Disa porosi për Lulzim Bashën
Nga Skënder Sadri KAPITI, Durrës 14 tetor 2021
Z. Basha, Kryetar i PD-se, duhet ta dish se ke përballë tërë llumin dështak e korruptiv të politikës; ke përballë një pjese të shoqërisë civile të manipuluar dhe të intelektualizmit servil si dhe të mediave mercenare e të korruptuara të cilat duan të ruajnë status quonë, pra që duan mosndryshimin.
Nuk duhet të rrinë demokratët, virtyti, intelektualizmi pozitiv, shoqëria civile e mediat kaq indiferent dhe kaq jo aktiv e të presin ndryshimin e përmirësimin vetëm nga SHBA-të dhe nga reagimi i kryetarit Basha.
Duhet së pari nga demokratët guxim intelektual, demokratik dhe guxim politik dhe jo vetëm për të thënë se Berishën nuk e duan SHBA-të, por duhet të dalin në media me më guxim për të thënë ato të vërteta që dihen publikisht dhe që e kanë gërryer prej vitesh PD-në si: autokracia, nepotizmi, servilizmi, egoizmi, korrupsioni, përgjimi e spiunimi si dhe imponimi dhe përjashtimi i atyre të cilët kanë pasur mendim ndryshe nga Berisha dhe klanet rreth tij.
Duhet një veprim i gjërë gjithmbështetës së pari nga strukturat e Partisë Demokratike për VETING të PD-së gjë, e cila e forcon Partinë Demokratike dhe bën të mundur prurjen dhe angazhimin e mijra të tjerëve rreth dhe në mbështetje të PD.
Pra edhe një gjë duhet ta dijë Basha, atë se: numerikisht këta dështakët e mjeranët politikë që të janë kundërvënë sot janë një asgjë para atij numri të madh demokratësh, mbështetësish e votuesish të PD-së që mezi kanë pritur këtë VETING të Partisë Demokratike dhe që do të vijnë e të aktivizohen fort në PD.
Kjo u pa edhe në zgjedhjet e fundit të 25 Prillit 2021, ku pavarësisht “indiferencës “djallëzore antiPD të këtyre dështakëve dhe pavarësisht blerjes së votave nga pushteti, PD-ja mori një rezultat të jashtëzakonshëm.
Porosi tjetër për Ju Z. Basha: Z. Basha ke mbështetjen e Shteteve të Bashkuara të Amerikës të cilat janë shumë të zhgënjyera nga politika e vjetër dhe nga tranzicioni që mbeti në qorrsokak prej kësaj politike të mbrapshtë që e kapi dhe e mbajti peng Shqipërinë,demokracinë,drejtësinë dhe integrimin.
Antarësisë dhe demokratëve nuk u intereson interesi personal e klanor, dhe fati i tyre nuk është i lidhur me atë të individëve të vecantë, por demokratëve u intereson demokracia,ligji, drejtësia, zhvillimi, integrimi dhe ndryshimi. Sot i vetmi qëllim e mision i PD-së dhe si domosdoshmëri kombëtare është largimi i regjimit kleptokratiko-korruptiv i Edi Ramës.
