Tiranë, 14 shtator 2020: Populli shqiptar e njeh mirë UÇK-në
Duke lexuar këto pjesë deklarimesh të krijohet ideja sikur nuk flitet për vendin ku jetojmë ne, por për një vend tjetër me të cilin nuk kemi asnjë lidhje dhe nuk jemi parë kurrë. Siç duket, më mirë e dinë Serbia dhe Dick Marty se çfarë ndodh tek ne sesa e dimë vetë; siç duket më shumë na duan neve Serbia dhe Dick Marty sesa e duam ne veten tonë; siç duket më të shqetësuar janë Serbia e Dick Marty për të ardhmen tonë sesa ne vetë që do ta ndërtojmë e do ta jetojmë vetë dhe me pasardhësit tanë. Ky është mashtrimi më banal që mund të besojë njeriu, por ja që i kemi kujdestarët edhe për këto çështje, kemi Serbinë dhe megafonin e saj Dick Marty-n; atyre duhet t’u kërkonim e t’u kërkojmë ndihmë për të na shpëtuar nga UÇK-ja, që na paska ardhur prej se dimë nga ku dhe që paska në program shkatërrimin tonë si popull e si komb.
UÇK-në ky popull shqiptar e njeh mirë, se ajo nuk ishte një instrument UFO-sh, por ishin djemtë dhe vashat e këtij populli, ishte edukata e këtij populli, ishte trashëgimia e këtij populli, ishte gjaku i këtij populli i ndezur për liri, ishte shpresa e shqiptarëve për ta ndërtuar jetën dhe ardhmërinë e tyre, ishte qytetaria shqiptare që nuk mund të jetonte më në robëri, ishte dëshira shqiptare për t’u bërë si të tjerët. E këta djem e vasha shqiptarët nuk i kanë frikë, se askush nuk ka frikë nga familjarët e vet. E udhëheqësit e kësaj ushtrie dhe lufte ishin djem dhe vasha të farkëtuar në veprimtarinë e gjatë kombëtare, nuk ishin të rekomanduar të dikujt, ndoshta atë keni pasur dëshirë ju që të ishin të rekomanduarit tuaj, siç jeni mësuar prej një shekulli, por kësaj radhe nuk ndodhi ashtu dhe shqiptarët fituan.
Jo zotërinj serbë dhe zotëri Dick i Evropës, nuk do të kërkojmë të na shpëtoni ju nga liria jonë të cilën e kemi dhuratë nga lufta e atyre që ju na i paraqitni si rreziku ynë; atyre që për lirinë e vunë veten para armëve tuaja dhe nuk u trembën, por u ndeshën deri në vetëmohim, ku shumë prej tyre u bënë dëshmorë të atdheut vetëm që ju të mos jeni më kujdestarët tanë. Ju mund të vazhdoni të shpifni, por ne e dimë kush jemi, e dimë kush është UÇK-ja, e dimë kush janë udhëheqësit tanë dhe kur të bëjnë gabime i korrigjojmë vetë e, ndoshta, kur ndonjëri e bën borxh edhe e dënojmë, por kurrë jo sipas këshillave serbe. “Krahas kontrabandës së narkotikëve, grupet e organizuara kriminale nga Kosovë – Matohia merren edhe me tregtinë ilegale të armëve, me cigaret dhe mallrat e tjera akcizë, me automjete të vjedhura, me kontrabandën e mishit të bardhë dhe me rishitjen e organeve të njerëzve”.[1]
Besoj gjithkush e kupton mirë se sa të lehtë e ka pasur zotëri Marty ta përpilojë raportin e vet në qoftë se e ka shkruar vetë e nuk i është dhënë i gatshëm. Akuzat që shpifen më sipër janë identike si të raportit. Është shumë e habitshme si ka koinciduar që të dy raportet, ai i 2004-s dhe ai i 2010-s, ta kenë të njëjtën terminologji dhe të njëjtat shpifje akuzuese për Ushtrinë Çlirimtare dhe drejtuesit e saj, të cilët, meqenëse janë kundër dhe në luftë me Serbinë, nuk janë tjetër veçse kriminelë, që janë të aftë të bëjnë të gjitha krimet e mundshme, çfarë kanë lexuar serbët dhe Dick Martyn në librat e shkruara për mafinë botërore në gjithë historinë e saj.
“Duke pohuar se kriminelët shqiptarë kanë pasur rolin kryesor në krimin e organizuar edhe në vende të shumta të Evropës, veçanërisht në lidhje me tregtinë e narkotikëve, përfaqësuesit e Këshillit të Evropës, në raportin e tyre të vitit 2000 kanë vërejtur se krimi i organizuar në Kosovë – Metohi është i lidhur me ish-pjesëtarët e UÇK-së dhe me kriminelët nga Shqipëria e Veriut. Sipas gjetjeve të zyrtarëve evropianë, krahas veprimtarive kriminale të përshkruara, në Kosovë – Metohi janë përfaqësuar edhe tregtia me njerëzit, me forcë, përfaqësuesit e organeve të policisë dhe të gjykatave, si dhe dhunë mbi baza nacionale, gjatë së cilës spastrimi etnik është trajtuar si biznes i leverdishëm. Kështu, gjatë vitit 2000 “mediat perëndimore e kanë përshkruar Kosovë – Metohinë si ‘ferr gangsterësh’, përkatësisht si territorin që udhëheqësit evropianë gjithnjë e më shpesh e shikojnë si bazën e krimit të organizuar, sidomos të tregtisë me drogën”.[2]
Kush e beson që kriminelët shqiptarë paskan pasur rolin kryesor në krimin e organizuar në Evropë? Vetëm serbët dhe Dick Marty, apo ka edhe të tjerë? Natyrisht që në gjithë këtë propagandë ka edhe të tjerë, se po të mos kishte nuk do të kishte arritur dot zotëri Marty, ta bindte Këshillin e Evropës, por ajo që më vjen në mendje është: Ne shqiptarët paskemi vendin e parë në Evropë e, ndoshta, në Botë për organizimin e krimit; dhe dihet që organizimi i krimit është shumë i vështirë se, përveçse kërkon mjeshtri për t’i dominuar sivëllezërit e organizatës, por edhe gjithë trysninë dhe luftën që të bën shoqëria, ligjet njerëzore, opinioni, konkurrenca etj.; pse pra Evropa e bota nuk na e jep vendin e parë edhe në art, në shkencë, në kulturë, në politikë, në diplomaci etj? Sa dorëlëshuar qenka e para Serbia e pas saj edhe Evropa për të na vënë në vend të parë si kriminelë. Por ne e dimë se çdo të mirë që kemi mësuar, por edhe çdo të keqe e kemi mësuar nga ata që kanë qenë më të zhvilluar se ne e më të mëdhenj se ne, kështu i takon që shumë gjëra ne shqiptarët i kemi mësuar nga Evropa e edhe nga Serbia që na ka mbajtur një shekull të pushtuar, pra edhe organizimin e krimit. Asgjë nuk lind pa një model. Nëse Evropa, Serbia dhe Bota pranojnë që modelet i marrin nga ne shqiptarët, edhe ne do të pranojmë që ndoshta jemi jo baba i mirë, por baba i kësaj bote që po na akuzon.
Dhe ajo që është më interesante edhe brenda ndër shqiptarë, Serbia dhe zoti Marty bëjnë diferencime, nuk i futin të gjithë në një thes. Pra, edhe këtu nuk janë të gjithë shumë të zotë në këtë fushë, por disa edhe janë: “ish-pjesëtarët e UÇK-së dhe me kriminelët nga Shqipëria e Veriut”. Shumë të zotë ata djem a vasha që krijuan UÇK-në dhe na çliruan nga pushtimi shekullor serb, por që të jenë më të zotë në Evropë në fushën e organizimit të krimit, që është fusha më e vështirë e kur është kjo fushë e zotëruar prej tyre, natyrisht se fushat e tjera nuk i kanë fare të vështira t’i zotërojnë e të dominojnë. Këtë e vërtetuan me vepra; ata vërtetuan se janë luftëtarë të papërballueshëm sepse hodhën jashtë armikun dhe çliruan atdheun, se janë atdhetarë me bindje dhe arritën të marrin gjithë popullin pas vetes, se janë politikanë të nivelit të lartë pasi bënë gjithë botën moderne me vete; sepse fituan simpatinë e të gjithë njerëzve të ndershëm dhe u bënë modeli botëror se si duhet luftuar për liri, sepse u bënë bashkëpunëtorë të suksesshëm të NATO-s në luftë që të tjerët me ushtri të mëdha klasike nuk e kanë provuar akoma dhe ishin aq bashkëpunëtorë të suksesshëm sa u bënë modeli i kohës, ashtu sikurse jam i sigurt se ata që kanë ardhur në politikë nga radhët e kësaj ushtrie, janë më të përkushtuarit për ta zhvilluar vendin dhe më të sigurtit për ardhmërinë e tij, që natyrisht do të bëhen edhe partnerë të suksesshëm të politikës moderne të kohës. Pra, le të bëhet një evidencë e vlerave të UÇK-së dhe pastaj në këtë evidencë vlerash parësore në Evropë, le të futet diku nga fundi edhe organizimi i krimit, por që ju serbët dhe megafoni juaj Dick Marty, të na bëni ne shqiptarëve kampionë të krimit në Evropë njerëzit me mend e me logjikë nuk duhet ta besojnë, por ja që paska edhe të tillë.
Megjithatë, unë kuptoj se kur të prishen interesat, bëhesh edhe agresiv. E këtë është e kuptueshme që e bëjnë serbët duke u vënë shqiptarëve gjithfarë epitetesh fyese e akuzuese. Për këtë unë kam pretendimin pse ne nuk merremi me demantimin e tyre dhe me akuza e shpifje të nivelit siç merren edhe serbët. Por zotërinë Marty me urrejtjen e tij të deklaruar patologjike për shqiptarët nuk e kuptoj fare, po fare.
“Territori i Kosovë – Metohisë, për sa i përket krimit të organizuar është ndarë në tri zona kryesore interesi: qarku i Drenicës, i Dukagjinit dhe i Llapit, në të cilat veprimtarinë kriminale e kontrollojnë disa udhëheqës të ish-UÇK-së, tani udhëheqës në strukturat politike, si dhe më parë, bashkëpunëtorë të ngushtë të AKSh-së, të cilët kanë financuar punën e saj”.[3]
Pasqyrë të plotë i ka dhënë Serbia zotëri Martyt për raportin, prej të cilit ai ka shfrytëzuar vetëm ato pjesë që i janë nevojitur për momentin siç është “grupi i Drenicës”, pasi me të tjerët nuk guxon të merret, pasi me ta si me Dukagjinin ashtu edhe me Llapin e ka humbur gjyqin.
“Zona e Drenicës, përgjatë rrugëve strategjike, që lidhin territorin e Malit të Zi me Maqedoninë nëpërmjet Prizrenit, Klinës, Istogut, drejt Mitrovicës, në qarkun e Shalës, paraqet zonën që kontrollon grupi i Drenicës, besnike e Hashim Thaçit. Ky grup merret me tregtinë ilegale të armëve me automjete të vjedhura, me njerëz, me mallra akcizë, para së gjithash me cigare dhe me karburante. Nëpërmjet lidhjeve familjare që ka në këtë zonë, Thaçi kryen drejtpërdrejt kontrollin mbi institucionet vendore, duke siguruar, në këtë mënyrë, kryerjen e veprimtarisë së përmendur kriminale. Familja Thaçi është lidhur me mafien shqiptare, maqedonase, bullgare dhe çeke”.[4]
[1] Obiliç, Millosh, “Engjëjt e zinj të skëterrës kosovare”, dosjet “sekrete”, Beograd, 2004, faqe 28, botimi serbisht
[2] Obiliç, Millosh, “Engjëjt e zinj të skëterrës kosovare”, dosjet “sekrete”, Beograd, 2004, faqe 28 – 29, botimi serbisht
[3] Obiliç, Millosh, “Engjëjt e zinj të skëterrës kosovare”, dosjet “sekrete”, Beograd, 2004, faqe 30, botimi serbisht
[4] Po aty faqe 30
***
Thaçi dhe Haradinaj, siç kanë ditur ta çlirojnë Kosovën, dinë edhe ta mbrojnë atë
Ndoshta shumëkujt do t’i duken të tepërta e të panevojshme shumë citime që janë vendosur në këtë analizë reaguese. Do të ketë shumë të drejtë se edhe unë gjatë punës me këtë material kam shumë momente që më duken të panevojshme disa citime, por i kam vënë në renditje të rrjedhës, sepse qëllimi im është të bëj që lexuesi të kuptojë se ku i ka marrë Dick Marty të dhënat për raportin e tij, që e ka dëmtuar mjaft imazhin shqiptar në opinionin e gjerë ndërkombëtar. Të kuptojnë lexuesit se ky zotëri nuk është tjetër veçse një zë i Serbisë në dritaret e Evropës, për ta nxirë imazhin shqiptar.
Dhe sa shumë lidhje ka sipas Serbisë e zotit Marty, Hashim Thaçi me Drenicën, na jepet në të dyja këto materiale identike, për ta vërtetuar në radhë të parë për vete, por edhe për opinionin “rrezikshmërinë” që ky grup paska për Ballkanin dhe Evropën.
Me thënë të drejtën, mua që ndihem plotësisht njohës i zhvillimeve të luftës e pasluftës, nuk më duket se ky lloj kriminaliteti qëndron. Unë mund të kem pretendime për qeverisje edhe më të mirë prej Hashim Thaçit e bashkëpunëtorëve të tij, por që ai dhe gjithë ata që qeverisin Kosovën sot, të punojnë për ta kriminalizuar vendin e tyre, më duket absurde dhe e papranueshme. Sepse kjo do të ishte sikur ta ndërtosh një shtëpi të bukur për vete dhe pastaj t’i veshë zjarrin. Besoj se nuk ka shqiptar të paktën që të besojë se djemtë që zhvilluan luftën duke bërë sakrificat më të larta për hatër të atdheut, të përpiqen sot ta djegin atë.
Por ja që gjendet dikush, i cili përpiqet të na e njollosë luftën dhe paqen e shqiptarëve. E të tillë që gjenden në Serbi shqiptarët e dinë, por që të gjenden edhe në Evropë na duket një kundërvënie qëllimkeqe.
“Në territorin e komunave të Pejës, Deçanit dhe Gjakovës, që gjenden në zonën e Dukagjinit, vepron i ashtuquajturi grupi i Metohisë të cilin e udhëheq Ramush Haradinaj. Familja Haradinaj është e orientuar në tregtinë ilegale me armët, drogën, mallrat akcizë, me automjetet e vjedhura, etj. Malli kontrabandë shpërndahet në Maqedoni, në jug të Serbisë, në zonën e Rashkës dhe në Mal të Zi, duke shfrytëzuar drejtimin rrugor Pejë – Kulla – Rozhajë. Duke pasur parasysh lidhjet e afërta të Ramush Haradinajt me luftëtarët e ish-UCK-së, të cilët, pas çmilitarizmit të saj, kaluan në radhët e K3K-së., dhe të Shërbimit të Policisë së Kosovës, është në gjendje të realizoj tërthorazi kontrollin mbi kufirin e zonave të përmendura si dhe me veprimtaritë kriminale dhe terroristike në këtë terren”.[1]
Ramush Haradinaj dy herë si rrjedhojë e këtyre akuzave shpifëse u dorëzua për gjykim në Gjykatën për Krime Lufte në Hagë. Të dy herët e fitoi luftën përballë akuzave të ngritura kundër tij. Dy herë Ramush Haradinaj e mundi Serbinë atje në mes të Evropës. Dy herë u kthye kryelartë si një luftëtar i devotshëm në atdheun e tij. Pse zotëri Marty nuk e vlerëson këtë akt, por e paragjykon edhe atë e edhe aktin e fitores dy herë të Fatmir Limës? Por mjaftohet duke thënë se gjykimi nuk është arritur të bëhet si duhet? Siç duket zotëri Marty, sipas instruksioneve të Serbisë, e di mirë atë tregimin popullor, që: “Një kriminel i cili nuk kishte lënë të keqe pa bërë kundër njerëzve që kishte përreth kur i afrohet vdekja i mbledhë këta njerëz që ishin kryesisht bashkëfshatarët e tij dhe u thotë: E kuptoj që në jetën time u kamë bërë shumë të këqija, prandaj do t’u lë amanet që të më ndëshkoni pas vdekjes. Për ndëshkim dua që kur të më varrosni, të më lidhni një litar në qafë e ta lini pjesën e litarit jashtë varrit, që secili ta dijë se pas vdekjes time e keni marrë hakun. Dhe fshatarët pasi vdes krimineli, kur shkojnë për ta varrosur, sipas amanetit, me të drejtë të Zotit, i lidhin litarin në fyt dhe pjesën zgjatuese të litarit e lënë jashtë mbi tokë. Ndodh që ato ditë andej kalon një repart kalorësie dhe kali i një ushtari ngatërrohet në litarin e varrit të kriminelit e rrëzohet. Ndalon reparti dhe shikojnë litarin, gërmojnë varrin dhe shikojnë se litari ishte lidhur në qafën e të vdekurit. Krijojnë bindje se dikush e kishte mbytur dhe varrosur me gjithë litar. Mbledhin gjithë fshatin dhe fillojnë t’i torturojnë për të treguar se kush e ka mbytur të vdekurin. E në këtë moment njëri thotë: Mirë që na nxiu jetën sa ishte gjallë, por po na dërmon kockat me dru edhe i vdekur”. Pra, prej kësaj kuptoj se krimineli edhe në grahmat e fundit mendon si mund të bëjë krim edhe pasi të ketë vdekur. Jam i sigurt se Serbia këtë synim ka pasur dhe ka në gjithë veprimtarinë e saj të djeshme dhe të sotme, por ja që gjeti edhe një Dick Marty që u bë bisht i saj.
“Në zonën e Llapit, duke përfshirë komunat e Gjilanit, Vitinit dhe Kaçanikut, vepron grupi besnik i Rustem Mustafës, të quajtur “Remi” njëri prej komandantëve më me ndikim të UÇK dhe K3K. Ky klan është i orientuar në veprimtarit e lidhura për kontrabandën e drogës dhe është në lidhje të ngushtë me familjen Haradinaj”.[2]
Është për të vlerësuar që nuk është lënë kuadër i lartë i drejtimit të luftës çlirimtare të Kosovës që nuk është përgojuar si drogmen, trafikant, kriminel, terrorist etj., duke tentuar t’i njollosin të gjithë. Të krijohet ideja që këta djem që bënë luftën nuk paskan pasur tjetër qëllim vetëm të kryenin vepra të tilla. Po pse duhet të kryenin vepra të tilla këta duke u vënë përballë forcave ushtarako-policore serbe e duke luftuar kundër tyre? A nuk ishte më e lehtë të merreshin me këto lloj krimesh pa qenë të përballur me forcat e pushtuesit e, ndoshta, duke punuar bashkë me ta, siç edhe ka momente kur njerëz të ndryshëm të kombësisë shqiptare kanë bashkëpunuar me serbët e me Serbinë edhe për këto rrugë?
Por jam i bindur se synimi nuk është që të thuhet diçka që qëndron, qëllimi është të hidhet baltë mbi gjithçka që kombi shqiptar e konsideron të çmuar, që opinioni të “kuptojë e bindet” se shqiptarët atë që e kanë më të shenjtë e kanë kriminale dhe prej kësaj rrjedhë arsyetimi se me shqiptarët mund të kuptohesh vetëm duke i shtypur, duke i masakruar, duke i vrarë dhe duke i mbajtur të shtypur e në skllavëri.
Familja Lluka është e lidhur me mafinë shqiptare dhe merret me kontrabandën e armëve, të drogës dhe me mallra akcize (cigare, benzinë), vepron nën mbulimin e Hashim Thaçit dhe të Ramush Haradinajt dhe të mafies shqiptare.[3]
Është i pa pranueshëm fakti që gjithkund nëpër Kosovë na qenkan të lidhur Hashim Thaçi dhe Ramush Haradinaj. Ata siç duket e paskan çliruar Kosovën për ta bërë vend të krimit. A nuk kanë pasur mundësi kur kanë gjithë këtë fuqi që e deklaron Serbia, që pikërisht Serbinë ta kishin kriminalizuar? A nuk paska pasur mundësi familja Lluka me gjithë atë fuqi ekonomike që bashkë me këta dy njerëzit që vërtetë janë të fuqishëm por jo për krime, nëse do të ishin të tillë ta shtrinin fushën e veprimit në Serbi e ta kriminalizonin në të gjithë hapësirën e saj?
Ky lloj arsyetimi mua më duket sikur të ndodhte një rast kur: një njeri pasi ndërton një shtëpi për vete, e kthen atë në çerdhe minjsh. A ka mundësi që i zoti i shtëpisë ta kthejë shtëpinë e tij në çerdhe minjsh? Shqiptarët nuk e imagjinojnë një gjë të tillë, ndoshta serbët dhe zoti Marty po.
Duhet ditur se Hashim Thaçi dhe Ramush Haradinaj, po të ishin të tillë që të aktivizonin mafie, pa tjetër që do ta aktivizonin në Serbi. Edhe unë po të kisha një ambicie të tillë këtë do të kisha bërë, por kurrë ndër familjarët e mi e ndër shqiptarët, ashtu sikur edhe ata kurrë dhe për asnjë arsye nuk do ta kthenin Kosovën në terren mafieje. Por ne nuk mendojmë e veprojmë si serbët, ndaj edhe nuk na shkon në mendje të bëjmë akuza të tilla as për ta. Megjithëse mirë është që të përfitojmë nga kjo përvojë e “vyer” serbe e të fillojmë të shpifim edhe ne ashtu sipas përvojës që serbët e kanë shumë të sofistikuar. Por jam i sigurt se ne nuk kemi nevojë të shpifim, ne kemi nevojë vetëm të evidencojmë me besnikëri ato që serbët kanë bërë në trojet shqiptare, në Kosovë e mbi shqiptarët për një shekull, ato është mirë t’i evidencojë edhe zotëri Marty, sa merret me shpifje kundërshqiptare. I shkreti, s’ka ç’bën, është me shërbim, pasi paguhet për shpifje, s’ka alternativë tjetër. Ai që t’i blen brekët edhe t’i heq sa herë të dojë vetë, ashtu edhe atij ia ka blerë brekët Serbia e ia heq sa herë të dojë, ndaj do ta hedhë vallen si duan serbët.
Ndërsa Hashim Thaçi dhe Ramush Haradinaj, ashtu siç kanë ditur ta çlirojnë Kosovën e ta krijojnë shtetin e popullit të tyre, do të dinë edhe ta mbrojnë nga mafia që e dëshirojnë shumë armiqtë e shqiptarëve e dhe nga shpifjet serbe e të zotëri Martyt, zëdhënësit më të fuqishëm të Serbisë “demokratike” pas millosheviçiane.
“Familja Selimi, së bashku me familjen Lluka kontrollon kontrabandën e armëve, të drogës dhe automjeteve në zonën e Dukagjinit. Gjithashtu merret dhe me taksat ilegale të shqiptarëve si dhe me frikësimin e kundërshtarëve politikë. Janë të lidhur me Hashim Thaçin”.[4]
Siç shikohet, ashtu si edhe në raportin e zotit Marty, Hashim Thaçi kurrë nuk është marrë me asgjë tjetër veçse me koordinimin të kriminelëve dhe të rrjetave kriminale nëpër Kosovë, në trojet shqiptare, në Ballkan e në Evropë, bile në disa raste edhe në Amerikë. Shumë i zoti Hashim Thaçi. Mirë që nuk kanë shkruar se me ato para këta qeverisës të Kosovës i kanë bërë rrugët asfalt edhe nëpër bjeshkë. A ndoshta me këto para po i bëjnë edhe autostradat anembanë vendit të tyre. Ndoshta, pres të na e thotë Serbia e Dick Marty dhe Gjykata Speciale që po na i lodhë djemtë pa lidhje thonë pleqtë.
“Familja Kelmendi është në lidhje të ngushtë me Ramush Haradinajn dhe kontrollon kontrabandën e drogës e të naftës, tregtimin e njerëzve, si dhe pastrimin e parave në zonën e Pejës”.[5]
Po Ramushi ku i përdorë gjithë ato para? Atij deri tani pas lufte pak i është lënë kohë të tregojë se sa shumë di të punojë për vendin e tij, siç ka treguar se sa shumë di të luftojë si luftëtar e komandant në radhët e Ushtrisë Çlirimtare të Kosovës. Dhe që nuk i është lënë kohë, fajtorë janë Serbia dhe Dick Martat e Evropës që shpifin pa ndërprerje kundër tij, si edhe kundër të gjithë atyre të e pështynë Serbinë në surrat me gjithë potencialin masiv njerëzor e materialo – teknik luftarak që përdori kundër tyre.
“Familja Elshani merret me kontrabandën e armëve dhe të benzinës. Kontrollon zonën e Vitomircës dhe është e lidhur me Ekrem Llukën e XhavitHalitin”.[6]
[1] Obiliç, Millosh, “Engjëjt e zinj të skëterrës Kosovare”, “dosjet “sekrete”, Beograd, 2004, faqe 31, botimi serbisht
[2] Obiliç, Millosh, “Engjëjt e zinj të skëterrës Kosovare”, “dosjet “sekrete”, Beograd, 2004, faqe 31, botimi serbisht
[3] Obiliç, Millosh, “Engjëjt e zinj të skëterrës Kosovare”, “dosjet “sekrete”, Beograd, 2004, faqe 31, botimi serbisht
[4] Obiliç, Millosh, “Engjëjt e zinj të skëterrës Kosovare”, “dosjet “sekrete”, Beograd, 2004, faqe 31, botimi serbisht
[5] Po aty faqe 31
[6] Po aty faqe 31
***
Serbët kanë aftësi të veçanta për të indoktrinuar me shpifje
Dihet, askush nga udhëheqësit e luftës çlirimtare nuk duhet lënë pa pjesë të ardhurash financiare në rrugë kriminale. Kështu që nuk mund të lihet pa pjesë edhe Xhavit Haliti si ideolog dhe udhëheqës i spikatur i luftës për çlirimin e Kosovës. Ndaj unë nuk habitem që edhe atij ia kanë gjetur dikë, për të bashkëpunuar që të fitojë të ardhura, që nuk dihet pse i përdorë, por që tani për tani akoma nuk ia kanë gjetur vendin se ku i mban paratë, veçse ia kanë gjetur bashkëpunëtorët.
Sa të lehtë e ka pasur zotëri Marty ta përpilojë raportin për Evropën? Sa të mbushur e ka agjendën kriminale duke u mbështetur në shpifjet dhe akuzat e Serbisë? Por a do të mund ta mbrojë këtë raport tani që u themelua tribunali për krimet e luftës së UÇK-së?
Në këtë moment më kujtohet libri i presidentit Bill Klinton “Jeta ime”, botuar pas dorëzimit të detyrës së presidentit të ShBA-së. Ai në librin e tij, ndër të tjera, trajton edhe çështjen e emërimit të prokurorit të pavarur për hetimin e presidentit të ShBA-së. Unë përmbledhtas do të bëj një pasqyrë të asaj që shkruan presidenti Bill Klinton: “Kur mora detyrën e presidentit, – tregon ai – Partia Republikane, meqenëse kisha qenë për rreth 16 vjet në detyra shtetërore i zgjedhur me votat e popullit, kishte krijuar mendimin se unë diku duhet të isha korruptuar, ndaj kërkoj që të emërohej një prokuror i pavarur për të hetuar presidentin. Unë – thotë Bill Klinton – duke marrë në analizë veprimtarinë time dhe duke ditur se kisha punuar me ndershmëri, e bëra dekretimin e këtij prokurori të pavarur për të hetuar presidentin, por duket se bëra gabimin më fatal të jetës time, pasi: ky prokuror i pavarur, për 8 vjet, përveç që shpenzoj mbi 65 milion dollarë të taksapaguesve amerikanë, për 8 vjet më nxiu jetën mua dhe familjes time, mori nën hetim të gjithë njerëzit që kishin pasur fatin e keq në jetë që më kishin njohur mua, kishin qëndruar apo kishin pirë një kafe me mua, të cilët i trajtoi me një presion të madh për të treguar çfarë dinin për jetën time. Ashtu sikurse burgosi katër persona, (presidenti Klinton u përmend edhe emrat) vetëm pse nuk kishin pranuar të firmosnin deklaratat që u kishte vënë përpara për të firmosur, në të cilat shpifej kundër presidentit”.
E tregova këtë episod, që të kuptojnë të gjithë luftëtarët dhe udhëheqësit e komandantët e UÇK-së e të luftës çlirimtare të Kosovës, se edhe ky tribunali i pranuar politikisht nga Kosova, do të jetë e do të veprojë si ai prokurori i pavarur që hetoi presidentit Klinton, do të persekutojë e keqtrajtojë shumë njerëz sidomos pjesëmarrës të luftës, pse nuk do të shpifin kundër komandantëve të tyre, që Serbia do t’i njollosë, sepse ajo me shpifjet e saj i ka njollosur me kohë, por në fund e vërteta ka për të qenë madhështore ashtu siç ka qenë madhështore Ushtria Çlirimtare e Kosovës dhe lufta e saj.
“Familja Kitaj është grupi kriminal udhëheqës, që kontrollon zonën ndërmjet Klinës dhe Istogut. Është e shkathët në kontrabandën e automjeteve të vjedhura dhe në shitjen e lëndëve plasëse në Kosovë – Metohi”.[1]
Besoj nuk çuditet askush që nuk lihet asnjë pëllëmbë e tokës së Kosovës pa u mbuluar me rrjet kriminal nga më monstruozët. Kjo nuk bëhet pa qëllim. Edhe atje ku nuk ka emra që duhen goditur duhet të ketë patjetër krim të organizuar, këtë objektiv ka vënë Serbia dhe përdorë të gjitha mjetet për ta bërë sa më të besueshëm, sepse gjithkush e në radhë të parë Evropa dhe populli shqiptar duhet të binden se Kosova nuk mund të ketë të ardhme pa Serbinë. Se pa Serbinë Kosova nuk mund të zhvillohet, se e mbyt krimi e kriminelët, se është e destabilizuar dhe se askush nuk mendon për të mirën e saj veç Serbisë.
“Klani kriminal Suma vepron në zonën e Kaçanikut. Krahas reketimit dhe shantazhit, merret me kontrabandën e armëve dhe të drogës nga Maqedonia në Kosovë – Metohi e anasjelltas. Anëtarët e klanit Suma janë të lidhur me grupin që udhëheq Rrustem Mustafa, i quajtur “Remi” nga Podujeva”.[2]
Nuk mund të lihet pa iu vënë emri edhe Kaçanikut, pasi andej kalon rruga për në Maqedoni dhe patjetër që edhe atje meqë ka rrugë duhet të ketë edhe krim edhe kriminelë. Dhe janë shpifje të tilla që mjaftë djem të luftës kanë vuajtur deri sot e do të vuajnë edhe më tej, deri kur të ndërgjegjësohen evropianët e ndershëm, (jo zotëri Marty se ai është i ndërgjegjësuar plotësisht por është me mision) e t’i thonë Serbisë dhe gjithë atyre që abuzojnë me shpifje të tilla – mjaft më. Që ky moment do të vijë këtë unë e di mirë dhe dua të jenë të bindur të gjithë shqiptarët, por deri kur të vijë ky moment djemtë e luftës do të na i lodhin pikërisht me shfaqje të tilla monstruoze.
“Klani Syla bashkërendon zinxhirin e krimit të organizuar, që vepron në territorin e Kosovë – Metohisë dhe të Maqedonisë, në planin e importit ilegal të armëve, municioneve e pajisjeve të tjera”.[3]
Bile unë mendoj se Klanit Syla i kanë lënë pak hapësirë. Vetëm ka një gabim të vogël, ai nuk është klan, por rrjet kombëtar, që do të qëndroj gjithmonë i freskët, për të mos e lejuar Serbinë të bëjë çfarë do. Veçse jo me kriminalitet, siç e vesh Serbia por me veprimtari kombëtare në paqe e në luftë, për të mos lënë asnjë pëllëmbë tokë shqiptare nën sundimin skllavërues e kolonizues të Serbisë. Mua nuk më impresionon fare mënyra se si flet Serbia, por më shqetëson fakti që në Evropë ka akoma njerëz të veshur edhe me pushtet politik që i marrin seriozisht ato që thotë Serbia, deri kur ta kuptojnë se ajo mashtron dhe ka mbetur në politikën mesjetare.
“Anëtarët e familjes Agushi veprojnë në zonën e Klinës. Merren me shantazhin e parave nga shqiptarët, të cilët janë kërcënuar me dhunë të mbledhin paraprakisht pronat dhe pasuritë serbe të grabitura në komunën e lartpërmendur, si dhe me shantazhin e blerësve potencial”.[4]
A ka tjetër zonë që duhet përgojuar? Të gjithë lexuesit duhet të nxjerrin vetë konkluzione për të vlerësuar banalitetin e të gjitha deklarimeve të Serbisë e të zotit Marty.
Nga sa shkruhet duket sikur në Kosovë nuk bëhet asnjë punë prej kur aty nuk sundon Serbia. A ka njeri të paktën ndër shqiptarët që e beson një gjë të tillë? Unë besoj se çdo shqiptar ka fuqinë të japë përgjigjen e duhur për të gjitha shpifjet që vihen në evidencën e këtyre deklarimeve serbe dhe të rinovuara prej zotit Marty.
“Klani Geci është aktivizuar në zonën e komunës së Pejës, Mitrovicës, Serbicës dhe Prishtinës. Merret me kontrabandën e benzinës dhe bashkëpunon me Xhevat Halitin dhe familjen Selimi”.[5]
Lidhje të çuditshme, që askush me arsye të shëndoshë nuk arrin t’i asimilojë. Sidoqoftë, Serbia duke bërë këto arsyetime shpifëse ka arritur të krijojë një mjegullnajë që t’i bëjë me dyshim të gjithë ata që nuk e njohin gjendjen. Dhe qëllimi i saj ndoshta është edhe ky, që të gjithë të painformuarit të marrin kallëp çfarë thotë Serbia dhe t’i konsiderojnë të vërteta duke paragjykuar djemtë e luftës, që realisht unë kam konstatuar edhe se ka të tillë të pa informuar në hapësirat shqiptare.
Serbët me shpifjet luajnë fortë. Unë kam konstatuar se ata kanë aftësi të veçanta për të indoktrinuar me shpifje, jo vetëm qytetarët e zakonshëm, por edhe intelektualët e njohur e shkencëtarët. Prandaj mos të na duket i çuditshëm fakti që serbët kur bëjnë shpifjet kundërshqiptare i ndërtojnë në mënyrë të tillë që të jenë sa më të besueshme. Ata nuk harxhojnë kohë dhe mund e vlera monetare për t’i harxhuar, por për të marrë efektivitetin e tyre, ne e dimë se ata këtë mjeshtri e kanë mjaft të zhvilluar. Prandaj edhe duhet të gjejmë mënyrat më të sofistikuara për demontimin e tyre e për t’u hapur sytë jo vetëm shqiptarëve të indoktrinuar, por edhe evropianëve me fakte e me forcë argumenti, që të mund të shohin shpifjet e t’i ndajnë nga të vërtetat. Ne për këtë punojmë pak, prandaj edhe serbët zbatojnë atë thënien e kurvës: “mbama nën kopilin, t’i them asaj para se të më thotë”.
“Klani Babalia vepron në zonën e Gjakovës është në bashkëpunim me Ramush Haradinajn dhe merret me kontrabandën e benzinës nga Shqipëria dhe me tregtinë ilegale të narkotikëve”.[6] Ramushi tashmë ia ka treguar vendin Serbisë, i ka arsyetuar të gjitha veprimet e veta. Do të vijë dita që të gjithë do të vijnë nga përballja gjyqësore ashtu si Ramushi e Fatmiri dhe do t’i tregojnë vendin Serbisë dhe të gjithë Dick Martëve të saj. “Nga mesi i viteve ’90-të, kriminelët shqiptarë nga ShBA kishin filluar të ndihmonin UÇK-në në Kosovë – Metohi me grumbullimin e mjeteve financiare, me të cilat u blenë armë për nevojat e këtyre organizatave terroriste. Grumbullimi i mjeteve, në fillim, ishte kryer fshehurazi, kurse më vonë edhe në ShBA ishte e hapur filjalja e fondit “Atdheu thërret” i cili, nëpërmjet llogarive bankare në SHBA, Kanada dhe në shumë vende evropiano-perëndimore, ua drejtonte mjetet financiare pjesëtarëve të UÇK-së. Krahas kësaj, paratë barteshin edhe tërthorazi nëpërmjet emigrantëve-korrierë, që vinin në krahinën e Kosovë – Metohisë”.[7]
Që edhe në ShBA shqiptarët mund të bëjnë ligjin kriminal, këtë kanë guximin ta thonë vetëm serbët dhe Dick Marty. Unë kam qenë në ShBA në vitin 1996 dhe mund të them se edhe për dy pistoleta lodër prej kauçuku si të kaubojsve të hershëm, që i kisha blerë për dy djemtë që t’i sillja si dhuratë, më kanë detyruar të hapë bagazhet e t’i kontrollojnë. Ndërsa serbët mund ta kenë provuar se si kalohen armë nga ShBA-të, por mos ta tregojnë si barsoletë për shqiptarët, le ta tregojnë si provë të bërë prej tyre. Por nuk besoj se do të kenë sukses, ndërsa si barsoletë – akuzë shpifëse për shqiptarët është fare lehtë të deklarohet. (Vijon)
[1] Obiliç, Millosh, “Engjëjt e zinj të skëterrës kosovare”, “dosjet “sekrete”, Beograd, 2004, faqe 32, botimi serbisht
[2] Obiliç, Millosh, “Engjëjt e zinj të skëterrës kosovare”, “dosjet “sekrete”, Beograd, 2004, faqe 32, botimi serbisht
[3] Po aty faqe 32
[4] Po aty faqe 32
[5] Obiliç, Millosh, “Engjëjt e zinj të skëterrës kosovare”, “dosjet “sekrete”, Beograd, 2004, faqe 32, botimi serbisht
[6] Po aty, faqe 32
[7] Obiliç, Millosh, “Engjëjt e zinj të skëterrës kosovare”, “dosjet “sekrete”, Beograd, 2004, faqe 32, botimi serbisht
VIJON …
__________
KUDUSI LAMA UÒªK-ja, RAPORTI I DICK MARTIT DHE GJYKATA SPECIALE (X)
https://pashtriku.org/?kat=43&shkrimi=10483
