Recension
SHQIPTARI PЁRBALLЁ RRЁNIMIT (VIDEO)
Nga Adnan Qaka
Libri i atdhetarit dhe analistit të shquar politik Korab Blakaj, i titulluar “Shqiptari përballë rrënimit”, paraqet një vepër me vlera të larta kombëtare dhe intelektuale. Pa asnjë hezitim, mund të them se ky është libri më i fuqishëm i mendimit politik shqiptar aktualisht. Ai identifikon me qartësi problemet e shqiptarëve, sfidat, vështirësitë, mangësitë e kombit tonë, si dhe dukuritë negative, ngecjet dhe sabotimet kombëtare që po i bëhen interesit shqiptar në Ballkan – shpeshherë nga vetë shqiptarë të shitur, kolona të pesta në shërbim të interesave të huaja, por edhe nga shtete armiqësore ndaj shqiptarëve.
Ky libër është një thirrje e fuqishme për reformim të thellë të shoqërisë shqiptare. Në thelb të tij qëndron ideja e krijimit të një shqiptari ideal – një individ i fortë, i ndërgjegjshëm dhe i përgatitur përballë sfidave, i gatshëm për të avancuar interesin kombëtar në çdo rrethanë. Po ashtu, libri është një thirrje për ndërgjegjësim gjithëkombëtar, për konsolidim dhe fuqizim të shqiptarëve në Ballkan, për unifikimin e tyre dhe për realizimin e bashkimit në një shtet të vetëm.
Autori paraqet një vizion të lartë kombëtar, duke analizuar me saktësi dështimet dhe mangësitë tona historike dhe aktuale, si dhe duke ofruar një qartësi të rrallë mbi strategjinë që duhet ndjekur për arritjen e synimeve kombëtare dhe realizimin e ëndrrës së madhe të bashkimit të shqiptarëve. Ai nuk heziton të bëjë një kritikë të fortë ndaj klasës politike dhe intelektuale shqiptare, e cila, sipas tij, në shumë raste ka dështuar dhe madje ka tradhtuar interesin kombëtar.
Në një formulim të fuqishëm dhe tronditës, autori shprehet se “lufta që e fituan burrat u trashëgua nga matrapazët”, duke vënë në pah degradimin e vlerave në hapësirën shqiptare, sidomos në Kosovë. Ai thekson nevojën për besnikëri ndaj vlerave kombëtare dhe refuzimin e shërbimit ndaj klaneve dhe interesave të ngushta. Sipas tij, shteti është kapur nga të paaftët, shfrytëzohet nga të huajt, mbrohet nga frikacakët dhe shkatërrohet nga të korruptuarit.
Libri përfaqëson një akt të guximit të lartë intelektual dhe një thirrje për mobilizim gjithëkombëtar kundër çdo të keqeje që cenon interesin shqiptar. Ai synon të zgjojë ndërgjegjen kombëtare dhe të bëjë të qartë për shqiptarët kudo që ndodhen se interesi kombëtar është në rrezik dhe se ka ardhur momenti për vetëdijesim të thellë intelektual dhe kombëtar. Autori kërkon krijimin e elitave të mirëfillta politike dhe intelektuale, të afta për të mbrojtur dinjitetin kombëtar, territorin dhe për të realizuar aspiratën e bashkimit kombëtar.
Pavarësisht sfidave dhe ngecjeve të shumta, autori nuk e humb shpresën. Ai thekson se shpresa ekziston vetëm nëse kombi shqiptar i merr seriozisht idealet e veta. Kapja e shtetit, sipas tij, nuk është thjesht një problem teknik, por një krim moral, sepse i mëson qytetarët të pranojnë të keqen si standard dhe të harrojnë se si duhet të jetë një shtet që meriton respektin e popullit të vet. Në analizën historike që ofron, ai nënvizon se shpëtimi i kombit nuk ka ardhur kurrë nga shumica apo nga turma, por nga individë të vendosur — nga mendje që refuzojnë errësirën dhe nga zemra që nuk pranojnë të heshtin.
Një pjesë e rëndësishme e librit i kushtohet rreziqeve të jashtme, veçanërisht atyre që i kanosen Kosovës nga Rusia dhe Serbia, si dhe nga Kisha Ortodokse Serbe. Autori argumenton se këta aktorë kanë ndërtuar një front të përbashkët të luftës speciale, me qëllim paralizimin gradual të shtetit të Kosovës, deri në krijimin e kushteve të favorshme për ndërhyrje ushtarake kundër shtetit të Kosovës.
Po ashtu, ai ngre alarmin për depërtimin e agjenturave të huaja në tri shtylla kyçe të jetës publike: OJQ-të, mediat dhe fenë. Sipas tij, një pjesë e madhe e mediave në Kosovë është e kapur nga interesa të huaja, klane të brendshme apo burime të dyshimta financiare, duke sulmuar vlerat kombëtare dhe promovuar ndikime të jashtme. OJQ-të, në këtë këndvështrim, funksionojnë si zgjatime të institucioneve të huaja me synim dobësimin e identitetit shqiptar, ndërsa institucionet fetare ortodokse të serbëve të Kosovës paraqiten si instrumente të drejtpërdrejta të shtetit serb dhe të inteligjencës së tij.
Autori thekson gjithashtu se ideali kombëtar është goditur qëllimisht si në Shqipëri, ashtu edhe në Kosovë. Në këtë kontekst, ai është analisti politik nga Kosova që ka qenë më i zëshmi në kërkesën për armatosjen e Kosovës. Sipas tij, paqja është e vlefshme vetëm kur mbrohet me forcë dhe drejtësi. Ai propozon transformimin e Forcës së Sigurisë së Kosovës në një ushtri të mirëfilltë, të pajisur me teknologji moderne, kapacitete mbrojtëse dhe strategji të qartë për mobilizim të përgjithshëm.
Në të njëjtën linjë, ai thekson domosdoshmërinë e krijimit të rezervave strategjike — përfshirë infrastrukturë mbrojtëse, furnizime jetike si ushqim, naftë, barna dhe kapacitete mjekësore ushtarake – si dhe ndërtimin e një zinxhiri alternativ komandues. Një rëndësi të veçantë i jep bashkëpunimit ushtarak me Shqipërinë në nivel strategjik dhe taktik, duke propozuar krijimin e një ushtrie të përbashkët, komandë të përbashkët, akademi të përbashkët dhe plan të integruar mbrojtjeje.
Autori kërkon pastrimin e institucioneve nga ndikimet e spiunazhit dhe agjenturave të huaja dhe artikulon qartë idenë e krijimit të një shteti kombëtar të shqiptarëve – një shtet të përbashkët për të gjithë shqiptarët që jetojnë në Ballkan.
Në tërësinë e tij, kjo vepër ngrihet si një manifest i fuqishëm për zgjim kombëtar dhe përgjegjësi historike, duke sfiduar hapur apatinë, konformizmin dhe kompromiset e dëmshme që kanë penguar zhvillimin e shqiptarëve. Përmes një analize të drejtpërdrejtë dhe pa kompromis, autori jo vetëm që demaskon realitetin e hidhur politik e shoqëror, por edhe vendos përballë lexuesit një standard të ri të të menduarit dhe të vepruarit kombëtar. Mesazhi i tij është i qartë: mbijetesa dhe fuqizimi i kombit nuk janë çështje fati, por vullneti, vetëdijeje dhe organizimi. Ai e shndërron librin në një thirrje për veprim, duke i bërë të qartë çdo shqiptari se koha për indiferencë ka përfunduar dhe se e ardhmja varet nga gatishmëria për të mbrojtur dhe përmbushur idealin kombëtar me përkushtim, dije dhe guxim.
—————-
BOSHTI I RI BALLKANIK …
