SHQIPTAR OSEKU: NË VEND TË LUTJES

Pashtriku.org, 28. 02. 2014 – Shqiptar Oseku u lind më 1970 në Gjakovë, në një familje me biografi. Shkollimi superior iu ndalua nga autoritetet e atëhershme jugosllave. U arratis me familjen në Suedi më 1989, pas demonstratave kundër suprimimit të autonomisë. Ka studiuar shkencat sociale në Stokholm, dhe ka shërbyer në ish Zyrën e Kosovës. Merret me publicistikë dhe poezi. Shqiptari, në 16 vjetorin e masakrave në Likoshan, Qirez, Prekaz (që ndodhën më 28 shkurt dhe 5-7 shkurt 1998)…, ka shkruar një poezi më titull” NË VEND TË LUTJES”. Ta lexojmë së bashku. (sh.b)

* * *
NË VEND TË LUTJES

Mos i harro. Mbylli sytë.
Merr frymë thellë, me dorë në zemër,
e kujto gjithçka:
ditë, datën, vendin, orën e saktë.
Diellin që digjej në perëndim,
mbi kodrat e Likoshanit,
Qirezit, Prekazit,
mbi plepat në Qyshk, mbi kulmet
në Junik,
mbi selvitë e Ҫabratit e në muret
në Gjakovë.
Gjithçka kujto!
Kujto të shtënat.
Kujto si krisin tjegullat e tullat
kur kallen në flakë.
Kujto si u plas zemra
trerëve kur bien pa shpresë
mbi njerëzit e shtëpisë.
Erën ngulfatëse të tymit,
të mishit e gjakut të njeriut.
A po të kujtohet?
Kujtohu more!
Kujto emrat, një nga një.
Kujto thirrjet për ndihmë,
e vajin e pleqve.
Mbaje mend fjalën, timbrin e zërit,
amanetet.
Mbaje mend kur e lëshuan
frymën e ngrohtë:
që aty nisën të ftohen, të ngrihen.
Kur e dhanë gramën e fundit,
mbaje mend.
A po i mban mend?
Kujto bebëzat e gjera, terrin e tyre,
tmerrin në to.
Kujto ankthin kur u fikej ngadalë
shkëndija e mbramë.
Mbylli sytë, të lutem!
Mbaje në mend atë që ndodhi pastaj,
xhaketën e grisur,
e këpucën
si u gjet e shtypur në shkurre.
Mbaje mend fëmijën
që qante
të trupat cung në hendek,
oj nanë, oj nanë, çohu.
Në prag të marsit, në vend të lutjes,
mos harro. Mbylli sytë.
Merr frymë thellë, me dorë në zemër,
e kujto gjithçka.
Mbaj mend, të lutem.
Kjo është krejt çka na ka mbetur
prej tyre.

Stokholm, 28. 02. 2014

*********************
Edhe unë i bashkohem lutjes së poetit Shqiptar Oseku!
O VËLLEZËR MBANI MEND, JU LUTEM: KRIMET E PANDËSHKUARA NË KOSOVË!

MASAKRA E LIKOSHANIT, ҪIREZIT DHE PREKAZIT TË POSHTËM – KRIME TË PANDËSHKUAR!
HAPE: http://www.pashtriku.org/?kat=63&shkrimi=1349

* * *
http://pashtriku.beepworld.de/krimet_kosove_9899.htm

Total
0
Shares
Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Postime të Lidhura