Vrojtim filljave
KORI I HALLAKATUR DIPLOMATIK: PËRSE?
Nga Rexhep Kasumaj, Berlin 5 shkurt 2024
Nuk janë, realisht aspak, vendimi i Bankës qendrore dhe mbyllja e komunave paralele serbe në Kosovë, përnxitje tensionesh në veri a kudo jeton dhe një serb i vetëm në Kosovë.
Rrëmujën ua kujtojnë atyre dhe i joshin të rebelohen, vetë Brukseli me korin e madh të ambasadorëve në Prishtinë.
Përse?
Sepse veprimet e Prishtinës do t’i cilësonin flakërrufeshëm të gabuara, të ngutshme e plastare. E pra, si një shkas trazirash, madje akoma pa çelur gojën asnjë minoritar i veriut.
Dhe, vërtet, gati të mendosh se i trëmbeshin vonesës për t’u dhuruar atyre kauzën e munguar. Ndaj, sikur i thërrisnin: mos ngurroni, dilni, vraponi o serbë. Sepse e drejta është në anën tuaj. Një ftesë e kovertuar për të mbushur sërish vandalshëm udhët. E të bëjnë atë që më së
miri dinë: një relikt “revolucionesh të Sllobodanit”!
E, së fundmi, sërish: përse?
Athua, ndoshta, pse Kosova s’ka një aleat të madh rezervë diku në botë? Një Rusi të sajën, fjala vjen, për të bërë lojën e dyfishtë? Apo?
Megjithë kuptimin që kam për realizmin politik, kjo është një ligësi klasike. Tashmë historia, së paku që nga Kancelari hijerëndë Metternich, dëshmon se paqja e hegjemonëve është një bimë pa jetë!
