REXHEP KASUMAJ: APATRIDËT PUSHTETARË!

Berlin, 22 mars 2018: Është e njohur në lektyrat shkollore, tashmë si rrëfenjza romantike, kur mbretër e sundtarë kanë marrë a dhuruar tokë për të nyjëtuar krushqitë e tyre politike.
Ka ndodhur, tutje, që territoret të kenë humbur në luftë. Ose në Konferencë paqeje ku prente fijet vullneti i kancelerive që nuk i lëvizin dot dhimbja, e drejta dhe lotët.
Janë tregtuar, poashtu, troje nga traktate të diplomacisë së fshehtë me damkën e renegatëve që trathtojnë qumshtin e nënës, pa të cilët, ashtu si pa të marrët, nuk është kurrë ky Dhé.
Mirëpo që vota e lirë parlamentare të përligjte solemnisht falje territori shtetëror me flamuj e lavdi ngadhnjimi, shoqëruar njëj gëzimi zulush të turmës – këtë nuk e kam dëgjuar kurrë ndër popuj historikë.

Demosi i këtij nënqielli, në fakt, s’ka kujtesë lirie dhe, i tillë, është lehtësisht i sundueshëm. I shkretë. Entusiazmi i tij është parapolitik dhe, madje, primitiv. Të qenurit të gjithë skllevër e bënte të pashpresë dritësinë e perandorisë otomane, shkruan autori i pamëshirshëm i Princit. I pamëshirë, sepse vërtetë ashtu. Një saktësi e trishtë që dërgon shembëllimin e errtë akoma në kohën tonë.
Ndërsa turmësi, ky anonimat i pafund, nuk reflekton fare, sepse, thjeshtë, e mendon një luks për hallin e tij – klasa e të mundurëve të lirisë, një botë e iluminuar, është shmagjepsur nga përdhosja e saj. Dhe të dy palët bashkë, janë shndërruar në alienë socialë që vegjetojnë margjinave të jetës.
Ndërkaq, ka një peng thelbësor që bën të kujtohet demoniaku i shkollës politike. Një peng i lig, gjiriz kënetor i ndaluar deri në mëkat, shplarës truri dhe ndotës higjiene nacionale. Është rrethi i oligarkëve që, pa kulturë faji apo turpi, bëjnë një racë të veçantë. Ata ndjehen, thjeshtë, apatridë. Me vendlindje, por të paatdhe. Atdheu i tyre, ashtu si për krimin transnacional, s’është votra përlindëse, veç dhuna, hajnia, trafikimi, kartelat, mafjovegëzat, poshtërimi i njeriut të nënvënë a shprishja e të gjitha indeve ekzistenciale të kombit…
Dhe është pikërisht ky soj apatridësh vullnetarë që vulosin fatet e Kosovës, sot.
E, ndoshta, nesër e përherë!

Total
0
Shares
Lini një Përgjigje

Adresa juaj email s’do të bëhet publike.

Postime të Lidhura
Read More

KRIMI ME VAKSINA!

KRIMI ME VAKSINA! Senatori australian, Malcolm Roberts bën thirrje për akuza kundër burokratëve shëndetësorë për krimet Covid Nga…