Durrës, 26 shkurt 2019: Këtë si pyetje po ia drejtoj të gjithë atyre dhe sidomos politikanëve e pushtetarëve, si p.sh. Presidentit të Kosovës H.Thaçi dhe Kryeministrit të Shqipërisë E.Rama, pseudohistorianëve e pseudopatriotëve “intelektualë” e “mediatikë” si dhe atyre që tradhëtisht hapur e tinëzisht janë për “shkëmbim territoresh” e “ndryshim kufijsh”, të cilat çojnë në ndarjen e Kosovës. Nuk e di se çfarë kuptojnë ata me shkëmbim territoresh!?
A mund të ketë shkëmbim territoresh midis shteteve pa u ndarë pjesë të territoreve të tyre të cilat do të shkëmbeheshin?!
Sepse të deklarohesh për ndryshim kufijsh dhe për shkëmbim territoresh dhe të deklarohesh se nuk je për ndarje të Kosovës kjo është injorancë e jashtëzaskonshme, më sakt kjo përbën tradhëti të maskuar me mashtrim, djallëzi dhe me hipokrizi. Serbia e pushtoi Kosovën në vitin 1912 me ndihmën dhe aprovimin e Rusisë dhe të Europës, e pushtoi Kosovën për Veriun e Kosovës dhe e shfrytëzoi atë dhe pasuritë e saj për 100 vite. Edhe në luftën e fundit në Kosovë, Serbia kishte si qëllim final të saj Veriun e Kosovës, pasi nëse Serbia do ta kishte Veriun e Kosovës nën administrimin e saj siç i kishte dhe siç i ka akoma Preshevën, Medvegjën e Bujanocin mendoi se nuk do të ishte bërë luftë në Kosovë. Kjo pasi Serbia e Millosheviçit do ta donte vetëm Veriun e Kosovës ashtu sikurse edhe pasuesit e sotëm të tij. Pra Serbia e sotme dhe madje edhe Rusia, do ta njihnin menjëherë Pavarësinë e Kosovës nëse Serbia do të arrinte për të marrë Veriun e Kosovës.
Pra, nëse Serbia merr territoret dhe burimet jetike ujore, ekonomike dhe thesaret e pasuritë minerale të Kosovës që janë në Veriun e Kosovës, pra, nëse Serbia arrin që të marrë Veriun e Kosovës në këmbim të njohjes prej saj të Pavarësisë së Kosovës, atëhere pse u bë edhe Lufta, dhe çfarë kuptimi do të kishte edhe shtetësia e pavarësia e Kosovës pa Veriun e saj.
Popullsia, territori, pasuritë tokësore, nëntoksore dhe ujore, pozicioni gjeostrategjik dhe ekonomia janë thelbësoret për mbijetesën, ekzistencën dhe për zhvillimin e një shteti kombëtar.
Pra, në asnjë mënyrë nuk duhet jo vetëm lejuar por as nuk duhet biseduar, jo vetëm me serbët por as edhe me asnjë ndërkombëtarë, qoftë ai edhe aleat i shqiptarëve për ndarje të Kosovës ,apo sikurse flitet për shkëmbim territoresh. Serbia po mori Veriun e pasur të Kosovës edhe mund ta njohë pastaj Kosovën, edhe Kosova pa Veriun e saj po të bashkohet pastaj me Shqipërinë nuk e shqetëson më as ky fakt Serbinë sepse: kështu Serbisë i jipet mundësia për të formuar Serbinë e madhe brënda së cilës do të ishte edhe Veriu i Kosovës por edhe gjysma e Bosnjës, sepse: po u nda Kosova dhe po mori pjesë të saj Serbia atëhere Serbisë i lind e drejta që të marrë edhe Republikës serbe të Bosnjes, pra do të realizohej Serbia e madhe pikërisht ajo çfarë kishte synim edhe Millosheviçi.
Dhe kjo do të ishte humbje e madhe për shqiptarët, por edhe një diskreditim e dështim edhe për perendimin nëse ata e lejojnë dhe e pranojnë këtë projekt serb, atë të formimit të Serbisë së Madhe.
Sot sovraniteti dhe pacënueshmëria e territorit të Shtetit të Kosovës po kërcënohen nga Serbia, e cila po përdor të gjithë arsenalin dhe kapacitet ekonomike, politike e diplomatike për ndarjen e Kosovës. Në mbështetje për këtë qëllim Serbia ka edhe shtetet e fuqishme si, Rusinë e Kinën por, edhe eksponentë të lartë nga BE si ndërmjetësuesja e BE-së në bisedimet Kosovë-Serbi Federica Mogherini, e cila tashmë është vertetuar se mbështet Serbinë.
Është fat i madh për Kosovën dhe për të gjithë shqiptarët që sot Kosova ka Kryeministër z. Ramush Haradinaj, i cili kundërshton çdo përpjekje që bëhet për ndarjen e Kosovës, kundër të gjithë atyre që përpiqen për coptimin e saj, pavarësisht se nga vijnë dhe kush janë ata; kundërshton edhe qëndrimet e “çuditshme” edhe të Presidentit Thaçi si dhe të kryeministrit të Shqipërisë E. Rama, të cilët janë indirekt për ndarjen e Kosovës me deklarimet e tyre për “korigjim kufijsh” apo shkëmbim territoresh.
Nuk besohet dhe as nuk mund të justifikohet e të merret seriozisht as qendrimi i Partisë Demokratike dhe as ai i Sali Berishes të cilët deklarohen se janë kundër korigjimit të kufijve, pasi është akoma i freskët deklarimi i ish ministrit të Jashtëm të Shqipërisë, Besnik Mustafaj i ish qeverisë Berisha, i cili, në prag të Shpalljes së Pavarësisë së Kosovës deklarohej për një “Pavarësi të Kushtëzuar”, sipas së cilës legalizohej një shtet “kishtaro-ortodoks” serb brënda Kosovës dhe u jipej komunave serbe e drejta e vetadministrimit dhe e vendimmarrjeve. Pra “Pavarësia e Kushtëzuar”e përkrahur nga ish pushteti i Partisë Demokratike, legalizonte formimin e një minishteti serb brënda Kosovës.
Kjo orvajtje antishqiptare dështoi sepse Pavarësinë e Kosovës e siguruan SHBA dhe aleatët e saj, të cilët e çliruan Kosovën por edhe e njohën brënda ditës Pavarësinë e saj, ashtu sikurse është e destinuar që të dështojnë edhe projekti serb i sotëm për ndarjen e Kosovës, projekt i cili fatkeqësisht ka gjetur “mirëkuptim” edhe te disa politikanë e pushtetarë të lartë shqiptarë.
Pra ashtu sikurse para Pavarësisë së Kosovës, standarti i “Pavarësisë së Kushtëzuar”, dhe tani projekti për “shkëmbim territoresh “ apo ndarja e Kosovës janë projekte e plane të kishës dhe të akademisë serbe dhe plane shtetërore serbo-ruse, por që të dyja këto kanë gjetur mbështetje te politika zyrtare e Tiranës, si atëhere nga ish pushteti PD-ist për Pavarësinë e Kushtëzuar, ashtu edhe sot plani për shkëmbim territoresh nga Kryeministri Rama, i cili arrin deri edhe në oferta banaliteti ku i quan gomarë të gjithë ata të cilët janë kundër Presidentit të Kosovës që kërkon shkëmbim territoresh. Politika e Tiranës asnjëherë nuk e ka pasur seriozisht shqetësimin per Kosovën, as per çështjen kombëtare të Bashkimit shqiptar, por politika e Tiranës kur është në opozitë dhe kur pozita që ka pushtetin kur e shikon se pushteti në Shqipëri po i lëkundet, atëhere dhe vetëm atëhere politika dhe politikanët shqiptarë kujtohen e deklarojnë retorika “patriotike” dhe “Kosovëdashëse”.
– Autori është veteran i UÇK-së
