të vërteta, shpifja, në opinionin e gjerë publik dhe politik, është shumë e fuqishme. Ajo nuk shlyhet lehtë në opinion, pavarësisht se shlyhet ligjërisht. Ka raste kur një individ vihet nën akuzë si terrorist, por faktet tregojnë se ai nuk ka asnjë lidhje me akuzën e ngritur. Gjykata i jep pafajësinë, mund të marrë edhe dëmshpërblime, por në opinionin publik dhe politik ai mbetet një “terrorist”, a këtë po tentojnë të arrijnë akuzuesit me të akuzuarit prej tyre të luftëtarëve të UÇK-së? Më duket se po.
Po duhet ditur se, kur bëhet fjalë për përmasa të tilla, ku luhet me historinë e një kombi? Këtu çështja është shumë delikate. Këtu përpjekja duhet të jetë maksimale e të gjithë shqiptarëve për të vërtetën dhe të drejtën, pasi akuzuesit shkojnë me mendimin se: as që mund të mendohet, se do të ketë një pastrim të këtyre situatave, të mbingarkuara politikisht me shpifje nga më të rëndat, që i bëri me raportin e tij famëkeq zotëri Marty në emër të Evropës.
Zotëri Marty e ka ditur shumë mirë, se sido që të vijë puna, shpifjet e tij do të mbeten në agjendë të politikës evropiane për këtë periudhë të gjatë. Për këtë edhe lind pyetja: çfarë kërkonte të arrinte zotëri Marty? Një pyetje që as prej këtij zotërie vetë nuk mund të marrë përgjigje morale. Ajo mund të marrë vetëm një përgjigje të pa moralshme, që ka të bëjë me justifikime, apo shprehje dashurie për shqiptarët siç ka bërë edhe ky zotëri, për hatër të të cilëve është i gatshëm të bëjë sakrificën më të madhe e të përpiqet t’u njollosë historinë e t’u nëpërkëmbë lavdinë.
Qëllimi im nuk është t’i mbushi mendjen botës se zotëri Marty shpifi. Se këtë ata e dinë shumë mirë të gjithë. Por t’u them shqiptarëve që të mos vazhdojnë të marrin ngarkesa të tilla morale nga njerëz të tillë, që kanë marrë përsipër të bëjnë rolin e megafonit të armikut, megafonit të Serbisë, në kushtet e pasluftës, kur asaj i duhet më shumë se kurrë.
Por shqiptarët duhet të kenë një bindje që koha do ta vërtetojë kur kjo gjykatë të dështojë. Kjo bindje duhet të jetë që: periudha e krenarisë së tyre, epopeja e UÇK-së, është e dëlirë. Për këtë duhet të kenë bindje. Koha do ta vërtetojë këtë që u them.
Dihet që Serbia ka për qëllim të bëjë propagandë të shfrenuar për formimin e opinionit sa më negativ ndërkombëtar për shqiptarët dhe gjithë historinë dhe veprimtarinë e tyre. Dihet që të gjitha fajet e saj kërkon t’i eksportojë tek shqiptarët. Por kemi një histori të freskët krimesh të tyre, që është e dukshme për të gjithë ata që kanë sy e veshë. Pse pra nuk kanë dëshirë të shikojnë e të dëgjojnë të gjithë ata organe e organizata ndërkombëtare që kanë fuqi të marrim vendime, që ngrenë në këmbë një kundër shqiptarë të deklaruar si zotëri Marty? Çfarë kërkon ai kur të gjithë e njohin kundër shqiptarizmin e tij? Ku ka dëshirë të arrijë? A mos me ndërgjegje i bën deklarata të tilla? Nëse është kjo e fundit, ai meriton t’i kërkohet llogari. Realisht të tjerët si zoti Marty me akuza e shpifje, ndërsa ne me qytetari nuk ka balancim të të drejtës. Prandaj, nëse ky zotëri akuzon pa të drejtë, ne e kemi për detyrë t’i kërkojmë atij të japë llogari deri në një për çdo fjalë që nxjerrë nga goja. Ne nuk duhet të pranojmë edhe megafonët serbë nëpër Evropë, vetën pse ne duhet të sillemi si të kulturuar duke duruar marrëzinë. Duke menduar ne se nuk duhet reaguar për efekte kulture, bota po merr si të mirëqena shpifjet. Në raste të tilla nuk ka vlerë as qetësia prej të pafajshmi, as injorimi i shpifjes së neveritshme, ka vlerë e vërteta, për të cilën ne duhet të ndalemi e të mos lëshojmë pe. E vërteta nuk mund të jetë gjithnjë në anën e të fuqishmit. Ajo duhet të jetë me të drejtën dhe të pafajshmin.
Para disa kohësh kam shkëputur nga një shkrim këtë citim: “Nëse do të analizoheshin të gjitha shtrembërimet, shpifjet e botuara, të lexuara, të thëna takime kokë më kokë, sekrete apo publike, do të shihej se kundër nesh Serbia ka nisur një fushatë, që ka efektet e një agresioni. Faktori serb në këtë periudhë e vazhdon luftën kundër shqiptarëve me mjete tjera. Vazhdimi i kësaj politike, të një lufte të ftohtë, dëshmon se ata kanë qëllime të njëmendta armiqësore. Sa jemi të vetëdijshëm për këtë kanosje? Do të thosha me zhgënjim, aspak!”
Prandaj do të thosha se qëndrimet dhe veprimet me vlerësimet individuale të Martyt janë absurde, por të marra seriozisht nga organizatat evropiane dhe segmentet e ndryshme të klaneve proserbe ato bëhen shumë të dëmshme. Çfarë kërkon pra zotëri Marty? Kjo është e pakuptueshme për mua. Nuk arrij të arsyetoj një veprim të tillë, kur kam parasysh një njeri të shkolluar, që pretendon se është funksionar evropian, që flet në emër të Evropës, që pretendon se ka një vizion qytetarie, që ka mundësi të bëjë vepra të mira, por që me deklarimet dhe qëndrimet e shpifjet për të krijuar mostra shqiptare, kur realisht shqiptarët janë bërë viktima deri në ekstrem, nuk mund të gjendet arsyetim tjetër veçse të jetë i paguar i Serbisë, për ta rritur zërin e shpifjeve të saj.
Çfarë kërkon zotëri Marty?
Kam parasysh që gjatë luftës çlirimtare të Kosovës, kur ushtria serbe, policia e saj, paramilitarët e kriminelët dhe të uniformuarit nga popullata civile serbe në Kosovë, meqenëse nuk ia dilnin të përballeshin me luftëtarët e lirisë, bënin masakra nga më monstruozet mbi popullatën e paarmatosur, deri tek ne vinin gazetarët e stacionit televiziv “EURO NIWZ”, të cilët, megjithëse merrnin informacion shumë të pasur e të saktë, duke u pritur me shumë respekt, pasi donim të jepej sa më mirë e vërteta, ata kur shkonin në televizionin e tyre, jepnin informacione nga më të pakuptimtat në ballafaqim me të vërtetën, që kishin marrë te ne. Të befasuar nga ky qëndrim, kërkuam të dinim se pse ndodhte kështu dhe pamë se në redaksinë e këtij stacioni televiziv kishte një redaksi të veçantë për Evropën Juglindore dhe në këtë redaksi ishin kryeredaktori dhe një redaktor serb e një redaktor grek. E kuptuam se ky televizion nuk mund të jepte tjetër informacion përveç atij që jepte. Por zotëri Martyn nuk e kuptoi, sepse ai nuk është serb. Pse pra ai merr përgjegjësinë e shpifësit, çfarë kërkon ai?
Të gjithë i dinë shkaqet e luftës në Kosovë. Vetëm serbët e Serbia nuk duan t’i pranojnë ato shkaqe. Sepse ata nuk e konsiderojnë të përfunduar luftën. Ata po të kenë mundësi i bëjnë edhe një herë krimet që kanë bërë për një shekull. Ata thjesht bëjnë analiza, për të gjetur ku kanë gabuar, që nuk kanë arritur t’i zhdukin plotësisht shqiptarët në trojet e pushtuara. Po zotëri Marty pse, a është vërtet edhe ai i mllefosur për këtë?
Dikush ka mendimin se ne duhet të rrimë e të dëgjojmë, por të mos reagojmë. Ndërsa unë mendoj se mosreagimi është verbëri, ne nuk kemi të drejtë të jemi të verbër. Megjithëse jemi mësuar me shpifje prej kohëve të hershme, kur prej serbëve jemi quajtur njerëz me bisht, turq, pastaj irredentistë, komunistë, fundamentalistë, kriminelë, kontrabandistë armësh e droge, si dhe në fund edhe trafikant qeniesh njerëzore e të organeve jetike të tyre. Këto i arsyeton, i vërteton dhe i propagandon edhe zotëri Marty pa asnjë arsye, pa nevojë, por me gjakftohtësi evropiane dhe me fuqi evropiane. Ai nuk ka asnjë provë, por etiketimet i bën sikur duket se ka shërbyer vërtetë si transportues i këtyre organeve njerëzore. Dhe kjo mund të ketë të vërtetë, sepse zakonisht ne nuk jemi akuzuar asnjëherë për diçka që ka qenë e panjohur. Gjithçka është kryer nga serbët dhe ajo përvojë është eksportuar te shqiptarët. Nuk mund të besoj se zotëri Marty nuk e di këtë. Prandaj edhe duke e ditur se nuk është serb vazhdimisht më rri në kokë pyetja: Çfarë kërkon zotëri Marty? Ai para se t’i deklaronte fajtorët, do të ishte mirë të kishte takuar shqiptarët në vendet që i konsideron të ngjarjes. Nuk arrij ta kuptoj logjikën e këtij zotërie që lëshon një lumë akuzash në emër të Evropës pa asnjë verifikim por, thjesht, me thashetheme serbe. Realisht ky zotëri me ato që deklaron u ngjanë atyre që, meqenëse nuk dinë çfarë të bëjnë, merren me thashetheme për të tjerët, pa arsyetuar fare për rrjedhojat. Kjo është metoda serbe: akuza pa argumente dhe torturë mbi të akuzuarin ta pranojë fajin.
Sa keq që në hetimin e Gjykatës Speciale për “krimet” e UÇK-së nuk do të ketë disa hetues serbë që ta bënin hetimin mbi të akuzuarit, siç janë mësuar ta bëjnë ata. Do të ishte mirë që organet politike evropiane t’i rekomandonin kësaj hetuesie t’i merrte disa të tillë.
Nuk kanë pse ruhen këto gjykime nga politizimi pasi provat i kanë dhënë që veprojnë sipas dëshirave dhe interesave politike, veç jo evropiane, por serbe. Këtë e vërtetoi më së ploti deklarimi para juridik i akuzës për presidentin e Kosovës dhe ish-kryetarin e Kuvendit të Kosovës, vetëm për të mos e lënë të ishte përballë serbëve në Uashington.
Prandaj, edhe po mori kjo gjykatë disa hetues serbë, do të bëjë mirë, se është e vetmja gjë që akoma nuk e ka bërë për interes të serbëve e Serbisë. Kështu do të siguronin që gjithçka të ishte e pranuar sipas dëshirës së hetimit, nuk do të kishte nevojë më për afate verifikimesh, por menjëherë vihen etiketat e kriminelit dhe kryeni punë. Sa e turpshme.
Ka kaluar një kohë e gjatë prej deklaratave shpifëse dhe akuzuese të Dik Martyt. Askush nuk ka vërtetuar asgjë. Të gjithë ata që kanë ndërmarrë fushatën bashkë me brigadierin Marty, kanë heshtur. Akuzat shpifëse kanë mbetur. Ky vërtet ishte qëllimi i këtij zotërie? Këtë kërkonte ai? Që, thjesht, të hidhte disa shpifje për ta nxirë portretin kombëtar shqiptar?
Por nuk është një episod kjo pamje e zotëri Martyt. Ai është portretizuar si kundërshqiptar e proserb edhe në momente të tjera. Ja si flet ai para mediave zvicerane në vitin 2008, intervistë të cilën gazeta “Epoka e re” në Prishtinë e boton më 24 dhjetor 2010: “Shumica e vendeve nuk e kanë njohur Kosovën dhe nuk do ta njohin atë”.
Duke vlerësuar goditjet e NATO-s mbi Serbinë në vitin 1999, ai thotë: Këto ishin veprime agresive të paligjshme.
Nuk është e vërtetë se serbët nuk duan të lëshojnë asgjë.
Por na është thënë: “Kosova është e ndryshme. Ajo është viktimë e abuzimit nga ana e Serbisë”. Unë konstatoj se Kosova është administruar prej dhjetë vjetësh nga bashkësia ndërkombëtare dhe se pas dhjetë vjetësh ekonomia e Kosovës është inekzistente. Ajo është bërë një qendër e krimit të organizuar, trafikut të drogës, trafikut të armëve, trafikimit të qenieve njerëzore. Vihet re se nuk ka shoqëri të mirëfilltë civile, që të jetë në gjendje për të drejtuar institucione të vërteta demokratike dhe ka minoritete të ndryshme që jetojnë të mbrojtura nga ushtarët ndërkombëtarë.
Ne kemi paraqitur Ushtrinë Çlirimtare të Kosovës (UÇK) sikur të ishte një organizatë virgjëreshash bamirëse”. (Gazeta “Epoka e re”, e premte, 24 dhjetor 2010, faqe 6).
Më duket se zotëri Marty ka treguar vetë se ç’mision ka. Ai na garanton se shumica e vendeve nuk kanë për ta njohur kurrë shtetin e Kosovës. Ai i vë etiketën e agresorit NATO-s që ndërhyri në Kosovë në mbështetje për shpëtimin e shqiptarëve në vitin 1999. Duhet të jenë të qartë të gjithë se të tillë NATO-n e ka vlerësuar vetëm Serbia. As Rusia që është mëma e Serbisë nuk e ka thënë këtë. Zotëri Marty po.
Zotëri Marty na tregon se ne nuk kemi asnjë perspektivë jetësore në Kosovë. “Edhe pas dhjetë vjetësh ekonomia e Kosovës është inekzistente. Ajo është bërë një qendër e krimit të organizuar, trafikut të drogës, trafikut të armëve, trafikimit të qenieve njerëzore. Vihet re se nuk ka shoqëri të mirëfilltë civile, që të jetë në gjendje për të drejtuar institucione të vërteta demokratike dhe ka minoritete të ndryshme që jetojnë të mbrojtura nga ushtarët ndërkombëtarë”. Vetëm se nuk thotë se duhet kthyer me të shpejtë në gjirin e Serbisë që të mund të shpëtojmë. Pra, duket se çfarë kërkon zotëri Marty. I vështirë ky mision për ju zotëri.
I rëndë jeni zotëri Marty, të rëndë e keni mendimin. Nuk gjej dot etiketë për ju. Por mund të them se asgjë nga ato që deklaroni e dëshironi ju s’keni për të gjetur e s’ka për të ndodhur, se ne e meritojmë lirinë, e meritojmë shtetësinë e meritojmë të ardhmen se jemi komb i lashtë që i kemi dhënë shumë Evropës dhe botës histori dhe lavdi. I mjeri ti o zotëri Marty, që ke rënë në këtë kurth serb ose je paguar për të bërë çka bën, i mjeri ti, haje shpërblimin se historia ka për të të vënë vulë turpi.
Megjithatë, është parë se material mediave, analistëve, gazetarëve, politikanëve, llafollogëve u ke dhënë mjaft. Ata nuk po ndalen dhe po të adresohen çdo ditë ty dhe çfarë polli raporti yt. Të papërgjegjshmëve, atyre që nuk e dinë ku e kanë atdheun, atyre që u dhemb vetëm po t’i pickosh në krahun e tyre, atyre që dinë vetëm një emër – emrin e tyre, atyre që nuk kanë investuar as edhe një shikim apo fjalë të mbarë për të ardhur në këtë ditë të lirisë ku jemi, atyre që kanë ikur nga sytë këmbët kur ishin ditët e vështira, atyre që kishin simpati për pushtuesin, atyre që ishin bërë vegla të pushtuesit kundër vendit të tyre, atyre më në fund që janë me mision, u ke dhënë guxim, ata e kanë hapur gojën si shpellë, për të miratuar ato që keni “zbuluar”, a ky ka qenë edhe qëllimi juaj?
Në mjerim të madh ke rënë, o zotëri! Të ka mbetur raporti në dorë. Asgjë nuk mund të gatuhet me raportin tënd. Vetëm fjalë. Ani pse ngrihen edhe gjyqe për t’i akuzuar luftëtarët e lirisë. Por ty duket se të vjen shumë keq nëse është ndëshkuar ndonjë serb a bashkëpunëtor i tyre që ka bërë krime nga më të paimagjinueshmet mbi popullin e Kosovës e trojeve të tjera nën ish-Jugosllavi. Nëse këtë ke kërkuar, këtë dhembje e ke shprehur me mjaft forcë. Të lumtë!
Po përse more zotëri Marty, ti dje ashtu si edhe gjykata sot, të “zhdukurit”, ashtu si edhe “dëshmitarët” i ke pa emra? Cila është vlera e fshehjes së identitetit të tyre? Apo, thjesht, duhet vërtetuar se ju keni të “drejtë”. E drejta fitohet ballë për ballë, kurrë duke u fshehur zotëri.
Ju kërkoni të vërtetoni se “dëshmitarët” tuaj i kanë parë në Kukës, Hashim Thaçin, Jakup Krasniqin, Fatmir Limajn, Agim Çekun, Kadri Veselin, Azem Sylën, Sabit Gecin, Milaim Zekën, Bedri Halimin, Xhemshit Krasniqin e luftëtarë të tjerë. Disa edhe mund t’i kenë parë, se ata kanë qenë publikë në popull, sa herë kanë dashur të komunikojnë me popullin e tyre dhe t’i marrin masat e duhura për t’i lehtësuar vuajtjet e tyre që Millosheviqi me bashkëpunëtorë si puna juaj u kishte privuar të drejtën të qëndronin në shtëpitë e tyre. Por kurrë nuk i kanë parë duke u fshehur, apo duke bërë punë që nuk ishin në funksionin e tyre në shërbim të Luftës Çlirimtare e të popullit të tyre.
Ata kurrë nuk e kanë ulur veten, as nuk do ta ulnin deri në atë shkallë sa të merrnin në pyetje një të burgosur edhe sikur të kishte të tillë, siç po pretendoni, sepse ata ishin personalitete dhe nuk kishin kohë me bërë veprime të tilla të rëndomta. Ju a e kuptoni çdo të thotë personalitet? Besoj se nuk e kuptoni. Besoj se ju do të bënit veprime të tilla derisa mendoni dhe shkruani se personalitetet mund të merren me veprime të tilla banale. Jo zotëri, nuk ia ke qëlluar – thonë këtej nga ne. Ne e nderojmë shumë personalitetin, nuk e bëjmë kurrë personalitetin me llum. Nuk e di si e keni ju andej nga Evropa, apo më fal, nga Zvicra – se prej andej më kanë thënë se jeni. Nga ne burrat e mëdhenj, siç ishin ata që përmendi ju, merren vetëm me punë të mëdha. E punë të mëdha në atë kohë ishin udhëheqja e luftës kundër Serbisë, bashkëpunimi me NATO-n dhe kujdesi i shtuar për popullin në vuajtje të tejskajshme.
Por ju që keni marrë përsipër një mision siç duket nga shërbimi sekret serb, kuptohet që i keni të qarta detyrat që ua kanë vënë. Të njollosni gjithçka që lidhet me Luftën Çlirimtare të Kosovës, Ushtrinë Çlirimtare dhe udhëheqësit e saj më të spikatur. Me sa kam kuptuar, vetëm kaq kërkoni ju zotëri Marty dhe e nderuara Gjykatë Speciale, asgjë tjetër. Ju siguroj se do të dështoni. Shqiptarët tashmë janë mësuar me akuza të tilla, se kanë 100 vjet që u bëhen. Po ju zotërinj, pse jeni kaq i mllefosur? Apo në emër të “drejtësisë”, që duket se, sipas instruksioneve serbe, i shërbeni mjaft mirë.
Prokurori serb i Krimeve të Luftës, Vladimir Vukçevic, pati deklaruar publikisht se ekipi i tij hetues ka qenë një burim i rëndësishëm për zotërinë Marty.
Po mirë more zotëri Marty, kur e more raportin prej këtij zotëri prokurorit të Serbisë, nuk i the që të mos e nxjerrë sekretin publikisht? Keni gabuar rëndë se ua ka nxjerrë bojën. U ka vënë në sytë e gjithë botës si riciklues të propagandës së vazhdueshme të qarqeve serbe, që dihet se nuk ia duan të mirën Kosovës dhe qytetarëve të saj. Po pse more zotëri bëni kaq përpjekje t’i njollosni të gjithë shqiptarët në shtëpinë e tyre në Ballkan? Çfarë kërkoni more zotëri?
Deklaratat tuaja në raportin e publikuar, zotëri Marty, kanë vetëm një vend, analizën e tyre para gjyqit. Realisht, ju ose duhet t’i gjeni fajtorët, ose duhet të shkoni në gjyq. Drejtësia është thënë – është drejtësi për të gjithë. Pra, edhe për ju zotëri. Me këto akuza që për mua jeni një vazhdues i turpshëm i krimit serb mbi shqiptarët, ju ose duhet t’i zbuloni të gjitha ato që deklaroni, ose duhet të zini vend në burg, si i dëmshëm për demokracinë evropiane e botërore. Gjykata Speciale duhet të bëjë drejtësi.
VIJON …
_____________
KUDUSI LAMA: UÒªK-ja, RAPORTI I DICK MARTIT DHE GJYKATA SPECIALE (IV)
https://pashtriku.org/?kat=43&shkrimi=10361