Durrës, 5 janar 2021: Jam i pari që kam propozuar, parashikuar dhe inkurajuar lëvizjen politike të Vjosa Osmanit të botuar në disa media.
Znj. Vjosa Omani tani ka dalë me sloganin “Guxo”.
Më erdhi shumë mirë dhe u ndjeva mirë pasi ky slogan i saj sot përkon pikërisht me parashikimin dhe vizionin tim në ate se çfarë unë kam shkruar dhe u jam drejtuar publikisht shqiptarëve dhe sidomos intelektualëve dhe mediave për të vepruar dhe për të guxuar për të vepruar, angazhuar dhe mbështetur Znj. Osmani në zgjedhjet e parakohshme që do të mbahen në Kosovë, për të cilat që në Gusht të vitit 2020 pata parashikuar që zgjedhjet e parakohshme në Kosovë janë të detyrueshme.
Ja dhe shkrim-thirrja ime për guximin intelektual për të vepruar në mbështetje të Vjosa Osmanit botuar me 27 Nëntor 2020
Thirrje për ndërgjegjësim e veprim: Vizioni i Znj. Osmani-republikanizmi dhe çmontimi i korrupsionit dhe shtetit privat e tribal
Skënder S.Kapiti
Kurrë nuk ka zhvillim në një shtet kur ligjin e bëjnë dhe e sundojnë korrupsioni, nepotizmi, krahinizmi dhe injoranca, tipare këto të pushtetit e të politikës se epokës tribale e mesjetare, para republikane, para demokratike e para moderne.
Kosova është trajtuar nga elita politike si një shtet privat dhe tribal dhe jo si shtet republikan. Postet dhe detyrat e larta shtetërore, administrative,pasuritë kombëtare dhe paraja publike, ligji dhe drejtësia në Kosovë janë prona, të drejta, autoritete dhe privilegje për një pakicë njerëzish me lidhje klanore, fisnore, partizane dhe krimi,korrupsioni e hajnije.
Parlamenti, qeveria , presidenca dhe drejtësia kanë funksionuar si agjensi private të shpërndarjeve dhe shpërblimeve me paranë publike dhe të posteve atyre individëve që kanë lidhje familjare e fisnore.
Le të bëhet një verifikim dhe do të rezultojë që: pothuajse i gjithë farefisi i politikanëve të lartë kosovarë janë të punësuar në administratën shtetërore dhe jo pak prej tyre edhe në 2 apo 3 borde ku marrin rroga të majme nga paraja publike.
Është në të mirë të Kosovës që ajo ka politikanë të aftë, të përgjegjshëm politikisht por edhe të guximshëm kombëtarisht si Vjosa Osmani, shëmbulli i së cilës është inkurajues dhe shpresëdhënës se në Kosovë me të tilla kualitete intelektuale dhe me vizionin për ndërtimin e shtetit ligjor, modern e kombëtar do të vijë edhe ndryshimi e përmirësimi.
Por kjo nuk mjafton, pasi Znj. Vjosa Osmani i duhet dhënë mbështetje, dhe për këtë është koha të dalë në skenë dhe të aktivizohet maksimalisht Guximi intelektual e politik i meritorëve dhe i intelektualëve të vërtetë.
Është koha që edhe mediat të luajnë rolin jo vetëm atë informativ por edhe emacipues për demokracinë e për shtetin.
Tani dhe me këtë rast po shtroj një pyetje publike se: cili nga personazhet që po kërkojnë të bëhen President të Kosovës është më meritorë në aspektin intelektual, profesional, demoktatik e kombëtar dhe si figurë politike me kontribute reale dhe e pakorruptuar se sa Znj. Osmani, të cilës të drejtën si kandidatura më merituar për Presidente ia ka dhënë edhe verdikti popullor në zgjedhjet e 6 Tetorit 2019, kur ajo ishte kandidate për Kryeministër i Kosovës. U takon së pari shtresës së intelektualëve të Kosovës që ta promovojnë këtë fakt, pasi opinioni publik ka folur me 6 Tetor 2019.
Është koha që demokracinë dhe institucionet shtetërore, demokratike dhe atë të Presidentit t’i kthehen popullit, t’i nënshtrohen e t’i servilosen injorancës dhe inferioritetit sikurse është aktualisht sot në Kosovë Është koha që dituria, kompetenca dhe patriotizmi i vërtetë të aktivizohen fort dhe guximshem në politikë, pasi në të kundërt askush më pastaj nuk u ka faj atyre që të detyrohen. U them analistëve e opinionitëve, atyre që shkruajnë e botojnë shkrime dhe opinione që: mos rrini e thoni vetëm kritika por kapërcejini edhe ju egoizmin negativ dhe xhelozinë e sëmurë; inkurajoni dhe propagandoni më të mirët e intelektualizmit dhe kombëtarizmit që janë aktivizuar në politikë.
Nëse nuk keni aftësinë dhe guximin për t’u marrë vetë me politikë, atëhere përdoreni gjykimin dhe vlerësimin për të mbështetur meritorët e vërtetë, sepse kështu edhe ndihmohet shteti, shoqëria por edhe e ndihmoni veten tuaj. Aktivizohuni, mos rrini dhe mos prisni se dhuntia e talenti vlerësohen duke pritur prej të tjerëve, sidomos prej mediokritetit dhe inferioritetit të cilët janë armiq të meritës dhe talentit. Shpërblimi merret sipas meritës por kur guxon e vepron edhe politikisht. (Durrës, 27 Nëntor 2020)
