Tiranë, 21. 11. 2016: Edhe pse jemi vend anëtar i NATO-s, tash e 6 vjet, krahasuar me vendet përreth, ndoshta jemi vendi më i pambrojtur, dhe kjo nuk është diçka e zakonëshme. Trasformimin e pranuam të gjithë, por jo kurrë shkatërrimin. Të jesh i përgatitur për mbrojtje, pavarësisht konjukturave politiko – ushtarake dhe kushteve konkrete, është më shumë se sa zgjuarësi, është tërësisht atdhedashuri. Është kjo që i ka munguar klasës politike, e cila gradualisht e solli mbrojtjen në këtë nivel minimal. Abuzimi me objektet ushtarake, të cilat një pjesë e mirë kanë pasur sistem antibërthamor, kthimi i tyre sot për muze, turizëm objekt dhe tallje, është një mendjelehtësi që mund ta paguajmë shumë shtrenjtë. Krahasimi që mund të bëjmë sot me Zvicrën është kthyer në një ëndërr.
Nëse do të flasim për buxhetin ushtarak të saj dhe përgatitjen që ajo bën për luftë me të gjithë llojet e strukturave dhe fortifikimin e përsosur gjithpërfshirës, do të ishim si nata me ditën.
Ҫfarë e detyron këtë vend neutral që të orientohet në këtë rrugë?
Që sa kohe një turmë mendjelehtë po predikon paqen, kur bota është përfshirë në kaos dhe pasojat po i vijnë rrotull Ballkanit dhe Shqipërisë?
Që sa kohë njerëzit që kanë drejtuar dhe drejtojnë Shqipërinë nuk kanë kurajo të pranojnë që, janë me një buxhet cop copë dhe nuk kanë asnjë mundësi modernizimi dhe paisjesh për FA?!
Që sa kohë po mendohet që të përbaltet gjithçka dhe të braktiset, kur dihet fort mirë që objektet ushtarake janë pasuri kombëtare dhe asetet e tyre i takojnë gjithë popullit?
Kemi një strukturë shtabesh, por realisht forca operative operacionale është minimale. Kujt do t’ia lejë barrën politika në rast të një situate kaosi, apo si përherë vetëm popullit që të mbrojë veten si të mundet?! Na mbyti pacifizmi dhe kur krahasohemi me vendet kufitare, duam “të qetësojme” veten me antarësimin në NATO. Për këtë çështje delikate, personalisht lutem, lutem që unë të mos kem të drejtë, le të dal krejt ndryshe, por që të flasësh për gjendjen reale dhe të vërtetën kur është koha, ky nuk është mëkat, por një detyrim kombëtar.
Ne jemi bërë cop copë, ne nuk duam veten tonë, ne dim vetëm të mburremi dhe pak të punojmë për vendin tonë, ne po i kthejmë kurrizin vendit, po e braktisim atë, sepse nuk jemi të zot ta detyrojmë politikën të kthejë kursin në interesin qytetar dhe kombëtar. Një çerek shekulli është e mjaftueshme për të nxjerrë një përfundim të saktë, le të jetë dhe i hidhur.
Edhe sa kohë do të presim dhe të lejojmë që të vazhdojnë të eksperimentojnë mbi ne, duke na zhvatur pasuritë çdo ditë?
Kujt i shërben kjo situatë dhe pse Shqipëria duhet të mbrrinte deri në këtë pikë?
Në Shqipëri dhe në Kosovë çështjet e sigurisë kombëtare përshkohen ende nga një frymë e theksuar pacifiste, e cila po e lë vendin zbuluar. Siguria kolektive është njera anë, siguria e mbështetur në resurset dhe strukturat e mirëorganizuara të vendit për të garantuar mbrojtjen shtetërore, është tjetër gjë. Është kuptuar keq anëtarësimi i Shqipërisë në NATO, jo nga specialistët profesionist, por nga politika pacifiste, që në një situatë të vështirë do të jenë të parët që do të kërkojnë strehimet për të shpëtuar kokën e tyre.
Në çështjet e sigurisë ka partneritet, por jo përkulje dhe servilizëm mbi garanci pa formë dhe përmbajtje. Kjo tallje dhe ky shkatërrim total në këto 25 vite të elementëve të mbrojtjes, është një nga fatekqësitë më të mëdha që na kanë ndodhur. Mjerisht, mjerisht këtu po flasim vetëm për shtetin shqiptar, se sa për popullsinë shqiptare në trojet etnike, ajo ka mbetur tërësisht në mëshirë të fatit dhe vetëm në varësi të ndërkombëtarëve.
Akoma nuk po bindemi në fjalën e urtë të popullit tonë, që “vetëm i zoti do ta nxjerrë gomarin nga balta”. Urojmë që, përvoja mbi strukturimin e forcave speciale të orientohet gradualisht në strukturat e tjera, të cilat duhet të plotësojnë kuadrin e një Force të Armatosur moderne dhe me kapacitete të mjaftueshme operacionale në mbrojtjen e vendit në kuadrin e sigurisë kolektive. Shteti duhet të kthejë sytë nga siguria, e lënë deri tani në periferi, duke u mbështetur në konceptin se, jo çdo gjë do ta presim nga të huajt, por të jemi dinjitoz brenda NATO-s, duke i shërbyer me atdhedashuri dhe profesionalizëm rritjes së misionit politiko ushtarak të strukturave të Sigurisë dhe kapaciteteve për Mbrojtje. Zvicra është një shembull konkret që flet shumë, shumë, shumë….edhe për ne. Faleminderit.
SULEJMAN ABAZI (NESHAJ) Tiranë, më 20/11/2016.
______________________
SHTOJCËE E PASHTRIKU.ORG
ZVICRA SI VEND NEUTRAL KA 300.000 BUNKERE DHE 5100 STREHIMORE PUBLIKE!
Zvicra është politikisht vend neutral, por ende ka një ushtri mjaft të fortë. Nëpërmjet Alpeve zvicerane mund të gjenden bunkerë të fshehur ushtarakë, si përzierje me peizazhin përreth.Disa janë kamufluar si shkëmbinj të mëdhenj apo hambare që hapen në raste emergjence për të zbuluar topat dhe mitralozët e rëndë. Çdo urë e madhe, tunelet, rrugë dhe hekurudhat janë vendosur të jenë në gjendje të dekompozuar qëllimisht kur është e nevojshme. Rrugët mund të konvertohet në pista aeroplanësh.Vendi ka strehimore në rast të fatkeqësive bërthamore në çdo shtëpi, institucione, spitale dhe 300,000 bunkere dhe 5100 strehimore publike që mund të akomodojnë gjithë popullsinë zvicerane nëse është e nevojshme. Zvicra gjithashtu ka një nga ushtritë më të mëdha me 200 mijë ushtarë aktivë dhe 3.6 miliardë franga dispozicion. Çdo shtetas zviceran nën 34 vjet është ushtar rezervë. Ushtarëve u janë të lejuara të mbajnë armë në shtëpi. Në qoftë se dikush u përpoq për të sulmuar Zvicrën, ata do të gjejnë një komb të armatosur deri në dhëmbë.Ekziston një thënie nga një oficer zviceran, i cili ka deklaruar: “Zvicra nuk ka ushtri, Zvicra është ushtria vetë”. Vendi nuk ka qenë i përfshirë në konflikt të armatosur për 200 vjet. /albinfo/
