Pashtriku, 19 shtator 2020: Zotëri Dick Marty, kur do të turpëroheni e kërkoni falje për ato që keni shkruar?
Aktualisht i vetmi klan që është bërë i pranishëm në trojet shqiptare është klani Dick Marty. Por as ai klan i rrezikshëm, megjithëse i dëmtoi mjaft shqiptarët, nuk i tremb as që ka për t’i trembur ndonjëherë.
Por ju doni me çdo kusht t’i siguroni informacionet që ju interesojnë sipas planit të akuzave e shpifjeve që keni programuar, për ta bërë raportin tuaj, prandaj edhe nuk përtoni të veproni duke regjistruar biseda nëpër tubime të ndryshme, nëpër dhoma ndenjeje e takime gjoja të rastit të personave të tretë, me njerëz që mund të jenë të prirë për të thënë gjëra nga më të ndryshmet, për të treguar se dinë diçka, prej të cilëve edhe mund të gjenden në vende të ndryshme. E njerëzit tuaj të tretë nuk di me çfarë shpërblimesh jua kanë sjellë incizimet që ju i quani me interes. Mua kjo ma kujton kohën e Titos e të Millosheviqit, sepse edhe ata për t’i dënuar ata që kishin dëshirë t’i dënonin, futnin pikërisht njerëz të tillë nëpër ndeje të ndryshme dhe sipas këtyre të dhënave portretizonin njerëzit e rrezikshëm që donin t’i çlironin trojet shqiptare të pushtuara dhe i dënonin. Mos mendoni se keni shpikur ndonjë metodë të re, kjo metodë është shumë e njohur për shqiptarët. Dhe ta dini se me metoda të tilla pushtuesi jugosllav e serb, ka pushkatuar, varur, masakruar e zhdukur me dhjetëra mijëra shqiptarë. A vërtet me këtë metodë mendon se do t’i dënosh shqiptarët?
Ju zotëri bëheni qesharak kur merrni përgjegjësi të jeni i gjithanshëm e, mbi të gjitha, edhe korrespodent i luftës dhe ekspert ushtarak, duke dhënë definicionin në pikën 29, kur shpreheni: “… grupimet armiqësore rrallë janë ndeshur në luftime të armatosura përgjatë ndonjë vije frontale të çfarëdoshme”. Nga i nxirrni këto zotëri? A nuk e dini se në Kosovë, Serbia ka pasur vetëm forca tokësore 72 mijë ushtarë dhe policë, me të gjitha kapacitetet e armëve tokësore, shto këtu edhe helikopterët e shumtë dhe gjithë aviacionin gjuajtës – bombardues e, krahas këtyre, ka sjellë dhe ua ka shpërndarë 63 mijë armë civilëve serbë nëpër Kosovë, që t’i përdornin sipas organizimeve? Pa folur edhe për mbi 13 mijë paramilitarë e kriminelë të nxjerrë nga burgjet vetëm për të luftuar në Kosovë e ato qindra a ndoshta më shumë agjentë të UDB-së. Të gjitha këto forca pse ishin në Kosovë? Njëkohësisht po ju informoj se edhe Ushtria Çlirimtare e Kosovës në fuqinë maksimale të saj ka pasur rreth 60 mijë trupa luftëtarësh. Sipas jush, këto mbi 200 mijë njerëz të armatosur nuk janë marrë me asgjë. Jo zotëri gaboni. Për 20 muaj të luftës publike të Ushtrisë Çlirimtare të Kosovës, gjithnjë janë zhvilluar luftime midis forcave të pushtuesit dhe çlirimtarëve, dhe gjithnjë janë zhvilluar beteja frontale. Në atë kohë lufte duhet të njiheni me zonat e çliruara nga UÇK-ja e në disa raste edhe të ripushtuara nga armiku, si mund të bëhen ndeshje luftarake pa përballje frontale të forcave pjesëmarrëse në luftë? Keni mashtruar veten zotëri, ose ju intereson të vetëmashtroheni ç’ka mund të jetë më e mundshme, por ju nuk e njihni as historinë shqiptare, as kombin shqiptar, ju kryet një mashtrim që ia vlejti dhe kaq.
Në pikën 30 të raportit kaloni lehtë me deklarimin: “Dhunimet e urryera të bëra nga ushtarët dhe forcat e policisë serbe, që përpiqeshin të nënshtronin, dhe më pas të dëbonin popullsinë shqiptare të Kosovës, janë të njohura publikisht dhe të përcaktuara më se qartë”. Sa lehtë të shprehësh një gjenocid të pashembullt në historinë njerëzore, vetëm me dy radhë në një raport ndërkombëtar, duke e quajtur çështjen të përfunduar. Jo mor zotëri, ju nuk mund t’i imagjinoni krimet e dhunimet e bëra nga serbët në Kosovë dhe duhet të dini se do të duhet të kalojë aq kohë sa të largohen nga kjo botë edhe ata që kanë lindur prej dhunimeve, që të mund të flitet me gjuhën që flitni ju. Por ju, siç duket, ju është fikur çelësi i ndjenjave njerëzore dhe qytetarinë e kulturën kombëtare dhe shoqërore i konsideroni thjesht një element zbukurimi.
Duke lexuar raportin tuaj, mua që e njoh mirë situatën e kohës së luftës dhe i njoh mirë shumë prej luftëtarëve e komandantëve të Luftës Çlirimtare të Kosovës, më mbushet gjoksi me mllef për shëmtinë me të cilën shpreheni, por unë do të përpiqem të qëndroj sa të mundem i qetë në vlerësimet e mia për këtë raport, pasi e kam kuptuar plotësisht se ju jeni vetëm ai që e keni firmosur dhe nuk keni vënë asnjë germë në të me lapsin tuaj. Ky vërtet është me informacione që unë i njoh që prej Millosheviqit. Por kurrë nuk më kishte shkuar mendja se mund të gjendej dikush në Evropë që të servirte informacione të tilla e aq më shumë për organizata të tilla madhore botërore, siç është Këshilli i Evropës.
Në pikën 31 ju keni zbuluar prova që janë në kontradiktë me “…me pamjen joshëse të Ushtrisë Çlirimtare të Kosovës, paraqitur si një ushtri guerrilasish që kanë luftuar trimërisht për të mbrojtur të drejtën e bashkëpatriotëve të tyre për të jetuar në territorin e Kosovës”. Nuk di si keni kaq guxim sa të njollosni një ushtri çlirimtare të një populli, lavdinë e një kombi, këtë përveç serbëve deri tani nuk e ka bërë askush veç jush. Si mund të tentoni të quani jo të vërtetë një ushtri të tërë? Vërtet duhet të jeni paguar rëndë për këtë që keni shkruar, nëse e keni shkruar. Ndërsa në pikën 32 shpreheni: “Nëse është e pamohueshme se shumë ushtarë të guximshëm, të gatshëm për të shkuar në luftë e për t’i bërë ballë kundërshtarit, për të vdekur, në rast nevoje, për kauzën e një atdheu kosovar shqiptar të pavarur, ishin të pranishëm në radhët e UÇK-së, përsëri këta nuk përbënin detyrimisht shumicën”. Pra, sipas jush, shumica çfarë ishin? Apo siç shpreheni edhe më parë “ekzekutues të thjeshtë të klanit”. Zotëri ata djem e vasha me armë që përbënin Ushtrinë Çlirimtare të Kosovës, doni apo nuk doni ju, ishin 100 për qind atdhetar të gatshëm për të dhënë jetën për çlirimin e atdheut e kombit të tyre shqiptar. Ata për asnjë moment nuk kanë menduar se cilat do të ishin përfitimet e tyre të të nesërmes, se nuk kishin kohë për t’u marrë me këto llogari. Ata ishin të gjithë luftëtarë të guximshëm dhe pa asnjëlloj mëdyshje për t’u përballur me armikun e dhënë jetën. Asnjë luftëtar dhe drejtues i kësaj ushtrie çlirimtare përveç shporrjes me çdo kusht të pushtuesit nuk ka pasur asnjë lloj ambicie për pas luftës, pasi unë i njoh mirë dhe i di synimet e tyre, pavarësisht si shpreheni ju në pikën 33 të raportit.
Por në këtë moment më kujtuat një episod të vitit 1998, kur unë në ushtrim të detyrës time si komandant i zonës së veriut të Shqipërisë, duke parë rrjedhën e ngjarjeve, bëja takime me strukturat e qeverisjes lokale dhe kryefamiljarët në rajone të ndryshme të zonës, sipas një plani të caktuar. Por një ditë pas një takimi në një komunë një fshatar vërejta se kërkonte të më takonte, por ata që më shoqëronin po e pengonin. Për këtë e pyeta kryetarin e komunës, se çfarë kishte fshatari, kur ai më tha se donte të më takonte mua, kërkova të mos e pengojnë. Kur fshatari erdhi tek unë dhe u përshëndetëm, e pyeta çfarë halli kishte. Ai më tha: – Me sa kuptova unë ju do të bëni luftë, se Serbia mund të ketë dëshirë të zgjerojë luftën për të futur në hije Kosovën. E po u bë luftë, unë e di se ju do të ma shkatërroni shtëpinë, se e kam në afërsi të kufirit. Prandaj unë kërkoj nga ju që të më jepni një shkresë me firmën tuaj, që po të më prishet shtëpia, të ma paguani pas luftës. Unë pasi e dëgjova, jo pa habi, iu përgjigja: – Unë po lumturohem që ju e ditkeni se pas luftës do të jeni gjallë. Sepse unë e di saktë se pas luftës nuk do të jem gjallë, pasi me siguri do të vritem në luftë. Prandaj meqë unë nuk do të jem pas luftës, ju mund ta merrni vërtetimin tek ai që do të ketë fatin të jetë në vendin tim, kur të bëhet paqe.
Fshatari zotëri Marty u turpërua për kërkesën e tij, kërkoj shumë falje dhe u largua. Dhe të them sinqerisht, unë e kisha shumë seriozisht, dhe kisha bindje të plotë, në ato fjalë që i thash fshatarit. Kaq kanë menduar edhe të gjithë luftëtarët dhe drejtuesit e UÇK-së. Prandaj unë bëj pyetjen për ju zotëri Marty, ju kur do të turpëroheni e kërkoni falje për këto që keni shkruar, e të ngjiteni të paktën deri në nivelin e atij fshatarit që iu tregova? Por prapë nuk besoj se ju jeni i prirë për t’u turpëruar, pasi nuk ngjiteni dot në nivelin e fshatarit shqiptar. Sepse ju edhe informacionin që jepte UÇK-ja gjatë luftës, në pikën 34 e quani mashtrim. Ju arrini deri atje, sa në pikën 35, tregoni pa far mëdyshje se ata komandant e drejtues të UÇK-së, që nuk kishin automjete, por edhe furnizimin e fronteve me armatim e municione e bënin me shpinë ose me kafshë, paskan menduar të përfitojnë nga sektori i naftës, ndërtimet, qiradhënia, etj, që seriozisht, duke lexuar raportin tuaj po më dhemb krejt trupi, pasi po më duket i turpshëm për vete edhe akti i leximit, pasi po më duket se po bëhem bashkëpunëtor më ju në këtë ndërmarrje të paskrupullt. O njeri, po a mund të shkruhet kështu: “Një numër i madh prej tyre do jenë përpjekur të përfitonin sa më shumë nga pushteti që kishin gjatë kohës kur disa zona jashtë ligji ishin vendosur nën autoritetin e tyre veprues (si në disa pjesë të Kosovës jugore dhe perëndimore) dhe të përdornin ndikimin e tyre, sidomos për sa i përket burimeve financiare, për t’u vendosur në vende të tjera (për shembull në Shqipëri)”. Po ku kishte financa në Kosovë në atë kohë lufte? Ku mund të merreshin paratë në Kosovë? A nuk e dini se UÇK-ja ka pasur një strukturë të veçantë që është quajtur fondi “Vendlindja Thërret”, strukturë e cila ka vepruar në të gjitha kontinentet, duke grumbulluar fonde nga diaspora për të financuar luftën? Po pse more nuk ulesh me këmbë në tokë o njeri e të kuptosh se çdo të thotë luftë e organizuar nën pushtim? Po ata djem që kalonin me shërbim në Shqipëri, po t’i ndaloje dhunshëm një ditë më shumë se nevoja e shërbimit, qanin si fëmijë pse po pengoheshin të shkonin tek bashkëluftëtarët e tjerë në vijat e fronteve, ku kishin kohë ata të siguronin fonde për t’u vendosur në Shqipëri? Jo zotëri, ata nuk kishin pse vendoseshin në Shqipëri, ata do të luftonin dhe për ta do të kishte ose çlirim të atdheut, ose rënie në frontin e luftës për liri. Nuk kishte asnjë alternativë tjetër dhe këto dy alternativa ia kishin caktuar vetvetes, askush nuk kishte marrë vendim për ta.
***
Nuk është aspak e vërtetë se UÇK-ja ka qenë e çorganizuar
Në pikën 36 shpreheni: “Në realitet, veprimtaritë kryesore operative të anëtarëve të UÇK-së para, gjatë dhe menjëherë pas konfliktit kryheshin në territorin shqiptar, ku forcat serbe të sigurimit nuk kanë qenë asnjëherë”. Nuk keni aspak, aspak të drejtë. Të gjitha organet udhëheqëse të Luftës Çlirimtare të Kosovës kanë qenë në Kosovë, nëse doni mund t’i vizitoni të gjitha vendkomandat e tyre, pasi janë të njohura sot. Në Shqipëri kanë lëvizur për nevojat e luftës rast pas rasti individë nga udhëheqësit e luftës me kohë të kufizuara disaditore, por asnjëherë nuk ka pasur çast që ata të kenë funksionuar dhe vepruar në Shqipëri për drejtimin e luftës. Në Shqipëri nuk përjashtoj mundësinë që të ketë pasur qendra luftëtarë për stërvitje prej grupeve të djemve e vashave që shkonin drejt frontit, të cilët qëndronin në kohë shumë të kufizuara, sepse edhe po të tentohej të mbaheshin më shumë ata vetë nuk pranonin, pasi kërkonin të shkonin sa më parë në frontet e luftës. Po kështu në afërsi të kufirit ka pasur edhe vende ku janë grumbulluar armatime, municione e pajisje që futeshin në frontet e luftës. Por të bëhen deklarata të papërgjegjshme dhe të gënjeshtërta qëllimkëqija siç i bëni ju, është abuzim i rëndë dhe shpërdorim i detyrës për të cilën vërtet ju duhet të jepni llogari para institucioneve që iu kanë ngarkuar me detyrën për të nxjerrë të vërtetën.
Si e keni konsideruar UÇK-në ju në Perëndim, unë e di mirë, por për t’ua sqaruar të gjithë atyre që kanë dëshirë ta kenë të qartë, duhet t’ju them se nuk është aspak e vërtetë që UÇK-ja ka qenë e çorganizuar, siç e cilësoni ju në pikën 37 të raportit. Ajo periudhë vërtet ka qenë e vogël, se pa qenë e vogël nuk mund të bëhej e madhe, pasi ajo është ushtri që u krijua brenda një terreni të pushtuar nga një armik gjakatar, siç ishte Serbia. Kështu që, e çorganizuar ajo nuk mund të bëhej, përkundrazi i duhej një disiplinë shumë e fortë, një unitet i pathyeshëm dhe një mirëkuptim i plotë, e një vigjilencë e padepërtueshme, pasi në të kundërt do të kishin depërtuar agjentët e UDB-së dhe do t’i kishin shkatërruar menjëherë.
Për ta ditur ju, shqiptarët prej 100-vjetësh në tokat e pushtuara nga Serbia dhe Mali i Zi, asnjë ditë nuk e kanë pushuar luftën. Në vazhdimësi janë bërë kryengritje. Në vazhdimësi në këto treva kanë vepruar Çeta kryengritësish me vite e me vite, por në fund të gjitha kanë dështuar duke u asgjësuar të gjithë luftëtarët për arsyen e thjeshtë, se në strukturat e tyre kanë depërtuar agjentët e fshehtë serbë. E po të ishte e çorganizuar siç thoni ju, do të kishte ndodhur edhe me UÇK-në e njëjta gjë. Por organizimi i saj perfekt ka bërë që ajo të mos lejojë të depërtojnë agjentët e fshehtë serbë. Por ju jap të drejtë, se ju të dhënat i keni marrë në Beograd e ata kështu e dinë, pasi këtë e keni edhe në librin e gjeneralit Klark “Të bësh luftë moderne”, kur në takim me të, drejtori i përgjithshëm i policisë serbe i thoshte gjeneralit se UÇK-ja ka 410 luftëtarë kur, në fakt, ajo kishte 20 mijë. Nuk befasohem për këtë hallakatje tuajën, pas informacionit shqiptar ju keni deklaruar vetë se nuk besoni në raportin tuaj e ai serb është i pasaktë.
Në pikën 38 ju thoni: “Burimet tona pranë UÇK-së si dhe dëshmi nga anëtarë të UÇK-së të zënë robër nga policia serbe vërtetojnë se bazat kryesore të UÇK-së ku mblidheshin rekrutët e saj ndodheshin në Veri të Shqipërisë”. Këtë çështje unë sapo ua shpjegova më lart, por u mora prapë për faktin se ju nuk keni pasur fare burime pranë UÇK-së gjatë luftës se nuk e keni njohur fare atë dhe së dyti, edhe Serbia nuk ka pasur shumë fat në rënien robër të luftëtarëve të UÇK-së. Edhe në një rast, më 14 dhjetor 1998 që u zunë 9 luftëtarë në një pritë në malin e Pashtrikut, UÇK-ja i zuri menjëherë 8 ushtarë serb që i shkëmbeu me ndërmjetësinë ndërkombëtare. Kjo ndoshta nuk ka shumë rëndësi si fakt i asaj kohe, por jua thashë vetëm për t’ju treguar se po mashtroni.
Po kështu në pikën 39 prapë ju si gjithnjë i referoheni policisë serbe, se atë e keni burimin e besueshëm, për këtë jam i bindur, por dua të kuptosh mirë, se ata djem e vasha që përbënin UÇK-në nuk ishin kriminelë, dhe ju nuk duhet ta përdorni këtë term, pasi bëni padrejtësi, ata ishin luftëtarë lirie. Por sado të të them të vërtetën, unë jam shqiptar e për ju çfarë thonë shqiptarët nuk duhen besuar. Mirëpo ajo që është shqetësuese, është fakti që ju këtë term kriminel e vini në një dokument që është ndërkombëtar dhe i atribuohet një organizate madhore si Këshilli i Evropës. E që ata do të ecnin nëpër rrugë malore e në fshehtësi është e sigurt se ata ishin duke vepruar në një terren të pushtuar nga armiku. Po ju sa kontradiktor që jeni zotëri, pasi një herë thoni që UÇK-ja furnizohej me kafshë e një herë tjetër drejtuesit e saj i bëni bosa të naftës. Të paktën ta kuptoni abuzimin tuaj me fjalë në këtë raport.
Në pikën 41 të raportit shkruani: “Dhe vetëm në gjashtëmujorin e dytë të vitit 1998, UÇK-ja arriti të imponohet në mendjen e bashkësisë ndërkombëtare, falë mbështetjes së hapur të fuqive perëndimore bazuar në ‘lobingun’ e Shteteve të Bashkuara, si tehu i luftës së Kosovarëve shqiptarë për çlirimin e Kosovës”. Ne e vlerësojmë shumë mbështetjen ndërkombëtare, në veçanti të ShBA-së, por këtë mbështetje nuk ua dhanë shqiptarëve, mbështetjen e fituan me luftën serioze dhe të drejtë e të ndershme që bënë, ndryshe nga ato çfarë thoni ju në raportin tuaj. Të jeni i sigurt, po të kishin vepruar shqiptarët ashtu siç i akuzoni ju në këtë raport, nuk do të kishin pasur kurrë mbështetjen ndërkombëtare, pasi nuk ishin të gjithë budallenj dhe erdhët ju pas 10 vjetësh për të zbuluar çfarë nuk kishin parë ata. Unë ndihem i lumtur, kur ju e konsideroni ShBA-në “tehu i luftës së kosovarëve shqiptarë për çlirimin e Kosovës”, por edhe ShBA-ja deri kur i njohu luftëtarët e lirisë kush ishin, deri kur vlerësoi organizimin, disiplinën, drejtësinë, ndershmërinë, humanizmin dhe vendosmërinë e tyre nuk i njohu. Dhe kjo ka ndodhur në verën e vitit 1998. Prandaj informohu më mirë, mos hidh gurë kundër shqiptarëve vetëm pse nuk i do, pse je i dashuruar me Serbinë.
Ushtria Çlirimtare e Kosovës ka lindur si vullnet i popullit, si domosdoshmëri historike për ta shpëtuar popullin e pushtuar nga asgjësimi, nuk ka lindur si vullnet princërish, apo personalitetesh të dorës së parë siç i quan ti në raportin tënd në pikën 41. UÇK-ja dhe drejtuesit e saj kishin një mision: ta çlironin vendin nga pushtuesi, se kush do ta merrte drejtimin politik e shtetëror në Kosovën e lirë nuk u ka interesuar fare. Por natyrisht pas çlirimit ata nuk do të arratiseshin nga Kosova, ata që do të mbeteshin gjallë do të merrnin edhe pushtet, ju vjen ose jo mirë ju apo atyre si puna juaj. Për dijeninë tuaj, duhet të them, se mjaft prej udhëheqësve të kësaj lufte të lavdishme, që futen në atë radhën e personaliteteve të dorës së parë, siç i quani ju, sot janë në piedestalin e lirisë pasi ia kanë falur jetën atdheut nëpër frontet e Luftës Çlirimtare, duke u përleshur me forcat e pushtuesit.
Në pikën 44, sipas burimeve të brendshme që paskeni pasur ju në UÇK, por të cilën nuk e keni njohur dhe nuk keni dashur ta njihni, dini se si ajo ka ndërtuar kapitalin politik për ta ruajtur përparësinë ndaj grupimeve rivale. Por ju nuk thoni diçka fare të thjeshtë se UÇK-ja e ka bërë politikën me krisma armësh e jo me fjalë. E politikë tjetër me armë në Kosovë nuk ka pasur, përveç asaj të UÇK-së.
Ndërsa sa i përket pretendimit tuaj se UÇK-ja nuk ka qenë një grupim i vetëm dhe nuk ka pasur një kryekomandant, po ju sqaroj, se ajo ka pasur një hierarki të përsosur, ka pasur një komandë të fuqishme dhe me personalitete të patjetërsueshëm. Ka zbatuar një disiplinë hierarkike që i ka befasuar edhe ushtritë moderne të kohës. Hierarkia e zbatimit të urdhrave ka funksionuar në mënyrë të përsosur, edhe më mirë se në ushtritë klasike të kazermës. Duhet kuptuar se disiplina në zbatimin e urdhrave mund të konsiderohet një nga pikat e forta të suksesit të luftës së saj. Ndoshta për këtë edhe ju zotëri Marty pikërisht këtu kërkoni ta futni atë pykën tuaj të ndryshkur. Asnjë ndarje nuk ka pasur dhe gjithë veprimtaria e saj është zbatuar sipas një plani të detajuar strategjik politiko-ushtarak, me një synim të vetëm të hidhet jashtë pushtuesi e t’i jepet atdheut liria. UÇK-ja ka qenë plotësisht një ushtri konvencionale, veçse nuk i ka pasur armët dhe furnizimin si të ushtrisë serbe, por më të varfra, e kjo nuk konsiderohet dobësi e saj.
Në pikat 46-47 ju që në atë kohë paskeni zbuluar një tarafikim të brendshëm me rrënjë të thella që po përçante UÇK-në. Athua se nuk e njihni fare Konferencën e Rambujesë, ku delegacioni i UÇK-së foli me një gojë dhe mbajti një qëndrim të spikatur unik e të pandryshueshëm. Ndërsa kur u referoheni ambicieve politike, ju po flisni për të sotmen dhe vetëm po ndërroni kohën, duke e shikuar këtë të sotme të lindur në kohën e luftës, çka nuk ju favorizon, se besoj edhe në Zvicër e vendet e tjera në botë politika partiake bëhet njëlloj si në Kosovë. E kjo nuk konsiderohet përçarje, siç thoni ju, por kërkim i ideve më të mira për ta qeverisur vendin e për ta zhvilluar jetën e qytetarëve duke e përmirësuar atë e duke rritur dinjitetin e shtetit të Kosovës.
Në pikën 48 ju bëni një fyerje në ndjenjë duke iu ngjitur prapë idesë tuaj se “Shumë ‘grupëzime’ të ndryshme të UÇK-së u shfaqën në këtë mënyrë më 1998 e 1999, konkretisht pas vdekjes së komandantit të famshëm fshatar të UÇK-së Adem Jashari”. Së pari, duhet t’ju sqaroj se Komandanti Legjendar i Ushtrisë Çlirimtare të Kosovës, Adem Jashari, nuk ishte një fshatar i thjeshtë, siç e konsideroni ju, por një komandant që kishte kryer kualifikime të vazhdueshme ushtarake dhe njihte në perfeksion strategjinë dhe taktikën e luftës. Së dyti, ai nuk ka vdekur, siç shpreheni ju, por ka rënë duke luftuar heroikisht kundër ushtrisë së pushtuesit për hatër të lirisë së atdheut e të kombit të tij. Së treti, duke rënë Adem Jashari, UÇK-ja nuk u copëtua por, përkundrazi, u bë faktor ndërkombëtar i fuqishëm, që gëzoi simpatinë dhe përkrahjen e gjithë botës moderne. Së katërti, UÇK-ja është e vërtetë, siç thoni ju, se u shtri “në krejt territorin e Kosovës”, por ajo nuk ishte një ushtri fshatare. Ndoshta ju keni lexuar ndonjë material të vjetër të kohës së Vilhelm Telit, kur flisni për luftë fshatarësh, ose ashtu doni ta prezantoni me qëllim keqdashës Luftën Çlirimtare të Kosovës si luftë fshatarësh, pasi UÇK-ja mbi 70 % (për qind) të luftëtarëve i ka pasur me shkolla të larta e me universitete. Ashtu sikurse luftëtarët e saj nuk kanë qenë të gjithë banorë të fshatrave, siç deklaroni ju, por sipas përqindjes së banorëve në qytete e në fshatra ka pasur luftëtarë edhe nga qyteti edhe nga fshati, po të keni dëshirë mund të merrni adresat e të gjithë luftëtarëve, pasi nuk i kemi të fshehta. Së pesti, Adem Jashari nuk hyri thjesht në folklor si martir, siç e emërtoni ju, por u vlerësua si hero kombëtar, duke u kthyer në nyje uniteti të gjithë popullit shqiptar në Ballkan, dhe duke rreshtuar të gjithë shqiptarët rreth idesë së luftës finale për çlirimin e trojeve të pushtuara nga Serbia. Nuk keni bërë mirë, që keni bërë lojëra të tilla fjalësh, duke përdhosur ndjenjat shpirtërore të shqiptarëve, pasi shqiptarët gjithnjë i kanë nderuar ndjenjat shpirtërore të kombeve të tjera, përfshirë edhe ato të popullit zviceran të cilit i përkisni ju.
Në pikën 49 të raportit tuaj, i quani drejtuesit e UÇK-së “themelues të vetëshpallur të UÇK-së”, por ju nuk mund t’i dini të gjitha, as Serbia, pronarja dhe instruktuesja juaj, nuk mund t’i dijë të gjitha. Ushtria Çlirimtare e Kosovës nuk është bandë bashibozukësh, siç doni ta etiketoni ju. Ajo është elita e gjakut kombëtar shqiptar. Për krijimin e saj nuk ka pasur themelues të vetëshpallur, por vendime politike kombëtare. Dhe ajo nuk është ndërtuar sipas njohjeve, por sipas ndjenjave për ta dhënë gjakun për lirinë e atdheut. Po të ishte sipas njohjeve e familjeve, siç doni të krijoni ju ide nëpër botë, nuk do të kishte në radhët e saj luftëtarë e luftëtare nga të gjitha tokat shqiptare, edhe nga diaspora, duke ardhur në radhët e luftëtarëve edhe ata djem e vasha që nuk kanë lindur në Kosovë, por në Zvicër, Gjermani, Suedi, Francë, ShBA etj. Por ju nuk ndaleni, sepse ju duhet t’i thoni të gjitha ato që i kanë thënë serbët para jush. Unë do të t’i evidencoj të gjitha çfarë dhe kur i kanë thënë serbët këto që ju i parashtroni në raport. Dhe po ju them se serbët këto i kanë thënë gjatë gjithë historisë e për problemet që trajtoni ju, i kanë thënë gjatë luftës në vitet 1997 – 1999 e, më së fundi, në vitet 2003 – 2004, kështu që ju jeni i vonuar në këto deklarata.
***
UÇK-ja kishte unitet të çeliktë
Pika 52 e raportit në fjalë është një tentativë për të futur përçarje midis shqiptarëve. Aty thuhet: “Ka dalë qartë se këto ‘grupëzime’ të ndryshme të UÇK-së kanë zhvilluar e ruajtur strukturat e tyre informative, që i kishin ndër të tjera, si një mjet për të siguruar vazhdimësinë e tyre. Përkrahësit më të zellshëm të ndjekjes faktike të kësaj forme lufte të UÇK-së përdorën të gjitha mjetet që kishin, duke e vënë veten, në mënyrë të pamohueshme, në kufirin e ligjshmërisë, për të mbikëqyrur dhe shpesh për të sabotuar veprimin e kundërshtarëve, si dhe të atyre që mund të dëmtonin interesat e tyre politike a ekonomike”. Ndërsa unë po të them se Ushtria Çlirimtare e Kosovës ka pasur që në luftë Shërbimin e vet Informativ, shumë të organizuar dhe që ka kryer me ndershmëri detyrat në interes të atdheut. Dhe ky shërbim ka vijuar të ekzistojë deri në shpalljen e pavarësisë së Kosovës, ka qenë publik dhe nuk ka vepruar i fshehur.
Ky shërbim në punën e tij ka një veprimtari të spikatur dhe me bashkëpunim me partnerët ndërkombëtarë. Ai nuk është marrë me partitë politike që normalisht u krijuan pas përfundimit të luftës, por kreu detyrën deri ditën kur ia dorëzoi shtetit të pavarur të Kosovës.
Përveç Shërbimit Informativ të UÇK-së të krijuar që gjatë luftës, në Kosovë nuk ka vepruar asnjë shërbim tjetër legal përveç, ndoshta, ilegalisht edhe UDB-a juaj, e cila ju ka furnizuar me informacionet që jua kanë interesuar. Çdo deklarim ndryshe është në kuadër të shpërdorimit të detyrës që bëni ju, në emër të Këshillit të Evropës.
Deklarimi juaj, se ky shërbim është përdorur për ta “mbikëqyrur dhe shpesh për ta sabotuar veprimin e kundërshtarëve, si dhe të atyre që mund t’i dëmtonin interesat e tyre politike a ekonomike”, është shpifje dhe nuk bazohet në asnjë fakt, përveç në ndonjë artikull gazete të shkruar nga ndonjë gazetar i tipit tuaj, që në emër të lirisë së shtypit mund të shkruajnë çfarë t’u teket, ashtu edhe të kolegut tuaj Bllaca që me të vërtetë jep deklarime të vlefshme, bile “shumë të vlefshme”, i cili është përputhur plotësisht me mendimet dhe veprimet e zbulimet tuaja.
Ajo që është shumë interesante duket se ju paskeni zbuluar që ne kemi edhe një kanun, të cilin e paska zbatuar UÇK-ja, siç e pohoni në pikën 53 të raportit tuaj. Po si nuk ju ra në sy se UÇK-ja ka pasur një betim ushtarak publik? Si nuk arritët t’i gjeni rregulloret ushtarake të jetës e të disiplinës që ka zbatuar UÇK-ja që nga themelimi i saj? Si nuk ju kanë rënë në sy ato qindra urdhra e komunikata që ka lëshuar Shtabi i Përgjithshëm i UÇK-së gjatë gjithë luftës? Si nuk ju ranë në sy ato struktura organike mbi të cilat është ndërtuar e ka funksionuar UÇK-ja? Si nuk arritët t’i shikoni planet e operacioneve luftarake të formacioneve të UÇK-së për realizimin e misionit të saj? Por duke i tejkaluar të gjitha këto, ju shkuat dhe gjetët kanunin tonë, i cili qenka zbatuar gjatë luftës? Pse jeni kaq i paskrupullt?
Kanuni ynë zotëri është një ligj i lashtë që ka ekzistuar kur ti nuk e kishe akoma kombin tënd. Ai ka luajtur një rol shumë të madh në organizimin shoqëror të kohës kur është shpallur. Është një nga ligjet më të lashta të Evropës, në mos më i lashti. Të diturit mburren me përmasat dhe funksionalitetin e tij. Dhe për të të sqaruar zotëri, ai nuk është zbatuar se nuk ka terrenin për t’u zbatuar në kohët e sotme. Por po të zbatohet, duhet ta dini se askush nuk vritet, pasi ai nuk lejon të vriten njerëz fshehtas. Kur vritet me kanun, vrasësi deklaron vrasjen para se ta hetojnë. Në ato kushte nuk do të kishte nevojë për raportin tuaj, pasi çdo gjë do të ishte e deklaruar publikisht. Prandaj mos na merrni nëpër gojë kanunin tonë të lashtë, apo edhe ai ju ka prishur punë.
Në pikën 54 ju deklaroni se “… kemi konstatuar se njësitë kryesore të UÇK-së dhe zonat e tyre përkatëse të komandimit operativ ishin pothuaj kopje e saktë e strukturave që kontrollonin format e ndryshme të kriminalitetit të organizuar në territoret ku vepronte UÇK-ja”. Kush i kishte organizuar këto forma të ndryshme të “kriminalitetit të organizuar” para krijimit të UÇK-së, që ajo i paska gjetur kopje të gatshme? A e kuptoni që flisni me gjuhën e Serbisë? Si paska qenë i organizuar ky kriminalitet në Kosovë kur aty sundonte me zjarr e hekur pushtuesi serb? Si i paskan gjetur këto mënyra organizimi kriminale djemtë dhe vashat luftëtarë me nga një kallash e nga një grusht fishekë nëpër male? Apo mjafton të thuhen fjalë të tilla dhe efektiviteti është i arritur. Për këtë keni të drejtë vërtet me lojëra të tilla fjalësh e akuza pa asnjë të vërtetë. Ju ia arritët ta bindni Këshillin e Evropës. Në këtë kuptim ia keni arritur qëllimit. Veçse duhet të dini që realisht nuk jeni treguar tjetër veçse një kriminel.
Pse nuk thoni çfarë trafikohej nëpër Kosovë e prej Kosove, në kushtet kur atje çdo lëvizje e kontrollonte Serbia? Por, thjesht, në pikën 55 shpreheni se nuk ishte e vështirë “për të kuptuar kush drejtonte trafikimet e ndryshme apo veprimtaritë e kontrabandës, që lulëzonin në rajon”. Me një fjalë, që ju të mos i quani shqiptarët trafikantë, kontrabandistë e kriminelë, çfarë duhet të kishin bërë ata? Sepse ju e keni gjetur lehtë duke vazhduar shprehjen tuaj: “Mjafton të përcaktohet cili taraf apo cili klan komandantësh a rekrutësh të UÇK-së ishte përgjegjës i një zone operative të përcaktuar të UÇK-së në Kosovë apo në disa rajone të Shqipërisë”. Pra, prej këtej del se të gjithë komandantët dhe luftëtarët e UÇK-së në këndvështrimin tuaj nuk janë tjetër veçse kontrabandistë, trafikantë dhe kriminelë. Me thënë të drejtën, keni hyrë shumë në borxh me shqiptarët zotëri. Ju keni ngarkuar jo vetëm akuza, por keni tentuar t’ju ndyjnë edhe historinë. Dhe këtë, thjesht, për t’i kënaqur interesat e fashizmit ekstrem serb. A vërtet jeni me mendësi fashiste zoti Marty?
Për t’ju sqaruar pak për pikën 56, po ju them se vendimi për themelimin e UÇK-së i përket vitit 1994 dhe ideja është shumë më e hershme. Askush në atë ushtri nuk e ka marrë dot drejtimin sipas dëshirës a sipas forcës, por sipas detyrës së vënë nga strukturat e lëvizjes politike të kohës. Kështu që bërthama më e ngushtë e UÇK-së ka qenë Shtabi i Përgjithshëm, i cili ka pasur fuqinë ta udhëheqë luftën e kësaj ushtrie deri në çlirim. Nëse këto veprime ju i quani veprime kriminale të paligjshme, nuk është faji i UÇK-së e as i drejtuesve të saj. Ndërsa si veprimtari kriminale të tyre në Shqipëri ndoshta quani faktin se duke përfituar nga fakti i ngjarjeve të vitit 1997 që hapën depot e ushtrisë në Shqipëri, bënë një punë shumë të organizuar në grumbullimin e atyre armëve për t’i armatosur luftëtarët në Kosovë. Nëse këtë e quani krim, unë e quaj sa veprimtari humane, po aq edhe atdhetare.
Më pas, në pikën 57 keni shpikur një grup të Drenicës, që realisht në asnjë dokument tjetër, përveç në raportin tuaj, nuk është i emërtuar kështu. Për këtë s’ka pasur as pagëzim e as vetëpagëzim. Atë thjesht e keni pagëzuar ju me serbët, ose serbët në vitin 2004 e ju në vitin 2010. Por ju jeni i mllefosur për ta emërtuar kështu sepse Drenica ju shkakton alergji psikike pasi, siç deklaroni vetë, Drenica ka qenë “bërthama tradicionale e qëndresës së anëtarëve të etnisë shqiptare ndaj shtypjes serbe në kohën e Millosheviqit dhe vendlindja e UÇK-së”. Për këtë vizitohuni te mjeku se nuk janë fajtorë shqiptarët, por të dashurit tuaj – serbët, të cilët mjaft janë përpjekur ta shuajnë atë trevë, por nuk kanë mundur ta bëjnë pasi qëndresa shqiptare i ka mundur masakrat serbe. Ndërsa Ushtria Çlirimtare e Kosovës ishte e shtrirë në gjithë Kosovën. Megjithëse veprimet e saj ju i quani veprime kriminale, siç i quajnë serbët, ka vepruar me shumë dinjitet duke arritur t’i hedhë përfundimisht për gjithë të ardhmen shqiptare jashtë serbët dhe ta zhdukin përfundimisht pushtimin prej tyre.
Dhe duke emërtuar të quajturin “Grupi i Drenicës”, ju ia arrini qëllimit të arrini tek emri i udhëheqësit të Kosovës, Hashim Thaçi, të cilin, duke përdorur terminologjitë mafioze, pjesë e të cilëve ndoshta jeni, e emërtoni “kumbara” i rrjeteve të kriminalitet të organizuar që, sipas jush, nuk janë tjetër vetëm strukturat luftarake të UÇK-së.
Por prapë ju gaboni, pasi Hashim Thaçi gjatë luftës e deri në Konferencën e Rambujesë, ku u zgjodh unanimisht kryetar i delegacionit shqiptar, nuk ishte tjetër vetëm drejtor i drejtorisë politike në Shtabin e Përgjithshëm të UÇK-së. Deri në atë kohë ai nuk ishte i njohur si politikan në skenën ndërkombëtare. Por ju nuk shqetësoheni për këtë. Për ju dhe planet serbe duhet goditur kryetari i Kosovës. A do të arrini vërtet që me mashtrime të ngjiteni deri në ato nivele të qeverisjes së Kosovës? A mos keni bërë edhe ndonjë plan për të na sjellë kryetar ndonjë serb? I shkreti ti sa dëshirë të madhe ke.
Sot Thaçi është politikan i nivelit të lartë, por në kohën kur ju e akuzoni me termat që dini t’i përdorni vetëm ju, ai nuk ishte gjë tjetër veçse një djalosh me armë në krah, që kishte marrë përsipër të luftonte deri në fund të jetës për çlirimin e popullit dhe atdheut të tij prej pushtuesve shekullorë serbë. Në atë kohë të luftës së lavdishme ai nuk kishte kohë të bënte poza si ju sot, për të treguar se ishte i zgjuar dhe është vlerë që ai nuk ka zgjuarsinë tuaj.
Mirëpo ju i ngatërroni kohët, njëherë shkoni në vitet 1998 – 1999, njëherë flisni në kohën e sotme. A e dini se përfaqësuesit e ShBA-së kanë filluar bashkëpunimin me Thaçin prej Konferencës së Rambujesë? A e dini se edhe në atë konferencë të nderuar Thaçi nuk guxoi ta firmoste marrëveshjen pa një konsultë të ngushtë me gjithë luftëtarët dhe komandantët e Ushtrisë Çlirimtare të Kosovës, pasi donte të kishte unanimitet të plotë në pranimin e saj? Apo edhe këto veprime janë kriminale?! Dhe të jeni i sigurt, se pavarësisht organizmit në disa parti politike, në skenën politike sot në Kosovë, në atë kohë nuk kishte asnjë fraksion apo përçarje në radhët e UÇK-së dhe për lumturinë tonë ishte vlerë që nuk kishte, pasi një synim të tillë për të krijuar disa ushtri në Kosovë e kanë shprehur serbët që në atë kohë dhe mos mendoni se nuk kanë tentuar ta bëjnë, por nuk kanë arritur, pikërisht se UÇK-ja kishte unitet të çeliktë.
Në pikën 60 ju thoni: “Thaçi ia detyron pa asnjë dyshim ngjitjen e tij personale përkrahjes politike e diplomatike të Shteteve të Bashkuara dhe të fuqive të tjera perëndimore, të cilat e konsideronin si partnerin lokal më të parapëlqyer në projektin e tyre të politikës së jashtme për Kosovën. Kjo formë përkrahjeje politike do t’i ketë krijuar konkretisht ndjenjën se është “I paprekshëm” dhe e veshi kështu me një rëndësi tej mase prej drejtuesi të ardhshëm, të besueshëm, të Kosovës së pasluftës”. Unë do të kisha nderim për ShBA-në dhe fuqitë perëndimore nëse do të kenë vlerësuar se Thaçi është një personalitet i vlefshëm për politikën e Kosovës, pasi ata dinë ta bëjnë vlerësimin e nivelit të politikanëve. Nëse është kështu, unë ju falënderoj që na e thoni, por kemi dëgjuar mjaft përralla të tilla, që çdo gjë lind në Perëndim. Realisht UÇK-ja ka lindur në gjirin e popullit të tij dhe i ka nxjerrë prej gjirit të vet kuadrot drejtuese, që sot janë edhe udhëheqës me vlera në politikë.
Prapë në pikën 61 ju shpreheni: “…Thaçi e përforcoi në përmasa fenomenale mbështetjen e tij mbi veprimtaritë kriminale të organizuara gjatë kohës kur këto lulëzuan në Kosovë e në Shqipëri”. Po cilat janë more zotëri këto krime që nuk i emërtoni? A mos e quani krim faktin që bashkëpunëtore e bashkëluftëtare e UÇK-së dhe e Hashim Thaçit (meqë doni t’i përmendni emrin), u bë gjithë bota moderne dhe forca e saj e madhe politike-ushtarake NATO-ja, që goditën bashkë me të pushtuesin e Kosovës deri në çlirim? Në atë kohë i vetmi “krim” që mund të jetë bërë ka qenë armatosja e UÇK-së dhe që edhe ajo për pamundësi nuk është bërë në nivelin e nevojave të saj. Të gjitha krimet e tjera që nënkuptoni kanë ndodhur zotëri vetëm në kokën tuaj, që me sa lexoj në këtë raport ka imagjinatë të sëmurë.
Në pikën 62 thoni: “Thaçi do ketë vepruar në këtë fushë me mbështetjen dhe bashkëfajësinë jo vetëm të strukturave qeverisëse zyrtare të Shqipërisë, dhe konkretisht të qeverisë socialiste në pushtet në atë kohë, por edhe të shërbimeve sekrete shqiptare dhe të mafies së tmerrshme shqiptare”. Po mirë mor zotëri, mbasi Shqipëria paska qenë me shtet mafioz, me shërbim informativ mafioz, me shoqëri mafioze, me mafi të tmerrshme shqiptare, çdo të bënte Thaçi? Natyrisht do të bëhej si ata. Nuk besoj se keni ndonjë mendim tjetër. Këtu bëni shumë mirë, përderisa në Shqipëri jua kanë pranuar këtë vlerësim për ta. Po si ta ka pranuar Këshilli i Evropës këtë vërtet, nuk e kuptoj. Ju zotëri duhet të paditeni, por unë nuk kuptoj pse lejohesh të jesh i lirë edhe nga Këshilli i Evropës, pasi mendoj se jeni shoqërisht i dëmshëm. Ju sot po godisni Shqipërinë e Kosovën dhe personalitetet e udhëheqjes dhe të politikës së këtyre dy shteteve, po nesër? Ju mund të bëni çdo lloj krimi.
VIJON …
____________________
KUDUSI LAMA:UÒªK-ja, RAPORTI I DICK MARTIT DHE GJYKATA SPECIALE (XIV)
https://pashtriku.org/?kat=43&shkrimi=10526
