PROF.ISLAM GEGAJ: GJURMËT AUTENTIKE QË I DHANË DREJTIM ҪËSHTJES KOMBËTARE

Pashtriku.org, 7 nëntor 2017:

“Basria, pinjollë e denjë e familjes atdhetare, Murati të Llapashticës e formuar dhe e brymosur me ideale atdhedashëse, qysh e re ka dhënë kontribut të vyer në Lëvizjen mbarë popullore çlirimtare duke u renditur ndër radhët e para në përpjekje çlirimtare. Si shqiponjë mali, sypatrembur, e zjarrtë si vullkan që zjenë përbrenda e me shpirt luftarak po hynte e vetë mohuar në vorbullën e ngjarjeve me syrin pishë e qartësi veprimi. Edhe pseudonimin e kishte «Shqype», si emër ilegal.” – kështu shkruan prof.Islam Gegaj(*), në pasthënien e librit “Gjurmë të pashlyeshme…” të autores Basrie Sakiri – Murati.

Në vazhdim lexoni Pasthënien e librit:
* * *
P A S TH Ë N I E
Kjo zonjë me rezon sot, me arritje e karrierë të suksesshme profesionale e me dije shkencore solide, vjen e na shpërfaqet me librin e saj, «Gjurmë të pashlyeshme…» në formë ditari të jetës së saj si veprimtare e shquar me angazhimin vetëmohues për Liri dhe Republikë, si pionere e atyre ngjarjeve të bujshme të fundviteve `80-ta.
Ditari, «Gjurmë të pashlyeshme…» përmban në vete përshkrime ngjarjesh autentike dhe evokime në sensin e autorësisë vetë përfshirëse të atyre ndodhive që i dhanë kahje e drejtim çështjes atdhetare për Liri e dinjitet njerëzor dhe kombëtar.
Basria, pinjollë e denjë e familjes atdhetare, Murati të Llapashticës e formuar dhe e brymosur me ideale atdhedashëse, qysh e re ka dhënë kontribut të vyer në Lëvizjen mbarë popullore çlirimtare duke u renditur ndër radhët e para në përpjekje çlirimtare. Si shqiponjë mali, sypatrembur, e zjarrtë si vullkan që zjenë përbrenda e me shpirt luftarak po hynte e vetë mohuar në vorbullën e ngjarjeve me syrin pishë e qartësi veprimi. Edhe pseudonimin e kishte «Shqype», si emër ilegal. Ndonëse, në moshë fare e re, Basria po ecte turravrap shtigjeve të pashkelura plot rreziqe e vështirësish me ecejake të vendosur, të pashoqe, përmes privacionesh të panumërta e me gjithfarë ide-verpimesh për të arritur Bregun e Lirisë të këtij vendi. Kjo, bashkë me veprimtarë tjerë të idealit, synonin ndryshimin me revolucion.
Basria qe bërë një personazh i njohur me famë brenda shumë e shumë personazheve tjerë të kohës, personalitet brenda shumë e shumë personaliteteve, e raste aksionesh, shpesh protagoniste në veprim. Kjo, për kohën që veproi, qe një Shotë Galicë, por pa Azem Bejtë, një Norë e Tringë Smaili e veçantë. Asokohe, kjo thurte ëndërrat për Liri e prosperitet njerëzor e kombëtar duke mos i dhënë vetës të drejtë të ëndërronte djaloshin kalorës zemërbardhë. Krenare edhe sot për rrugën e zgjedhur për misionin që kreu në shërbim të çështjes vjen si heroinë me këto dromca veprimtarie kushtuar atdheut dhe vetëm atdheut.
Autorja e këtij Ditari jetësor e merr në krah lexuesin për t’i rrëfyer «gjurmët e pashlyeshme» të asaj kohe të pakohë, si rrëfimtarja autentike për vitet 1988-89, sa ishte gjimnaziste.
Unë, një prej mësimdhënësve të saj, e shoh me krenari sot këtë zonjë, dje veprimtare lapidare, i bindur se kisha ndihmuar në formimin atdhetar që sot, mbase dhe një shkaktar i privacioneve të saj aso kohe.
Por, ja e shkuara lavdiplotë e ka sjellur të jetë sot zonjë, e tillë çfarë do të dëshironte secila shoqe e saj, ndonëse edhe atëherë ia kishin lakmi. Tani jeton dhe punon në Zvicërr me dinjitet dhe me krenarinë e ligjshme se ka kthyer një borxh ndaj atdheut për të cilin sakrifikoi, ndonëse ndjehet jo aq mirë larg vendlindjes e njerëzve të afërm, si mërgimtare, por e realizuar dhe e konsoliduar në vetvete.
***
E nderuara autore e këtij Ditari si jetëshkrim juaji e pasqyrim ngjarjesh para një çerek shkulli, vjen para lexuesit edhe me një dimension tjetër për lakmi, si krijuese letrare-artistike me një gjuhë të pastër e të rrjedhshme të shqipes sonë në standardin e njësuar letrar. Përveç pasqyrimit autentik të atyre ngjarjeve në frymën e kohës që i keni marrë si bashkëveprimtare e denjë e Ali Ajetit me shokë, ju po i dhuroni lexuesit edhe një formë artistike-letrare, mbarështruar me aq dell poetik frymëzimi.
Gjuha juaj e fytyrëzuar, shkrimore, më bëri kureshtar të pasionuar në lexim të jetëshkrimit tuaj dhe aq më tepër përjetues i atyre ngjarjeve, që me sensin artistik përshkruhen. Ja disa rreshta shkruar artistikisht: «Atë ditë m’u duk se u errësua më herët se kurdoherë më parë. As dielli nuk donte të më shihte se si po e braktisja atdheun», shprehin botën tuaj të pastër shpirtërore dhe imagjinatën krijuese me rastin kur i kthehet shpina pa dashje atdheut e familjes. Ose, edhe kështu: «Gëdhiu edhe mëngjesi i fundit i këtij muaji, në folenë e Nënës shqipe, vetvetiu të burojnë fjalët, sikur edhe ato shkëlqejnë nga medimet e radhitura, mu si lulja kur thith rrezet e diellit plot energji».
Ndërkaq, prirja e hollë poetike, shprehet edhe në këto vargje të poezisë: «Shtrëngatë dimri»
Përpara shokë, gjakun mos kurseni
Të gjithë së bashku, në valle të hidhemi.
Valle krushqish, fryt demonstrate
S‘do të marrin nuse, t’i bëjmë ballë kësaj shtrëngate.

O hej! Valle të madhe, me shumë dasmorë
Për liri o vëllezër, të thurim kurorë.
Përpara shokë, me gjakun valë të nxehtë
Për Nënë Kosovën tonë, të mos kursejmë as jetë.

E bukur dhe domethënëse është shkruar poezia që titullohet: «Pa titull», por në vargjet e pesë strofave zbulon autorësinë nëpërmjet anagramit: Basrie Murati ujit lulet e malit, që në secilin varg jipet shkronja formësuese emërtuese dhe në konupcion prosmatik, angazhues e autorial të vetë protagonistes së këtij Ditari dokumentues, shkruar nga e motra Mihane Murati.
Këto vargje poetike si dhe vetë Ditari i shkruar, katërcipërisht shprehin në mënyrë ideo-artistike e ideo-emocionale botën shpirtërore dhe imagjinative emituese të vet autorës, Basrie Murati.
Shëndet e suksese në punën e saj krijuese!
Prof. Islam Gegaj
Prishtinë, 11 korrik, 2016
(*) Autori i pasthënies është lektor i librit “Gjurmë të pashlyeshme…”. Libri u botua në verën e vitit 2016, në Shtypshkronjën ‘Blendi’ në Prizren, nga Shoqata e të Burgosurve Politikë e Kosovës.

___________________
Shkrime tjera për këtë temë:
GJURMË TË PASHLYESHME HISTORIKE (1988/89) TË VEPRIMTARES BASRIE SAKIRI – MURATI
https://pashtriku.org/?kat=64&shkrimi=6976
* * *
DR. SABRI KIҪMARI: GJURMË TË PASHLYESHME TË BASRIE SAKIRI-MURATIT NË LUFTËN PËR LIRI DHE REPUBLIKË!
https://pashtriku.org/?kat=64&shkrimi=6991
***
VLERËSIME PËR LIBRIN “GJURMË TË PASHLYESHME…” TË VEPRIMTARES BASRIE SAKIRI-MURATI
https://pashtriku.org/?kat=47&shkrimi=7006

Total
0
Shares
Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Për siguri, kërkohet përdorimi i shërbimit reCAPTCHA të Google, i cili i nënshtrohet Politikës së Privatësisë dhe Kushteve të Përdorimit të Google.

Unë pajtohem me këto kushte.

Postime të Lidhura