LËVIZJA POPULLORE PËR REPUBLIKËN E KOSOVËS (LPRK) ME ADRESË DHE XHAFER SHATRI
Nga Sheradin Berisha, Pashtriku 6 shkurt 2023
Më 3 shkurt 2023 historiani Metush Zenuni (Metë Dura), autor i librit: “L ËVIZJA POPULLORE E KOSOVËS 1982 – 2002, Prishtinë 2021”, në rrjetin e tij facebook ka hapur një temë për diskutim, duke ilustruar edhe me një citim (faksimil) të një komunikate të poublikuar nga LPRK më 1 tetor 1990:
Metë Dura shkruan:
“Athua, a do te kishte UÇK, po të vepronte LPK-ja e vërtetë, ashtu siç veproi fraksioni i Hasan Malës e Xhafer Shatrit, përmes një Komunikate të tyre më 01 tetor 1990?!
***
Me këtë rast kam marrë pjesë në diskutim dhe kam shkruar në vijim:
NJË SQARIM!
Sheradin Berisha
I nderuari Metë Dura
Është e vërtetë se faksimili që ke sjellur këtu është i shkëputur nga KOMUNIKATA E “LËVIZJA POPULLORE PËR REPUBLIKËN E KOSOVËS” (LPRK-së) i lëshuar më 1 tetor 1990.
Në vijim faksimilin tuaj e sjellë të shkruar:
“Sot kur gjithë populli ynë është bashkuar në LIDHJEN DEMOKRATIKE TË KOSOVËS për një grimcë demokraci, për një grimcë liri, për një grimcë jetë, LËVIZJA POPULLORE PËR REPUBLIKËN E KOSOVËS vendos t’i bashkohet LIDHJES DEMOKRATIKE TË KOSOVËS”.
– LPRK, për nëntë vite rresht luftoi pandërprerë për konsitituimin e Republikës së Kosovës në kuadër të Jugosllavisë, e cila u bë realitet më 2 korrik të këtij viti, prandaj LËVIZJA POPULLORE PËR REPUBLIKËN E KOSOVËS pushon aktivitetin e saj dhe vendos të bashkohet në LIDHJEN DEMOKRATIKE TË KOSOVËS për të bërë të mundshëm funksionimin sa më të shpejtë të REPUBLIKËS SË KOSOVËS.”
***
Kjo Komunikatë është e Këshillit të Përgjithshëm të LPRK-së me adresë (në Biel Bienne). Është përpiluar nga kryesia e KP.
Kryesia përbëhej nga: Hasan Mala, Kadri Abdullahu, Faridin Tafallari, Saime Isufi, Ali Mala, Shefket Musliu, Zejdi Islami, Iliaz Krasniqi, Nami Ramadani. Ali Mala (djali plakut) ishte Kryetar i Kryesisë së KP të LPRK-së.
***
Pa u futur në vlerësimin tim për shënimin tuaj në tërësi, me këtë rast dua të veçoj vetëm një lëshim për ta bërë edhe një sqarim.
Ju shkruani:
“Athua, a do te kishte UÇK, po të vepronte LPK- ja e vërtetë, ashtu siç veproi fraksioni i Hasan Malës e Xhafer Shatrit, përmes një Komunikate të tyre më 01 tetor 1990?”
Për të qenë korrekt, Xhafer Shatri nuk ishte pjesë e kësaj LPRK-je me adresë, (në Biel Bienne), prandaj ai nuk ka lidhje me këtë komunikatë.
– Xhafer Shatri gjithashtu nuk ishte as pjesë e LPRK-së pa adresë, e cila kishte në kryesi: Fazli Veliun, Emrush Xhemajli Gafurr Elshanin, Avni Deharin, Ernest Jurstver, Xhavit Halitin dhe Rexhep Halimin.
——-
Ilustrim:
Komunikata e plotë e LPRK-së me adresë (e cila iu bashku LDK-së), e lëshuar më 1 tetor 1990. Pjesa me kornizë të kuqe është citati që keni publikuar ju!
***
Sheradin Berisha
NJË INFORMIM TELEGRAFIK PËR XHAFER SHATRIN
I nderuari Metë Dura
Xhafer Shatri, në vitin 1985 largohet nga LRSHJ-ja (e cila kishte nisur rrugën e transformimit në Lëvizje Popullore për Republikën e Kosovës (LPRK), me OMLK si pararojë. Ai pas një kohe nis angazhimin e tij konkret për themelimin e “KOMITETIT TË KOSOVËS PËR INFORMIMIN E OPINIONIT BOTËROR”. Ky komitet përfundimisht themelohet në korrik të vitit 1988 dhe gjatë viteve (1988 – 1990), ka zhvilluar një veprimtari informuese (dhe jo vetëm) për zhvillimet në Kosovë… Nuk e di a ka qenë anëtarë i LDK-së për të pas pozitë në këtë parti që u themelua në Zvicër. Por atë që di unë, më 19 Tetor 1991 me vendimin numër 39-01-14/91 të lëshuar nga kryetari i Kuvendit të Kaçanikut, Ilaz Ramajli, Xhafer Shatri emërohet Ministër për Informim në Qeverinë e Republikës së Kosovës me kryeministër Bujar Bukoshi.
…….
Ilustrim nga arkivi im:
Disa broshura dhe komunikata informuese të “KOMITETIT TË KOSOVËS PËR INFORMIMIN E OPINIONIT BOTËROR” që e drejtonte Xhafer Shatri.
***
Metë Dura
I nderuar Sheradin Berisha, derisa ishte Xhafer Shatri në LPRK, në cilin fraksion ishte?!
***
Nuri Pulaj
Sheradin Berisha, Xhafer Shatri si antar i Partisë Parlamentare u bo ministër për Informim. Në atë partinë ku ishte Veton Surroi kryetar. Kjo ishte sa për info .
***
Sheradin Berisha
I nderuari Nuri Pulaj
Partia Parlamentare e Kosovës (PPK) ishte pasardhëse e “Parlamentit Rinor të Kosovës” (PRK).
PRK si shoqatë rinore u themelua në janar të vitit 1990 nga gazetarët e rinjë dhe studentët e Universitetit të Kosovës, dhe me këtë rast do të veçoja: Blerim Shalën, Halil Matoshin, Ylber Hysën, Hazir Rekën, Astrit Salihun, Mufail Limanin, Agron Jahën, Jahir Ahmetin, Fadil Grajçevcin, Naser Mekollin, Osman Shahinin etj.
Ndërkohë ky Parlament Rinor i Kosovës (PRK) u transformua në Parti Parlamentare të Kosovës (PPK) dhe Kryetar u zgjodh Veton Surroi. Para se të vinte në krye të Partisë Parlamentar Vetoni Surroi në vjeshtën e vitit 1989, në Prishtinë kishte themeluar Degën e Shoqatës për Nismën Demokratike të Jugosllavisë të quajtur UJD-i.
Por kjo nismë nuk zgjati shumë, dhe Vetoni iu bashku kolegëve të tij Blerimit, Halilit, Ylberit, Mufës në Partinë Parlamentare dhe në një kuvend ai zgjidhet kryetar i kësaj Partie. Pas veton Surroit në krye të partisë (PPK) vjen Bajram Kosumi, ndërsa Vetoni dhe shumica e themeluesve të Parlamentit Rinor u larguan nga Partia Parlamentare…
Tani të ndalemi tek Xhafer Shatri
Ti thua se, “Xhafer Shatri si antar i Partisë Parlamentare u bo ministër për Informim . Në atë partin ku ishte Veton Surroi kryetar”.
Përgjigja ime është si vijon:
Në fillim të viteve ’90 -të, përveç LDK-së, PSHDK-së dhe UNIKOMB-it (nëse nuk e kam gabim) asnjë parti tjetër e Kosovës (as PPK) nuk kishte themeluar degët e saja në shtetet perëndimore, veçanërisht në Zvicër, Gjermani e Austri, ku numri i mërgimtarëve tanë ishte shumë më i madh.
Xhafer Shatri nga marsi – prilli i vitit 1982 jetonte dhe vepronte në Zvicër, dhe meqë në fillim të viteve 1990 Partia Parlamentare e Kosovës e kryesuar nga Veton Surroi nuk kishe degë në Zvicër, atëherë rrjedhimisht as Xhafer Shatri nuk ishte e mundur me qenë anëtar i Partisë Parlamentare të Kosovës, dhe si anëtar i kësaj partie të marrë pozitën e Ministrit për Informim në Qeverinë e Bujar Bukoshit në mërgim (exil).
Tjetër gjë është nëse zgjedhja e tij për ministër është bërë me propozim të Partisë Parlamentare (në Këshillin Koordinues të të gjitha partive që vepronin atëkohë Kosovë dhe jo vetëm), por vendimin për emërimin e tij e ka marrë kryetari i Kuvendit, Ilaz Ramajli, më 19 Tetor 1991 me vendimin numër 39-01-14/91.
Shëndet 🤝
***
Sheradin Berisha
Metë Dura
Xhafer Shatri nuk ishte asnjë ditë në LPRK.
Në fund të vitit 1984 – fillim të vitit 1985, Grupi i OMLK-së (brenda LRSHJ-së) Fazli Veliu, Emrush Xhemajli, Mustafë Xhemaili, (së bashku me Ibrahim Miran Kelmendin) të cilët ishin edhe anëtarë të redaksisë “Zëri i Kosovës”, kryesisht (dhe jo vetëm) për shkak të konceptit ideologjik (devijmit nga vija marksiste – leniniste) që kishte zbatuar Xhafer Shatri me shkrimet që i botonte në ZiK, dhe mbi të gjitha botimit të “Konturave të Programit Politik të LRSHJ” që u publikua në numrin 3, të ZiK-ut, maj 1983, ai u penalizua dhe përfundimisht u largua nga LRSHJ. Nga LRSHJ e cila akoma nuk ishte transformuar në LPRK.
Vendimi për emërtimin e LRSHJ-së në LPRK është marrë në shtator të vitit 1985. Dhe pastaj fillon kalvari i dytë i përjashtimeve nga Lëvizja e cila ishte me adresë (në Biel Bienne). Përjashtohen ata që e kishin përjashtuar Xhafer Shatrin nga Lëvizja, në fillim të vitit 1985.
Dhe të lartpërmendurit që e kishin përjashtuar Xhaferin, themelojnë LPRK-në pa adresë.
Dhe nga fillimi vitit 1987 i kemi dy LPRK dhe dy “Zëra të Kosovës” (me adresë dhe pa adresë)… Dhe në përgjigjen e mësipërme i listova emrat që përbënin të dy kryesitë e KP të LPRK-ve, të cilët ishin edhe drejtues të Komiteteve Organizative të OMLK-së, si pararojë e Lëvizjes ….
Shëndet 🤝
***
Xhafer Shatri
Kurrë nuk kam qenë anëtar i asnjë partie. E nuk jam as sot. Propozimi që të jem anëtar i Qeverisë, ishte i Partisë Parlamentare, por ai propozim është mbeshtetur unanimisht nga Këshilli Koordinues i partive politike të Kosoves, kryesisht për shkak se një kohë të gjatë isha marrë me informimin e opinionit të huaj.
***
Nuri Pulaj
Sheradin Berisha, unë nuk thash se ppk kishte degë jashtë por si i propozuar për qeverinë Bukoshi nga kjo parti ku kryetar ishte Veton Surroi. Edhe formimi i parlamentit rinor e di historikun dhe datën me 15 shkurt në Vranjevc.
__________________________
Shtojcë (Video)
Xhafer Shatri – Veprimtar Kombëtar
***
Hasan Malaj – Dokumentar
